فۋتبولدان ۋەفا كونفەرەنتسيا ليگاسىنىڭ ىرىكتەۋ كەزەڭىندە باق سىناپ جاتقان قوستانايدىڭ «توبىلى» ەۋروكۋبوك دوداسىن جەڭىسپەن باستادى. بىلتىرعى ەل چەمپيوناتىندا قولا جۇلدەگەر اتانعان «توبىل» ىرىكتەۋدىڭ العاشقى اينالىمىندا فينليانديانىڭ ورتا دەڭگەيلى ۇجىمدارىنىڭ ءبىرى «حونكا» كومانداسىمەن كەزدەسىپ, اسا تارتىستى وتكەن باسەكەدە جەرگىلىكتى جانكۇيەرلەردى جەڭىسىمەن قۋانتتى.
ەۋروكۋبوك ويىندارىنىڭ تاريحىنا كوز جۇگىرتسەك, فينليانديا كوماندالارى – قازاقستان كلۋبتارىنا ەڭ ىڭعايسىز قارسىلاس. ماسەلەن, ەلىمىزدىڭ جەتى دۇركىن چەمپيونى «استانا» بۇگىنگە دەيىن سكانديناۆيالىق ۇجىم وكىلدەرىمەن وتكەن ەكى ويىننىڭ بىرىندە جەڭىسكە جەتىپ, ەكىنشىسىندە جەڭىلىپ قالعان بولاتىن. چەمپيوندار ليگاسىنىڭ 2015-2016 جىلعى ماۋسىمىنىڭ ءۇشىنشى كەزەڭىندە «استانا» فينليانديانىڭ ازۋلى ۇجىمى حيك كلۋبىمەن كەزدەسىپ, ەكى ويىننىڭ ناتيجەسى بويىنشا 4:3 ەسەبىمەن كەلەسى كەزەڭگە وتسە, ەكى جىل بۇرىن كۋپس كلۋبىنا 4:5 ەسەبىمەن جول بەرگەن ەدى.
ىرگەتاسى 1957 جىلى قالانعان «حونكا» كومانداسى ەۋروكۋبوك باسەكەلەرىندە تاجىريبەلى كلۋب سانالماسا دا, قوستانايدا وتكەن ويىندا الاڭ قوجايىندارىن ابدەن ابىگەرگە سالدى. بىلتىر ءوز ەلدەرىنىڭ چەمپيوناتىندا قولا جۇلدە يەلەنگەن ەكى ۇجىم اراسىنداعى كەزدەسۋدى «توبىل» فۋتبولشىلارى بەلسەندى باستاعانىمەن, العاشقى گولدى قوناق كوماندانىڭ ويىنشىلارى سوعىپ كەتتى.
ءبىرىنشى تايمنىڭ 39-مينۋتىندا لۋكاس كاۋفماننىڭ الىس باعىتتاعان سوققىسىنىڭ الدىندا «توبىل» كومانداسىنىڭ قورعاۋشىلارى دا, قاقپاشىسى دا دارمەنسىزدىك تانىتىپ, گول وتكىزىپ الدى. ءسويتىپ, «حونكا» فۋتبولشىلارى ۇزىلىسكە كوتەرىڭكى كوڭىل كۇيدە اتتاندى. دەگەنمەن العاشقى 45 مينۋتتا «توبىل» فۋتبولشىلارى قارسىلاستارىنا قاراعاندا قاۋىپتى شابۋىلدى كوپ ۇيىمداستىرعانىمەن, بىردە-ءبىر مۇمكىندىكتەرىن گولعا اينالدىرا المادى.
ءۇزىلىس ۋاقىتىندا باس باپكەر ميليچ چۋرچيچتەن قاجەتتى اقىل-كەڭەستى تىڭداپ شىققان الاڭ يەلەرى ەكىنشى تايمدى وتە قارىندى باستاپ, قارسىلاستارىنىڭ قاقپاسىنا جاۋاپسىز ەكى گول سوعىپ, تاماشا كامبەك جاسادى. الدىمەن ويىننىڭ 62-مينۋتىندا شابۋىلشى ميليان ۆۋكادينوۆيچ «حونكا» قاقپاسىنىڭ الىس بۇرىشىن ءدال كوزدەپ, تارازى باسىن تەڭەستىردى. سوعىلعان گولدان كەيىن قوستانايداعى ورتالىق ستاديونعا جينالعان جانكۇيەرلەر دە, «توبىل» فۋتبولشىلارى دا رۋحتانىپ, شابۋىلدارىن ەكى ەسە كۇشەيتتى. ناتيجەسىندە, ەكىنشى گول دا كوپ كۇتتىرگەن جوق. ماتچتىڭ 75-مينۋتىندا «حونكا» كلۋبىنىڭ قورعاۋشىلارى مەن قاقپاشىسى ءوز ايىپ الاڭىندا پاس الماسۋ كەزىندە ءبىر-ءبىرىن تۇسىنبەي, دوپتان ايىرىلىپ قالدى. ۇرىمتال تۇستى ميليان ۆۋكادينوۆيچ ءساتتى پايدالانىپ, ءدۋبلدىڭ اۆتورى اتاندى. وسىلايشا, ەكى ۇجىم اراسىنداعى العاشقى كەزدەسۋ 2:1 ەسەبىمەن قوستانايلىقتاردىڭ پايداسىنا اياقتالدى.
«توبىل» مەن «حونكا» اراسىنداعى قارىمتا ماتچ 20 شىلدەدە فينليانديادا وتەدى. ەگەر جاۋاپ باسەكەسىندە جەرلەستەرىمىز جەڭىسكە جەتىپ نەمەسە تەڭ ناتيجەگە قول جەتكىزەتىن بولسا, كونفەرەنتسيا ليگاسىنىڭ ەكىنشى اينالىمىنا جولداما الادى. ال بۇل كەزەڭدە «توبىل» شۆەيتساريانىڭ «بازەل» كلۋبىمەن كەزدەسۋى مۇمكىن.
سونداي-اق كونفەرەنتسيا ليگاسىنىڭ ەكىنشى ىرىكتەۋ كەزەڭىندە بىلتىرعى ەل چەمپيوناتىنىڭ كۇمىس جۇلدەگەرى «اقتوبە» مەن قازاقستان كۋبوگىنىڭ يەگەرى «ورداباسى» كلۋبتارى ونەر كورسەتەدى. شىمكەنتتىك ۇجىم 27 شىلدەدە ءوز الاڭىندا ۆارشاۆانىڭ «لەگياسىن» قابىلداسا, «اقتوبە» «تورپەدو» (كۋتايسي) – «ساراەۆو» (بوسنيا جانە گەرتسەگوۆينا) جۇبىنىڭ جەڭىمپازىمەن كەزدەسەدى.