ۇلتتىق ۇلاننىڭ اقپاراتتىق-ناسيحات توبى شىعىس قازاقستان وبلىسىنا قاراستى شەمونايحا قالاسىنا جۇمىس ساپارىمەن باردى.
ۇگىت-ناسيحات توبىن باستاپ كەلگەن اسكەردىڭ باس تاربيەشىسى, گەنەرال-مايور قايرات ۇمبەتوۆ قالا ىرگەسىندە ورنالاسقان 6699 اسكەري بولىمىنە سوعىپ, ساربازداردىڭ جانە اسكەري ءبولىمنىڭ جاعدايىمەن تانىستى. ساپار بارىسىندا ۇلتتىق ۇلان ارداگەرلەرى, اۋعان جەرىندە قىزمەت ەتكەن جاۋىنگەرلەر, ساربازدار جانە وقۋشىلاردىڭ قاتىسۋىمەن ءىى دۇنيەجۇزىلىك سوعىس قۇرباندارىن ەسكە الۋعا ارنالعان مەموريالعا گۇل شوقتارىن قويۋ ءراسىمى ءوتتى. ءىس-شارا ەرلىكپەن قازا تاپقان باتىرلاردى 1 مينۋت ۇنسىزدىكپەن ەسكە الۋدان باستالدى.
«سۇراپىل سوعىس جىلدارى شەمونايحا اۋدانىنان مايدان دالاسىنا 8077 ادام اتتانىپ, ونىڭ 5312-ءسى مەرت بولعان. اۋدان تاريحىنا قاراپ وتىرساق, 2437 ادام ءىز-ءتۇسسىز جوعالىپ كەتكەن ەكەن. ولار ەل ىرگەسىن جاۋدان قورعاۋ ءۇشىن وققا كەۋدەلەرىن توستى. سوندىقتان ءبىز ساپارىمىزدى باتىر اتالارىمىزدىڭ رۋحىنا تاعزىم ەتىپ, «داڭق الاۋى» ەسكەرتكىشىنە گۇل شوعىن قويۋدان باستاعاندى ءجون كوردىك», دەدى ۇلتتىق ۇلان باس قولباسشىسىنىڭ تجاقج جونىندەگى ورىنباسارى.
سونداي-اق ول وڭىرلەردى ارالاۋداعى باستى ماقساتىن ايتىپ, اۋدان تۇرعىندارىنا ىشكى ىستەر ءمينيسترىنىڭ ورىنباسارى – ۇلتتىق ۇلان باس قولباسشىسى, گەنەرال-لەيتەنانت ەركىن بوتاقانوۆتىڭ سالەمىن جەتكىزدى. جيىندا اۋداندىق ينتەرناتسيوناليست-جاۋىنگەر ارداگەرلەر كەڭەسىنىڭ توراعاسى الەكساندر كريۆتسوۆ پەن اۋدان اكىمىنىڭ ورىنباسارى باقىتجان مولداحانوۆ ءسوز سويلەدى. ولار قۇرمەتتى قوناقتاردىڭ ارنايى اۋدان ورتالىعىنا اتباسىن بۇرعانىنا ريزاشىلىقتارىن ءبىلدىردى. «بۇگىنگى ءىس-شارا جاس ۇرپاقتىڭ بويىنداعى قازاقستاندىق ءپاتريوتيزمدى قالىپتاستىرۋعا ءسوزسىز اسەر ەتەرى انىق. ۇلتتىق ۇلان ەل تىنىشتىعىن ساقتاۋدا زور مانگە يە. وسى جولدا ابىرويلى قىزمەت ەتە بەرىڭىزدەر», دەدى اۋدان اكىمىنىڭ ورىنباسارى.
مەيماندار وسىدان سوڭ ەل اراسىندا «ماريانىڭ جارتاسى» اتالىپ كەتكەن جەرگە باردى. بۇل جەردە قوناقتاردى ولكەتانۋ مۋزەيىنىڭ وكىلى ناتاليا رۋداكوۆا قارسى الدى. مۇندا وڭ قولىن كەۋدەسىنە قويىپ, جارتاس جيەگىنەن تومەنگە قاراپ تۇرعان مۇڭدى قىزدىڭ ءمۇسىنى قويىلىپتى. مۋزەي قىزمەتكەرىنىڭ ايتۋىنشا, بۇل – شەمونايحالىق جازۋشى اناتولي يۆانوۆتىڭ «تەني يسچەزايۋت ۆ پولدەن» رومانىنداعى كەيىپكەر – ماريا ۆورونوۆانىڭ جيىنتىق وبرازى. وسىدان سوڭ ناتاليا يۋرەۆنا قوناقتاردى ولكەتانۋ مۋزەيىنە قويىلعان جادىگەرلەرمەن جانە اۋدان تاريحىمەن تانىستىردى.
ساپار بارىسىندا گەنەرال-مايور قايرات جارىلعاسىن ۇلى ۇلتتىق ۇلان ساپىندا كەلىسىمشارت بويىنشا قىزمەت ەتەتىن كوپ بالالى وتباسىمەن جولىقتى. بۇلدىرشىندەرگە ۇلتتىق ۇلاننىڭ باس قولباسشىسى اتىنان سىيلىق تابىستادى. ال كەشكىلىك اۋدان تۇرعىندارىنا ارنالعان كوشپەلى كونتسەرت ۇيىمداستىرىلدى. ساحنادا ۇلتتىق ۇلان ءان-بي ءانسامبلىنىڭ قىز-جىگىتتەرى ونەر كورسەتتى. ولار حالىق اندەرىنەن باستاپ, ەسترادالىق اندەرگە دەيىن ورىندادى. كورەرمەندەر دومبىرانىڭ كۇمبىرلەگەن ۇنىنە, مىڭ بۇرالعان بيشىلەردىڭ قيمىلىنا ءتانتى بولىپ, قوشەمەت ءبىلدىرىپ وتىردى. اۋەزدى ءان كورەرمەن جۇرەگىنە جەتكەنى سونشالىق, كوزىنە جاس الىپ, جۇرەك تەبىرەنىسىن جاسىرا الماعاندار دا بولدى.
«مەن كونتسەرت ءدال وسىنداي دارەجەدە بولادى دەپ كۇتپەگەن ەدىم. ماعان قاتتى ۇنادى. مەن وسى ءوڭىردىڭ تۋماسىمىن. بۇگىندە الماتى قالاسىندا تۇرىپ جاتىرمىن. دەمالىستى پايدالانىپ تۋعان جەرىمە كەلگەن ەدىم. وسىنداي تاماشا كەشكە تاپ بولدىم. انسامبل مۇشەلەرى وتە تالانتتى ەكەن. «ليۋبوۆ ۋستاۆشيح لەبەدەي» ءانىن ورىنداعان ساكەن الىمحانوۆقا ريزا بولدىم. مەن ونى ەلىمىزدىڭ ماقتانىشى ديماش قۇدايبەرگەنگە ۇقساتتىم. انگە ىلەسىپ, بي بيلەپ سەرگىپ قالدىق», دەدى اۋدان ورتالىعىنا قوناققا كەلگەن ولگا گريشەنكو.
كونتسەرت كەزىندە گەنەرال-مايور قايرات ۇمبەتوۆ شەمونايحا تۇرعىندارىن اۋداننىڭ 95 جىلدىق مەرەيتويىمەن قۇتتىقتاپ, ۇلتتىق ۇلاننىڭ جاۋىنگەرلىك قىزمەتى جايلى ءسوز قوزعادى. سونداي-اق اۋدان اكىمدىگىنە ارنايى اكەلگەن ەستەلىك سىيلىقتارىن تابىستادى.