انيماتسيالىق ستۋديالاردىڭ ماماندارى مەن ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ جانە قازاق ۇلتتىق ونەر ۋنيۆەرسيتەتىنىڭ ستۋدەنتتەرى تۇركيانىڭ انكارا قالاسىندا شەبەرلىكتەرىن شىڭداپ, تاجىريبە جيناقتاپ ءجۇر. جوبا اياسىندا قازاقستان رەجيسسەرلەرى, پروديۋسەرلەر مەن سۋرەتشى-انيماتورلارى جەرگىلىكتى ارىپتەستەرىمەن تاجىريبە الماسىپ, پراكتيكالىق جۇمىستاردى بىرلەسە ورىندايدى. بىرنەشە كۇنگە جوسپارلانعان وقۋ اياسىندا تۇركيانىڭ تانىمال ماماندارىنىڭ قاتىسۋىمەن شەبەرلىك ساباقتارى دا وتەدى.
ەسكە سالساق, قازاقستاندىق ستۋديالار مادەنيەت جانە سپورت مينيسترلىگىنىڭ قولداۋىمەن تۇركىتىلدەس ەلدەرگە ورتاق ەجەلگى اڭىزدار جەلىسىمەن 10 پيلوتتىق انيماتسيالىق جوبانىڭ ءوندىرىسىن باستادى. انيماتسيالىق الماناحقا كىرەتىن ءار تۋىندىنىڭ حرونومەتراجى 5 مينۋتتان اسادى. بۇل جوبا تۇركىتىلدەس مەملەكەتتەر اراسىنداعى ىنتىماقتاستىقتى نىعايتىپ قانا قويماي, بولاشاقتا باۋىرلاس ەلدەرمەن بىرلەسكەن انيماتسيالىق جوبالار جاساۋعا مۇمكىندىك بەرەدى.
قازاقستان انيماتسيا ماماندارىنىڭ ەكىنشى توبى پولشاداعى Krakow Animation Center ورتالىعىندا تاجىريبە جيناقتاپ جاتىر. وقۋ بارىسىندا جەرگىلىكتى انيماتسيالىق ستۋديالاردىڭ جۇمىستارىن قاراپ, بالالارعا قىزىقتى تاقىرىپ تاڭداۋ, ستسەناري جازۋ شەبەرلىگى جانە ماركەتينگ بويىنشا بىلىكتىلىك ارتتىرادى.
«انيماتسيا سالاسى ۇنەمى وزگەرىپ, دامىپ وتىرادى. سول سەبەپتى وتاندىق مامانداردىڭ بىلىكتىلىگىن ارتتىرۋ وتە ماڭىزدى. بۇل تاجىريبە الماسۋ- مەن قاتار شەتەلدىك ستۋديالارمەن ىنتىماقتاستىق ورناتۋ ارقىلى جاڭا نارىقتارعا شىعىپ, كورەرمەندەر اۋديتورياسىن ۇلعايتۋدىڭ جاقسى مۇمكىندىگى. الداعى ۋاقىتتا الەمدەگى ەڭ تانىمال ستۋديالاردىڭ ماماندارىن تاجىريبە الماسۋ ءۇشىن ەلىمىزگە شاقىرۋدى دا جوسپارلاپ وتىرمىز», دەدى مادەنيەت جانە سپورت ۆيتسە-ءمينيسترى ارمان جۇدەباەۆ.