استانادا جەكەمەنشىك جاتاقحانادان شىققان ءورت ءسوندىرىلىپ, 60 ادام ەۆاكۋاتسيالاندى, دەپ حابارلايدى Egemen.kz توتەنشە جاعدايلار مينيسترلىگىنىڭ Telegram پاراقشاسىنا سىلتەمە جاساپ.
23 شىلدە كۇنى ساعات 21.57-دە استانا قالاسى توتەنشە جاعدايلار دەپارتامەنتىنىڭ ءورت ءسوندىرۋ بولىمشەلەرى كوكتال اۋدانىندا جاتاقحانا جانىپ جاتقانى تۋرالى حابارلاما الىپ, وقيعا ورنىنا جەتتى. ءورت 2-قاباتتاعى بولمەدە 20 شارشى مەتر اۋماقتا شىققان. ءتىلسىز جاۋ تەز تارالىپ, ءورت سوندىرۋشىلەر قويۋ ءتۇتىن اراسىندا جۇمىس ىستەگەن.
ەلوردالىق ءورت سوندىرۋشىلەردىڭ كۇشىمەن ءيىندى ءۇش كوتەرگىش ارقىلى 2 ادام قۇتقارىلدى, 60 تۇرعىن ەۆاكۋاتسيالاندى. تۇرعىنداردى ورنالاستىرۋ ماسەلەسىن جاتاقحانا يەسى شەشەدى.
تجد كۇشتەرىمەن ءتىلسىز جاۋ ساعات 22.28-دە وقشاۋلانىپ, 22.48-دە سوندىرىلگەن.
زارداپ شەككەندەر مەن قازا بولعاندار تىركەلمەگەن.