ءاليحان بوكەيحاننىڭ پورترەتى بەس قاباتتى ءۇيدىڭ قابىرعاسىنان مەنمۇندالاعاندا, وسكەمەننىڭ ءوڭى وزگەرىپ سالعانداي بولدى. ءارى-بەرى وتكەندەر «اناۋ ءاليحان عوي» دەستى ماقتانىشپەن. وبلىس ورتالىعىنداعى ۇيلەردىڭ قاسبەتىنە اينالدىرعان جارتى ايدىڭ ىشىندە وسىنداي مۋرالدىڭ بەسەۋى سالىنعان.
اۋەلى اتكەنشەك تەۋىپ وتىرعان تاقيالى قىز بالانىڭ سۋرەتى 19-شى شاعىن اۋدانداعى بالالار اۋرۋحاناسىنىڭ تۇسىنداعى ءۇيدىڭ قابىرعاسىنان كورىنىس تاپتى. ءناپ-نازىك سۋرەتتىڭ ءور جاعىنا ء«بارى جاقسى بولادى» دەگەن جازۋ جازىلىپ, اۋرۋحانادا جاتقان ناۋقاستارعا كۇش-جىگەر بەرىپ تۇراتىنداي كورىندى. بۇدان كەيىنگى مۋرال س.نۇرماعامبەتوۆ جانە ا.چەحوۆ كوشەلەرىنىڭ قيىلىسىنداعى ۇيگە سالىنعان. ول جەرگە ەلىمىزدىڭ كوك بايراعىن كوتەرىپ تۇرعان بالاقاي بەينەلەندى. ال اربات بويىنداعى ۇيلەردىڭ بىرىنەن قىزىلدى-جاسىلدى كەمپىرقوساقتىڭ سۋرەتىن سالىپ جاتقان ءبۇلدىرشىندى كورۋگە بولادى. اۋەزوۆ داڭعىلى مەن گوركي كوشەسىنىڭ قيىلىسىنداعى ۇيگە جاس حوككەيشىنىڭ بەينەسى ءتۇستى.
بارىنەن بۇرىن ءى.ەسەنبەرلين داڭعىلىنىڭ تورىنە الاش قايراتكەرى ءاليحان بوكەيحاننىڭ پورترەتى تۇسكەندە ەلەڭ ەتپەگەن ەل بولمادى. ەرەسەكتەردىڭ «بۇل كىم؟» دەپ تانىماي جاتقانىن دا قۇلاعىمىز شالىپ قالعان. ەسەسىنە جالىندى جاستار ءاليحان بوكەيحاننىڭ كىم ەكەنىن مۇدىرمەي ءتۇسىندىرىپ بەرىپ جاتتى. ءيا, كەڭەستىك جۇيەنىڭ شەكپەنىندە ءومىر ءسۇرىپ كەلگەندەر الاشتى, ءاليحاندى قايدان ءبىلسىن؟! بەرتىنگە دەيىن تاريح بەتتەرىنەن كورمەگەنىمىز وتىرىك ەمەس. دەمەك, مۋرال كوپشىلىكتىڭ كوكىرەك كوزىن اشىپ, الاشتى تاني تۇسۋگە ىقپالىن تيگىزىپ جاتىر. ونىڭ ۇستىنە, سۋرەتتىڭ تومەنگى تۇسىنداعى QR كود ارقىلى ءاليحان بوكەيحاننىڭ ءومىر جولىمەن تانىسۋعا بولادى. تاپتىرماس يدەيامەن سالىنعان سۋرەتتەر قالا اكىمدىگىنىڭ تاپسىرىسىمەن جۇزەگە اسقانىن ايتا كەتكەن ءجون.
– مۋرالدىڭ كورگەن كوزگە ادەمىلىك سىيلايتىنى ءبىر بولەك تە, پاتريوتتىق سالماعى ءبىر بولەك. ەڭ باستىسى, قالا تۇرعىندارىنا ۇناپ جاتقانىن بايقاپ وتىرمىز. بەسىنشى مۋرال – ءاليحان بوكەيحان وسكەمەندەگى ۇيلەردىڭ ءبىرىنىڭ قابىرعاسىندا مەنمۇندالاپ تۇر. الاش كوسەمىنىڭ ۇلكەن پورترەتى جانە تسيتاتاسى – «ۇلتىنا, جۇرتىنا قىزمەت ەتۋ – بىلىمنەن ەمەس, مىنەزدەن» جاستارعا رۋح بەرەتىنىنە كۇمانىمىز جوق, – دەيدى قالا اكىمى جاقسىلىق ومار.
سۋرەتتەردى سالعان قىلقالام شەبەرلەرى الماتى قالاسىنان كەلگەن «Tigrohaud crew» شىعارماشىلىق ورتالىعىنىڭ مۇشەلەرى ەرجان تاناەۆ پەن ءالي زاكىر.
وزگەشە قالانىڭ تۇرعىندارى دا ءار كوشەلەرگە ايتۋلى تۇلعالاردىڭ پورترەتتەرى بەينەلەنسە دەگەن ۇسىنىستارىن ايتتى. ماسەلەن, ءاليا مولداعۇلوۆا كوشەسىنە ءاليانىڭ پورترەتى اسقاقتاپ تۇرسا دەسەدى. ارينە, ۇسىنىستاردىڭ ەسكەرۋسىز قالمايتىنى انىق. سۋرەتشىلەر بولسا, تاپسىرىس تۇسسە, تالماي ەڭبەك ەتەتىنىن ايتتى.