تىيىم سالىنعان جەرلەردە شومىلعان ەكى ادام مەنينگيتكە شالدىققان

بريفينگ بارىسىندا استانادا سۋعا ءتۇسۋ ماۋسىمى باستالعالى بەلگىسىز جەرلەردە شومىلعاننان كەيىن سەروزدى مەنينگيت جۇقتىرۋدىڭ ەكى جاعدايى انىقتالعانى بەلگىلى بولدى. سارحات بەيسەنوۆانىڭ ايتۋىنشا, سۋبۇرقاقتار مەن سۋعا تۇسۋگە ارنالماعان ورىنداردا شومىلۋ كەزىندە ادام ەنتەروۆيرۋس ينفەكتسياسىن جۇقتىرۋى مۇمكىن. «شومىلۋ ماۋسىمى باستالعالى بەرى ەنتەروۆيرۋستى ينفەكتسيامەن سىرقاتتانۋشىلىق ءوستى. بىلتىرعى ستاتيستيكامەن سالىستىرعاندا اۋرۋشاڭدىق 19%-عا ارتىپ, 100 مىڭ حالىققا شاققانداعى كورسەتكىش 2022 جىلعى 43,1-گە قارسى 53,2 بولدى. بۇل ينفەكتسياعا 4 جاسقا دەيىنگى بالالار كوبىرەك بەيىم بولاتىنىن دا ەسكەرۋ قاجەت», دەدى سارحات بەيسەنوۆا.

ەلوردانىڭ باس سانيتار دارىگەرى ەنتەروۆيرۋستىڭ جىلى سۋدىڭ بەتىندە كوبەيەتىنىن قوسا ايتتى.

«جاز مەزگىلىندە تەك رۇقسات ەتىلگەن ورىندار مەن باسسەيندەردە سۋعا شومىلۋعا بولاتىنىن, باسقا ەشبىر جاعدايدا سۋبۇرقاقتارعا تۇسۋگە بولمايتىنىن ۇنەمى قايتالاپ ايتامىز. بىرقاتار ۆيرۋستىق ينفەكتسيالار, اسىرەسە ەنتەروۆيرۋستار اشىق سۋ ايدىندارى مەن سۋبۇرقاقتاردا تەز كوبەيەدى. بەلگىلەنبەگەن جەرلەردە شومىلۋ كەزىندە بۇل ۆيرۋستى جۇقتىرۋ قاۋپى وتە جوعارى. سونىمەن قاتار باسقا دا ۆيرۋستىق ينفەكتسيالار, اتيت ا سياقتى ينفەكتسيالاردى جۇقتىرۋ قاۋپى بار», دەپ تۇيىندەدى سپيكەر.