مەملەكەتتىك كەڭەسشى ەرلان قاريننىڭ توراعالىعىمەن 2023 جىلعى قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا جانە ا.بايتۇرسىن ۇلى اتىنداعى گۋمانيتارلىق عىلىمدار سالاسىنداعى مەملەكەتتىك سىيلىقتارىن بەرۋ جونىندەگى كوميسسيانىڭ وتىرىسى ءوتتى. ونىڭ قورىتىندىسى بويىنشا الدىن الا ىرىكتەۋدەن وتكەن جۇمىستاردىڭ ءتىزىمى بەلگىلى بولدى.
كوميسسيا مۇشەلەرى مەملەكەتتىك سىيلىقتى الۋعا ۇسىنىلعان 13 جۇمىستى قاراپ, مەملەكەتتىك عىلىمي-تەحنيكالىق ساراپتامانىڭ ناتيجەلەرىمەن جانە ءتورت سەكتسيانىڭ ساراپتامالىق-تالدامالىق ۇسىنىستارىمەن تانىستى. كوميسسيا وتىرىسىنىڭ قورىتىندىسى بويىنشا الدىن الا ىرىكتەۋدەن وتكەن جۇمىستاردىڭ ءتىزىمى كەڭىنەن تالقىلاۋ ماقساتىندا كوپشىلىك نازارىنا ۇسىنىلدى. ەندى ىرىكتەۋدەن وتكەن جۇمىستارعا از-كەم توقتالىپ وتەيىك.
وسپانوۆ اتىنداعى باتىس قازاقستان مەديتسينا ۋنيۆەرسيتەتى «رەپرودۋكتيۆتى دەنساۋلىقتى قورعاۋدىڭ يننوۆاتسيالىق تەحنولوگيالارى» جۇمىسىن ۇسىنىپ وتىر. وعان ارىستان مامىرباەۆ جەتەكشىلىك ەتەدى. اۆتورلاردىڭ قاتارىندا ەربول بەكمۇحامبەتوۆ, تيمۋر جاركەنوۆ, مارات ىزتىلەۋوۆ, اقىلبەك تۇسىپقاليەۆ بار.
كەلەسى جۇمىستى «جالىن» عىلىمي ءوندىرىس-تەحنيكالىق ورتالىعى» جاۋاپكەرشىلىگى شەكتەۋلى سەرىكتەستىگى ۇسىنعان. جوبانىڭ اتاۋى – «وسىمدىك تالشىعىنان جاڭا وتاندىق تۇپنۇسقا مەديتسينالىق پرەپاراتتاردى ءوندىرۋدى ۇيىمداستىرۋ جانە دامىتۋ». سەستاگەر اقنازاروۆ جەتەكشىلىك ەتەتىن جۇمىس اۆتورلارىنىڭ قاتارىندا ماحمۇت بيسەنباەۆ, سۇلتان تولەۋحانوۆ, شولپان تولەيباەۆا بار.
«ينفەكتسياعا قارسى پرەپاراتتار عىلىمي ورتالىعى» اكتسيونەرلىك قوعامى دا مەملەكەتتىك سىيلىقتان ءۇمىتتى. ورتالىق «مۋلتيرەزيستەنتتى تۋبەركۋلەزدى ەمدەۋگە ارنالعان فس-1 يننوۆاتسيالىق دارىلىك پرەپاراتى» جۇمىسىن ۇسىنىپ وتىر. وعان الەكساندر يلين جەتەكشىلىك ەتەدى. اۆتورلار توبىنىڭ قۇرامى كەلەسىدەي: گۇلشارا احمەتوۆا, ۆياچەسلاۆ دۋدنيك, رينات يسلاموۆ, باقىتجان كەريمجانوۆا, يليا كوروتەتسكي, اندرەي كۋرباتوۆ, گۋلنارا يۋلداشەۆا.
پرەزيدەنت ءىس باسقارماسى مەديتسينالىق oرتالىعىنىڭ اۋرۋحاناسى «قازاقستان رەسپۋبليكاسىنداعى بارياتريالىق جانە مەتابوليكالىق حيرۋرگيانىڭ كونتسەپتۋالدى رەينجينيرينگىن ازىرلەۋ جانە ەنگىزۋ – مۋلتيديستسيپلينارلىق كوزقاراس» جۇمىسىن ۇكىلەپ بايگەگە قوستى. ونىڭ اۆتورلارىنىڭ قۇرامىندا ورال وسپانوۆ (جەتەكشى), ناسرۋللا شانازاروۆ, باقىتجان بيىمبەتوۆ, ۆالەري بەنبەرين, الەكسەي تسوي, رۋستام الباەۆ, تامارا ۆوششەنكوۆا بار.
ەلىمىزدىڭ ۇلتتىق يادرولىق ورتالىعى «قازاقستان رەسپۋبليكاسىنىڭ اتوم-ەنەرگەتيكا سالاسىن قۇرۋعا جانە كومىرتەگى بەيتاراپتىعىنا قول جەتكىزۋ ستراتەگياسىن ىسكە اسىرۋعا ارنالعان الەمدىك دەڭگەيدەگى زەرتتەۋلەر مەن ازىرلەمەلەر» جۇمىسىمەن دوداعا ءتۇسىپ وتىر. وعان ەرلان باتىربەكوۆ جەتەكشىلىك ەتەدى. اۆتورلار قۇرامى كەلەسىدەي: ۆيكتور باكلانوۆ, ۆلاديمير ۆيتيۋك, دەنيس زارۆا, ەربولات قويانباەۆ, ءماجىن سقاقوۆ, يرينا تاجىباەۆا, باۋىرجان شەكتىباەۆ.
كەلەسى جۇمىس «تەحنيكالىق ماماندىقتاردا وقيتىن قازاق مەكتەپتەرىن بىتىرگەندەرگە قاجەت تەرمينولوگيانى قالىپتاستىرۋ جانە وقۋ قۇرالدارىن قۇراستىرۋدى دامىتۋ (ەنەرگەتيكا سالاسىندا)» دەپ اتالادى. ونى عۇماربەك داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى ۇسىنعان. اۆتورلىق توپ ەكى ادامنان تۇرادى – بىرلەسبەك الياروۆ (جەتەكشى) جانە ءمادينا الياروۆا.
يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ كوميتەتىنە قاراستى مينەرالدىق شيكىزاتتى كەشەندى قايتا وڭدەۋ جونىندەگى ۇلتتىق ورتالىقتىڭ فيليالى – د.ا.قوناەۆ اتىنداعى تاۋ-كەن ىستەرى ينستيتۋتى دا باق سىناپ جاتىر. بۇل ۇيىمنىڭ ۇسىنعان جۇمىسى – «قازاقستاننىڭ تاۋ-كەن ءوندىرۋ سالاسىنداعى كاسىپورىندارىنىڭ جۇمىسىن تسيفرلىق تەحنولوگيالاردى ونەركاسىپتىك يگەرۋ بازاسىندا جوعارى ءتيىمدى قامتاماسىز ەتۋ». جۇمىسقا ءلاززات شامعانوۆا جەتەكشىلىك ەتەدى. اۆتورلار قۇرامى: امينيام بالتيەۆا, سەيتقالي عاليەۆ, ۆلاديمير ماحونين, ەۆگەني شابەلنيكوۆ, نۇرمۇحامبەت ابدىبەكوۆ, اناتولي سامسونەنكو, نۇرلان تەمىربەكوۆ.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى «ۇلتتىق ساناداعى مەملەكەتشىلدىك پەن بىرەگەيلىك: تاريحي جانە ادەبي زەرتتەۋلەر» اتتى عىلىمي ەڭبەكتەر تسيكلىن ۇسىندى. اۆتورلار قۇرامىندا مامبەت قويگەلديەۆ, تۇرسىن جۇرتباي, ەرلان سىدىقوۆ, ديحان قامزابەك ۇلى بار.
ەسكە سالا كەتەيىك, اتالعان جۇمىستار تۋرالى قوسىمشا اقپارات عىلىم جانە جوعارى ءبىلىم مينيسترلىگى عىلىم كوميتەتىنىڭ سايتىندا ورنالاستىرىلعان. اتالعان عىلىمي جۇمىستارمەن سول جەردەن ەگجەي-تەگجەيلى تانىسۋعا بولادى.