استانادا قالا كەلبەتىن ديزاين-كودقا سايكەستەندىرۋ جۇمىسى قارقىندى ءجۇرىپ جاتىر. بۇگىنگى تاڭدا 1500-دەن استام زاڭسىز ىلىنگەن ماڭدايشا مەن جارناما بانەرى شەشىلدى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
بۇعان 2019 جىلى جەلتوقسان ايىندا قالا ماسليحاتىمەن بەكىتىلگەن ديزاين-كود نەگىز بولعان. الايدا پاندەميا باستالىپ جۇمىس كەيىنگە شەگەرىلگەن ەدى. ال 2023 جىلدىڭ 4 ساۋىرىندە استانا قالاسىن دامىتۋ ماسەلەلەرى جونىندەگى كەڭەستە پرەزيدەنت ق.توقاەۆ كوشە جارناماسىن ورنالاستىرۋعا قويىلاتىن تالاپتاردىڭ ساقتالۋىن باقىلاۋدى كۇشەيتۋ تۋرالى ناقتى تاپسىرما بەرگەن.
جاۋاپتى مىندەت «استانا-جارناما» كوممۋنالدىق مەملەكەتتىك مەكەمەسىنە جۇكتەلدى. قازىرگى ۋاقىتتا عيماراتتاردىڭ نەمەسە قۇرىلىستاردىڭ قاسبەتىنە ماڭدايشالاردى ورنالاستىرۋ تۇجىرىمداماسى ازىرلەندى. وندا بيزنەس وكىلدەرىنە ەلوردانىڭ ساۋلەتتىك ءسانىن ءبىر ستيلگە كەلتىرۋدىڭ ۇلگىسى كورسەتىلگەن. ۋربانيستيكا ورتالىعى مەن اكىمدىك قىزمەتكەرلەرى ءار اۋداننىڭ كاسىپكەرلەرىمەن كەزدەسۋ ۇيىمداستىرىپ, تۇجىرىمدامانى تالقىلادى.
«ماڭدايشالار قاسبەتتىڭ نەگىزگى فريزىنەن ەرەكشەلەنەتىن فونسىز (سۋبستراتسىز) بولۋى كەرەك. نەگىزگى جازۋ فريز بيىكتىگىنىڭ 70%-ىنان اسپاۋى ءتيىس. بارلىق بەلگىلەر قاسبەتتىڭ ءبىر سىزىعىندا بولۋى كەرەك جانە قاجەت بولعان جاعدايدا قاسبەتتىڭ ستيلىنە بەيىمدەلۋى شارت. بەلگىلەردە مونوحرومدى جانە ءۇنسىز تۇستەردى قولدانعان ءجون. بەلگىلى ءبىر جاعدايلاردا, بەلگىنىڭ تەحنيكالىق كۇردەلىلىگى رەتىندە, ءفريزدىڭ تۇسىنە نەمەسە قۇرىلىمىنا ۇقساس فوندىق سۋبستراتقا رۇقسات ەتىلەدى. بۇل جاعدايدا فريز نەمەسە قاسبەت بولىگى باستاپقىدا جىكسىز بولۋى كەرەك. ماڭدايشالاردى جالپى سيممەتريانى, قاسبەتتىڭ ۆيزۋالدى قابىلداۋىنىڭ تۇتاستىعىن بۇزبايتىنداي ەتىپ ورنالاستىرۋى ءتيىس. بەلگى عيماراتتىڭ ارحيتەكتۋرالىق ەلەمەنتتەرىمەن قاباتتاسپاعان ءجون», دەدى «استانا-جارناما» مكم باسشىسى اسىلبەك تولەمىس ۇلى.
بۇگىنگى تاڭدا «استانا-جارناما» مكم ماماندارى جۇمىس ءتارتىبىن بەكىتكەن. الدىمەن م ۇلىك يەلەرىنىڭ بىرلەستىگىن ەسكەرتەدى. ولار ءوز كەزەگىندە شاعىن جانە ورتا بيزنەس وكىلدەرىنە حابارلاما تاراتادى. ەگەردە كاسىپكەر ماڭدايشانى نەمەسە جارنامانى شەشۋگە كۇشى جەتپەسە اۋداندىق اكىمدىك جۇمىسشىلارى جىبەرىلەدى.
ءبىرىنشى كەزەكتەگى جۇمىس ەلوردانىڭ ورتالىق كوشەلەرىنەن, اتاپ ايتقاندا ب.مومىش ۇلى داڭعىلىنان, №2 ۇيدەن, رەسپۋبليكا داڭعىلىنان, №5 ۇيدەن باستالدى. اپتا سايىن ءۇي-جايلاردىڭ يەلەرىمەن بەيبەرەكەت ورنالاستىرىلعان جارنامانى اۋىستىرۋ جايىندا كەزدەسۋلەر جانە ءتۇسىندىرۋ جۇمىسى جۇرگىزىلۋدە.
ماسەلەن, «كوركەم» تۇرعىن ءۇي كەشەنىنىڭ قاسبەتى جىلدام رەتكە كەلتىرىلدى. ويتكەنى كاسىپكەرلەر ءبىر اۋىزدان قولداۋ بىلدىرگەن. ءدال سول سياقتى الماتى كوشەسىنىڭ بويىنداعى «ايسانام» جانە «اقجايىق» تك سىرتى كەلبەتى دە كوز تارتادى.