جاقىندا ۇلان اۋدانىنىڭ سپورت دەسە ىشكەن اسىن جەرگە قوياتىن جانكۇيەرلەرى جەرلەستەرى, جارتى عاسىر بويى ۆولەيبولدان اۋدان نامىسىن ابىرويمەن قورعاعان, ءدۇبىرلى جارىستاردا ءوز كومانداسىمەن بايراقتى باسەكەلەردە توپ جارعان باقىتجان نۇرسۇلتانوۆتىڭ قۇرمەتىنە تۋرنير وتكىزىپ, جارىس كورىگىن قىزدىردى.
باقىتجان قابەك ۇلىنىڭ ءومىر جولى, اۋىر ناۋقاسقا شالدىقسا دا سپورتتىڭ ارقاسىندا ونى جەڭىپ شىققانى, اۋداننىڭ جۇزدەگەن ساڭلاعىن تاربيەلەگەن ۇستازدىعى اۋدان جۇرتشىلىعىنىڭ كوز الدىندا ءوتتى.
ارداگەرلەر اراسىنداعى تۋرنيرگە كۇرشىم, كاتونقاراعاي, ۇلان اۋداندارىنان بەس كوماندا قاتىستى. جارىس تارتىستى ءوتتى. اسىرەسە كۇرشىم, كاتونقاراعاي اۋداندارىنان ات تەرلەتىپ كەلگەن ساقا ۆولەيبولشىلار بۇقارالىق سپورتپەن مىقتاپ شۇعىلداناتىندارىن دالەلدەدى. ۇلاندىقتار دا نامىستى قولدان بەرگەن جوق. ناتيجەسىندە ۇلان, كۇرشىم, كاتونقاراعاي اۋداندارىنىڭ ۆولەيبولشىلارى جۇلدەلى ورىنداردى ءبولىستى.
بەلگىلى كاسىپكەر قايرات مۋسين, سەرىك سۇلەيمەنوۆ, باقىتجاننىڭ ءتول شاكىرتتەرى ەركىن قايىرباەۆ, سەرىك ومارحانوۆ, ەربول جاقىپوۆ, تاعى باسقالار ءتۋرنيردىڭ وتۋىنە كومەكتەرىن جاسادى. الماتىلىق كاسىپكەر رازبەك بايتىلەۋ ارنايى جاساعان ەسكەرتكىش-مەدالى مەن قوماقتى سىي-سياپاتىن بەرىپ جىبەرىپتى. ونى قايرات مارات ۇلى تاپسىردى.
تۋرنير اياقتالعان سوڭ باقىتجان قابەك ۇلى جينالعاندارعا العىسىن ايتتى. ۇلان اۋدانى اكىمدىگىنىڭ بۇقارالىق سپورتتى دامىتۋداعى يگىلىكتى ىستەرىنە توقتالىپ, الداعى ۋاقىتتا دا بۇل ءىس-شارا جالعاسا بەرەتىنىن ايتتى. تۋرنير اياقتالعان سوڭ جەڭىمپاز كوماندالار ماراپاتتالدى.
قالاي دەگەندە دە, ۇلان اۋدانىندا بۇقارالىق سپورتقا ەرەكشە كوڭىل بولىنەتىنىن اتاپ وتكەن ءجون.
وڭداسىن ەلۋباي,
ارداگەر جۋرناليست
شىعىس قازاقستان وبلىسى,
ۇلان اۋدانى