وقۋ-اعارتۋ ءمينيسترىنىڭ تاپسىرماسى بويىنشا ورتا ءبىلىم بەرۋ كوميتەتى الماتى وبلىسىنىڭ 11 مەكتەبىنىڭ كۇردەلى جوندەۋىنە مونيتورينگ جۇرگىزدى. جۇمىس ساپارى بارىسىندا مينيسترلىك وكىلدەرى بەلگىلەنگەن مەرزىمدە جۇمىستاردى ساپالى اياقتاۋ تۋرالى ۇسىنىمدار بەردى, دەپ حابارلايدى Egemen.kz وقۋ-اعارتۋ مينيسترلىگىنىڭ رەسمي سايتىنا سىلتەمە جاساپ.
ورتا ءبىلىم بەرۋ كوميتەتىنىڭ مالىمدەۋىنشە, جوندەۋدەن ءوتىپ جاتقان مەكتەپتەردىڭ كوبى 70-80 جىلداردىڭ باسىندا سالىنعان. ولاردىڭ قاتارىندا قوناەۆ قالاسىنىڭ ق.قايسەنوۆ اتىنداعى №4, ىلە اۋدانى ەكپەندى اۋىلىنىڭ №2 ورتا مەكتەپتەرى, ەڭبەكشىقازاق اۋدانى ەسىك قالاسىنىڭ ا. مالكەەۆ اتىنداعى ءبىلىم-يننوۆاتسيا ليتسەيى, شەلەك اۋىلىنىڭ اباي اتىنداعى, ەسىك قالاسىنىڭ ابىلايحان اتىنداعى №4 ورتا مەكتەپتەرى, قاسكەلەن قالاسىنىڭ ق. ساتباەۆ اتىنداعى مەكتەبى, كەگەن اۋدانىنىڭ جاڭاباەۆ اتىنداعى, تالعار اۋدانىنىڭ ك.نۇرپەيىسوۆ اتىنداعى, №10, № 12 ورتا مەكتەپتەرى بار. قازىرگى ۋاقىتتا بارلىق 11 ءبىلىم بەرۋ نىساندارىندا دەمونتاج جانە سەيسميكالىق كۇشەيتۋ جۇمىستارى جۇرگىزىلىپ جاتىر.
«ورتا ءبىلىم بەرۋ كوميتەتى مەن مينيسترلىكتىڭ اۋماقتىق بولىمشەلەرى بىرلەسىپ مەكتەپتەردىڭ جاڭا وقۋ جىلىنا دايىندىق دەڭگەيىنە مونيتورينگ جۇرگىزدى. 11 ءبىلىم بەرۋ وبەكتىسىندە كەشەندى جوندەۋ جانە مەكتەپ اۋماعىن اباتتاندىرۋ بويىنشا جۇمىستار جۇرگىزىلىپ جاتىر. ولاردىڭ باسىم بولىگىندە جوندەۋ جۇمىستارى ماۋسىم ايىندا باستالعان ەدى. شارتقا سايكەس اياقتالۋ مەرزىمى 6 ايدان 11 ايعا دەيىن سوزىلۋى مۇمكىن, ياعني وقۋ جىلىنىڭ باسىندا مەكتەپتەر بالالاردى قابىلداۋعا دايىن بولمايدى. ءبىز ءبىلىم باسقارماسىمەن بىرلەسىپ وقۋ-تاربيە پروتسەسىن ۇيىمداستىرۋ ءۇشىن ءبىلىم الۋشىلاردىڭ ۋاقىتشا ورنالاسۋ ورىندارىن بەلگىلەدىك. ءوز كەزەگىندە مەردىگەر ۇيىمدار جوندەۋدى بەلگىلەنگەن مەرزىمنەن بۇرىن اياقتاۋعا دايىن», دەپ اتاپ ءوتتى ورتا ءبىلىم كوميتەتى باسقارماسىنىڭ باسشىسى گۇلنار تالاسباەۆا.
ورتا ءبىلىم كوميتەتىنىڭ ۇسىنىمدارى بويىنشا ءبىلىم باسقارماسى مەن مەكتەپتەر ءار ءبىلىم ورداسى بويىنشا موديفيكاتسيالاۋ جوسپارىن ازىرلەدى. ءبىلىم باسقارماسىنا جاقىن ورنالاسقان باسقا مەكتەپتەردىڭ جوبالىق قۋاتتىلىعىن ەسكەرە وتىرىپ, بارلىق وقۋشىلاردى وقىتۋمەن قامتاماسىز ەتۋ بويىنشا تاپسىرما بەرىلدى. سونداي-اق اتا-انالارمەن, پەداگوگيكالىق قوعامداستىقپەن اقپاراتتىق-ءتۇسىندىرۋ جۇمىستارىن جۇرگىزۋ, جۇمىستاردى بەلگىلەنگەن مەرزىمدە ساپالى اياقتاۋ, جوندەۋ جۇمىستارىنىڭ بارىسىن قاداعالايتىن مونيتورينگتىك جۇمىس توپتارىن قۇرۋ بويىنشا ۇسىنىستار بەرىلدى.
ايتا كەتۋ كەرەك, مينيسترلىك ەلىمىزدىڭ باسقا دا وڭىرلەرىندەگى ءبىلىم بەرۋ ۇيىمدارىندا مونيتورينگ جۇمىسىن جالعاستىراتىن بولادى.