قوستانايدا ءبىر توپ ادام اگروونەركاسىپ كەشەنىن دامىتۋعا بولىنگەن مەملەكەت قارجىسىن جىمقىردى دەگەن كۇدىككە ءىلىنىپ وتىر. اتالعان توپ 2022 جىلدان بەرى ەت ساتىپ الۋ تۋرالى جالعان مامىلە جاساسۋ ارقىلى 1,6 ملرد تەڭگەدەن استام مەملەكەت قارجىسىن جىمقىرىپ ۇلگەرگەن.
ۇيىمداسقان قىلمىستىق توپتى وڭىردەگى ءىرى ەت وڭدەۋ كاسىپورنىنىڭ ديرەكتورى باسقارعان. ونىڭ قۇرامىندا ەت كومبيناتىنىڭ قىزمەتكەرلەرى, شارۋا قوجالىقتارىنىڭ باسشىلارى, مال دارىگەرلەرى مەن شەنەۋنىكتەر بار. جەڭ ۇشىنان جالعاسقان الاياقتاردىڭ استىرتىن ارەكەتىن اشكەرەلەگەن قارجى مونيتورينگ اگەنتتىگىنىڭ مالىمەتىنشە, شارۋا قوجالىقتارى ەت وڭدەۋ زاۋىتىنا وزدەرىندە جوق مالدىڭ سالماعىن اسىرا كورسەتىپ وتكىزۋ ارقىلى سۋبسيديا الىپ كەلگەن. ودان تۇسكەن قىرۋار قارجىنى قىلمىستىق توپ مۇشەلەرى ءوزارا ءبولىسىپ الىپ وتىرعان.
«بۇگىنگە دەيىن اتالعان ۇيىمداسقان قىلمىستىق توپ مۇشەلەرىمەن سىبايلاسقان 50-دەن استام شارۋا قوجالىعى انىقتالدى. وسىعان وراي, الاياقتىق, ۇيىمداسقان توپ قۇرۋ جانە ونى باسقارۋ دەرەگى بويىنشا وندىرىسكە 17 قىلمىستىق ءىس تىركەلدى. توپ مۇشەلەرىنىڭ بانك ۇياشىقتارى مەن ەسەپشوتتارىندا جالپى كولەمى 3 ملن اقش دوللارىنان اسا شەتەلدىك جانە ۇلتتىق ۆاليۋتا تۇرىندەگى اقشا بار ەكەنى انىقتالدى. سوتقا دەيىنگى تەرگەۋ ءجۇرىپ جاتىر. بۇدان وزگە مالىمەتتەر قپك-ءنىڭ 201-بابىنا سايكەس جاريا ەتىلمەيدى», دەيدى قما رەسمي وكىلى الىبەك ءابدىلوۆ.
قىلمىسقا قاتىسى بار شارۋا قوجالىقتارىنىڭ باسشىلارى الدىن الا تەرگەۋ شارالارى بارىسىندا كىنالارىن مويىنداپ, مەملەكەتكە ءوز ەرىكتەرىمەن 62 ملن تەڭگەدەن استام قارجىنى قايتارىپ بەرگەن. ۇيىمداسقان قىلمىستىق توپتىڭ 5 بەلسەندى مۇشەسى قاماۋدا وتىر.