تارتىس تبيليسيدە جالعاسادى

بيىل ەلوردالىق ۇجىمنىڭ ەۋرو­كۋبوك باسەكەلەرىنە ۇزدىكسىز قاتىسىپ كەلە جاتقانىنا تۋرا 10 جىل تولدى. ەڭ العاش ەۋرودودا ويىندارىن 2013-2014 جىلعى ەۋروپا ليگاسىنىڭ ىرىك­تەۋ كەزەڭىنەن باستاپ, العاشقى ۇمتى­لىسىندا-اق ساتسىزدىككە ۇشىراسا دا, «استانا» كلۋبى كەيىننەن ءبىر مارتە چەمپيوندار ليگاسىنىڭ, ءتورت رەت ەۋروپا ليگاسىنىڭ توپتىق كەزەڭىندە باق سىنادى. وسى ۋاقىت ارالىعىندا ەلورداعا اعىلشىننىڭ «مانچەستەر يۋنايتەد», يسپانيانىڭ «اتلەتيكو مادريد», فران­تسيانىڭ «رەنن», ۋكراينانىڭ «دينا­مو», «كيەۆ», پورتۋگاليانىڭ «سپورتينگ» جانە ەۋروپانىڭ تاعى باسقا دا ازۋلى  كوماندالارى كەلدى. وسى كوماندالارمەن وتكەن ويىنداردىڭ كوبىندە «استانا» كلۋبى قارسىلاستارىنان باسىم ءتۇسىپ, «استانا ارەناعا» جينالعان فۋتبول جانكۇيەرلەرىن قۋانىش پەن شاتتىققا بولەگەن ەدى.

«استانانىڭ» سول كەزدەگى تابىستارىنا ءوز ۇلەسىن قوسىپ, باپكەرلىك قۇرامدا بولعان گريگوري بابايان بىلتىردان باستاپ كوماندا تىزگىنىن قولىنا الىپ, ەلوردالىق ۇجىمدى قايتادان بيىككە شىعارۋدى ماقسات ەتىپ وتىر.

ستاتيستيكالىق مالىمەتتەرگە كوز جۇگىرتەر بولساق, ەلوردالىق ۇجىم كە­يىنگى ون جىلدىڭ ىشىندە ەۋروكۋبوك با­سە­كەلەرىنىڭ تەك ءبىر ماۋسىمىن تەڭ نا­تي­جەمەن باستاپ, ەۋروپا ليگاسىنىڭ توپ­تىق كەزەڭىنە دەيىن شىققان ەكەن. ەندى, مىنە, اراعا جەتى جىل سالىپ, «استانا» تاعى دا حالىقارالىق ويىنداردىڭ ال­عاشقىسىندا تەڭ ءتۇسىپ وتىر. مۇنى دا ءبىر جاقسىلىققا بالاعان دۇرىس شىعار.

27 مىڭ جانكۇيەر تاماشالاعان «اس­تانا ارەناداعى» ماتچتىڭ ايقىن ءفا­ۆو­­ريتى «استانا» بولعانى داۋسىز ەدى. ويت­كەنى گرۋزيالىق ۇجىم ءوز ەلى­نىڭ داڭق­تى كومانداسى بولسا دا, حالىق­ارا­لىق ويىنداردا اسا تاجىريبەسى جوق. سون­­دىقتان ماتچ باستالماي تۇرىپ-اق فۋت­بول ماماندارى بۇل كەزدەسۋدە «استا­نا­نىڭ» جەڭىسكە جەتۋىنە ەش كۇمان كەل­تىر­مەيتىنىن مالىمدەگەن بولاتىن. ءتىپتى ەل­وردالىق كلۋبتىڭ اڭىز ويىنشىسىنا اي­نال­عان سەربيالىق قاقپاشى نەناد ەريچ تە «استانا» جەڭىسىنە سەنىمدى بول­عان.

بىراق 90 مينۋت بويى تارتىستى وتكەن كەزدەسۋدە كوماندالاردىڭ كۇشتەرى تەڭ ءتۇسىپ, توسىن ناتيجە تىركەلدى. ءبىرىنشى تايمدا ەلوردالىق كوماندا ويىن تىزگىنىن ءوز قولىنا الىپ, قارسىلاستارىنا قارا­عاندا باسىم بولسا, ەكىنشى تايمدا گرۋ­زيا كومانداسى شابۋىلدا ءساتتى وينادى. كەز­دەسۋدىڭ العاشقى مينۋتىندا جەر­لەستەرىمىز «دينامو» قاقپاسىنا بىر­نەشە قاۋىپتى شابۋىل ۇيىمداستىرىپ, تەك 10-مينۋتتا عانا گول سوعۋ باقىتى بۇيىردى. «استانا» قۇرامىن جۋىردا عانا تولىقتىرعان ۇلتتىق قۇراما ويىن­شىسى يان ۆوروگوۆسكيدىڭ پاسىنان كەيىن ابات ايىمبەتوۆ دوپتى قاقپاعا ءدال باعىتتاپ, كەزدەسۋدىڭ ەسەبىن اشتى – 1:0. ءبىرىنشى تايمنىڭ سوڭىنا دەيىن «استانا» فۋتبولشىلارى ەسەپتى ەسەلەۋ­گە تىرىسقانىمەن, قارسىلاس كلۋبتىڭ قورعاۋشىلارى شابۋىلشىلارىمىزعا مۇمكىندىك بەرمەدى.

ەكىنشى تايمدا دا جەرلەستەرىمىز ويىنداعى باسىمدىقتى ءوز قولدارىنا الىپ, دينامولىقتارعا قىسىم كورسە­تۋگە تىرىستى. بىراق جاساندى الاڭ­عا بوي ۇيرەتكەن «دينامو» فۋتبول­شى­­­لارى ەكىنشى 45 مينۋتتىقتا «اس­تانا» قاقپاسىنا ءجيى شابۋىلدا­دى. نا­­تي­جەسىندە, ويىننىڭ 57-مينۋتىن­دا گرۋزيالىقتاردىڭ كەزەكتى شابۋىل­دا­رىنىڭ بىرىندە گابريەل سيگۋا بوس قاق­پانى ءدال كوزدەپ, مەرگەندىگىمەن كوزگە ءتۇستى – 1:1. ويىننىڭ قالعان ۋاقى­­تىندا «استانا» فۋتبولشىلارى تاب­­لوداعى كورسەتكىشتى وزگەرتكىسى كەل­گەنى­مەن, ەكىنشى گولدى سوعۋعا شامالارى جەتپەدى. ءسويتىپ «استانا» مەن «دي­نا­مو» اراسىنداعى العاشقى ويىن تەڭ نا­تي­­جەمەن اياقتالىپ, بارلىق ماسەلە گرۋ­زياداعى ويىندا شەشىلەتىن بولدى. ەكى ۇجىم اراسىنداعى قارىمتا ماتچ 19 شىلدەدە تبيليسيدە وتەدى.