بىرقاتار قاراعاندىلىق كەنشى قونىستويىن اتاپ وتەدى. وبلىس اكىمدىگى «وتباسى بانكىمەن» بىرلەسىپ, ۇستەمەسى جەڭىلدەتىلگەن يپوتەكانى ەڭبەككەرلەرگە ۇلەستىرۋدى بىلتىر جولعا قويعان-تىن. بۇل جولى يگى باستاماعا «شۇباركول كومىر» كومىر ءوندىرۋشى كومپانياسى قوسىلىپ, ءوز قىزمەتكەرلەرىنىڭ باسپانا ماسەلەسىن شەشۋگە سەپتىگىن تيگىزىپ وتىر.
تۇرعىن ءۇي سەرتيفيكاتتارىن تاپسىرۋ راسىمىنە قاراعاندى وبلىسىنىڭ اكىمى ەرماعانبەت بولەكپاەۆ, «وتباسى بانك» اق باسقارما ءتورايىمى ءلاززات يبراگيموۆا جانە ERG ديرەكتورلار كەڭەسىنىڭ مۇشەسى شۋحرات يبراگيموۆ قاتىستى.
– ىنتىماقتاستىق ءۇشىن «وتباسى بانكىنە» العىس ايتامىز. اكىمدىك تاراپىنان ءبىز ۇدايى وسىنداي پايدالى باعدارلامالاردى تۇراقتى قولدايتىن بولامىز. تۇرعىن ءۇي – ەڭ وزەكتى ءارى ەڭ ماڭىزدى ماسەلە. بۇل باستاما كەنشىلەرىمىز ءۇشىن زور قۋانىش دەسەك تە بولادى. باسپانا تاڭداۋشىلارعا الدىمەن اسىقپاۋعا كەڭەس بەرەمىن, بۇگىندە پاتەرلەردىڭ تاڭداۋى كەڭ. بيىلدىڭ وزىندە 800 شارشى مەتردى قۇرايتىن تۇرعىن ءۇي قاتارى سالىنىپ جاتىر. باستاپقى نارىق باعامى دا قولجەتىمدى بولىپ وتىر, – دەپ اتاپ ءوتتى ە.بولەكپاەۆ.
بانك باسشىسى ءلاززات يبراگيموۆا اتالعان ءوندىرىس كومپانياسىمەن ۇنەمى ىنتىماقتاستىق بايلانىستا ەكەنىن ايتتى.
– بۇل باعدارلامانىڭ باستى ارتىقشىلىعى – باستاپقى جارناسى 10 پايىزدى قۇراسا, جىلدىق تولەم مولشەرلەمەسى – 5 پايىز. البەتتە, ءوز ءومىرىن ءوندىرىس سالاسىنا ارناعان جاس ماماندار ءۇشىن وتە قولايلى. ءبىز ERG-مەن ءبىرىنشى جىل جۇمىس ىستەپ وتىرعان جوقپىز, وسىنداي ىنتىماقتاستىقتىڭ ناتيجەسى جۇزدەگەن كەنشىلەرگە قۋانىش سىيلايدى. ءارى قاراي وسىنداي جۇمىستاردى جۇزەگە اسىرا بەرەمىز, – دەيدى ل.يبراگيموۆا.
باعدارلاما 5 جىلعا جوسپارلانعان. نەسيەنىڭ ەڭ جوعارعى سوماسى – 20 ملن تەڭگە شاماسىندا. تۇرعىن ۇيگە مۇقتاج قىزمەتكەرلەردىڭ ءتىزىمىن «شۇباركول كومىر» اكتسيونەرلىك قوعامى ازىرلەيدى. جىل سوڭىنا دەيىن كاسىپورىننىڭ 60-قا جۋىق قىزمەتكەرى جەڭىلدەتىلگەن يپوتەكانى كادەسىنە جاراتپاق ەكەن.
ەڭبەككەرلەردىڭ باسپانالى بولۋى ءۇشىن وبلىستىق بيۋدجەتتەن 400 ملن تەڭگە بولىنگەن. تاعى 300 ملن تەڭگەنى «وتباسى بانك» جانە 400 ملن تەڭگەنى ەۋرازيالىق توپ (ERG – Eurasian Resources Group) جاۋاپكەرشىلىگى شەكتەۋلى سەرىكتەستىگى ينۆەستيتسيالايدى.
ەۋرازيالىق توپ تاريحى 1994 جىلدان باستاۋ الادى. كومپانيا اكتسيونەرلەرى وسى كەزەڭدە ەل اۋماعىندا العاشقى اكتيۆتەرىن ساتىپ العان. سودان بەرگى ۋاقىتتا ERG پايدالى قازبالاردى ءوندىرۋ جانە وڭدەۋ سالاسىندا ارتاراپتاندىرىلعان جەتەكشى كومپانيالاردىڭ بىرىنە اينالىپ ۇلگەردى. اتالعان كومپانيا باسقا وڭىرلەردە دە وسىنداي تۇرعىن ءۇي باعدارلاماسىن قولداپ ءجۇر. ش.يبراگيموۆتىڭ ايتۋىنشا, ەكى جىل ىشىندە كومپانيا جۇمىسكەرلەرىنە 600 پاتەردىڭ كىلتىن تابىستاپتى.
– سەرتيفيكاتتاردى تاپسىرۋ كاسىبي مەرەكە – مەتاللۋرگتەر كۇنىنە تۇسپا-تۇس كەلگەنى قۋانتادى. اكتسيونەرلەر مەن كومپانيا باسشىلىعىنىڭ اتىنان كاسىپورىندى دامىتۋ جولىندا جاساعان بارلىق جۇمىس ءۇشىن اقجارما العىسىمدى جەتكىزگىم كەلەدى. سىزدەرگە زور دەنساۋلىق, باياندى باقىت تىلەيمىن, – دەپ ش.يبراگيموۆ كاسىبي مەرەكەمەن جانە الداعى قونىستويىمەن قۇتتىقتادى.
«شۇباركول كومىر» كاسىپورنىنداعى ەڭبەك ءوتىلى 22 جىلعا تولعان ەلميرا قۇلمەتوۆا 15 جاستاعى ۇلىن جالعىز ءوزى تاربيەلەپ وتىر. جاقىندا باسپانالى بولامىز دەپ قۋانىش قۇشاعىندا ءجۇر.
– مەن قازىر ورتالىق قويمانىڭ قويماشىسى بولىپ جۇمىس ىستەيمىن. وسى ۋاقىتقا دەيىن اتا-اناممەن بىرگە تۇرىپ كەلدىك. جەكە پاتەر ساتىپ الۋعا مۇمكىندىك بولمادى. وسى باعدارلاماعا ۇيىتقى بولعاندارعا ۇلكەن راحمەتىمدى ايتامىن. ەندى ۇلىم ەكەۋمىزدىڭ ءوز باسپانامىز بولادى. ول كاسىپتىك-تەحنيكالىق كوللەدجگە تۇسپەكشى. باسپانا – باستى ماسەلە. بۇل – جاس كەنشىلەر وتباسىلارىن قولداۋعا, ءوندىرىس سالاسىن وركەندەتۋگە, كەنىش وشاقتارىنا كانىگى مامانداردى تارتۋعا ىقپال ەتەتىن وتە ءتيىمدى باعدارلاما. ءبىز ءوندىرىس ادامدارى رەتىندە كورسەتىلگەن قولداۋعا وتە ريزامىز, – دەيدى ە.قۇلمەتوۆا.
ينجەنەر-تەحنولوگ نۇرسۇلتان بادان كاسىپورىندا 6 جىلعا جۋىق جۇمىس ىستەيدى. بۇعان دەيىن قاراعايلى اۋىلىندا اتا-اناسىمەن بىرگە تۇرىپ كەلگەن. ءوزىنىڭ جەكە ءۇيىن كوپتەن ارمانداعان ەكەن.
– قاراعاندى تەحنيكالىق ۋنيۆەرسيتەتىن ءتامامداپ, بىردەن «شۇباركول كومىر» كومپانياسىنا جۇمىسقا تۇردىم. بۇل جەردە ەڭبەك ەتىپ, ءوسىپ-ونگىم كەلدى. ءارى تۇرعىن ءۇي سەرتيفيكاتتارى بەرىلەتىنىن ءبىلىپ, بىردەن قاتىسۋعا شەشىم قابىلدادىم. باعىمىز جانىپ, تاپسىرعان ءوتىنىشىم ماقۇلدانىپتى. ەندى مەن ەكى بولمەلى پاتەر ساتىپ الا الامىن. وتباسىما قولايلى جەردى دە قاراستىرىپ قويدىق, – دەپ اعىنان جارىلدى 28 جاستاعى تەحنولوگ.
قاراعاندى وبلىسىندا كەنشىلەر مەن مەتاللۋرگتەر ءۇشىن جەڭىلدەتىلگەن يپوتەكا وتكەن جىلى باستالعان. بىلتىر باعدارلاما يگىلىگى ارقىلى 134 وتباسى باسپانالى بولدى. جەڭىلدەتىلگەن يپوتەكانى ساران, اباي, شاحتينسك جانە تەمىرتاۋ سىندى قاناتتاس قالالاردان دا الۋ مۇمكىندىگى قاراستىرىلىپ جاتىر. يپوتەكاعا قاتىسۋشىلاردى ىرىكتەگەننەن كەيىن قۇجاتتار بانككە جولدانادى. بيىل 75 وتباسى ءۇي الادى دەپ جوسپارلانىپ وتىر.
قاسىمحان عالىم,
«Egemen Qazaqstan»