15-16 شىلدە كۇندەرى ەلورداداعى «Beeline Arena» سپورت كەشەنىندە بەلبەۋ كۇرەسىنەن ەرلەر مەن ايەلدەر اراسىندا الەم چەمپيوناتىنىڭ جالاۋى جەلبىرەيدى.
ەلىمىزدە ۇيىمداستىرىلىپ جاتقان الەمدىك دودادا جەر-جاھاننىڭ 30 مەملەكەتىنەن كەلگەن 250-گە جۋىق سپورتشى بەلدەسەدى. جاھاندىق جارىستا ەرلەر – 16, ال ايەلدەر 5 سالماق دارەجەسى بويىنشا باس جۇلدەنى ساراپقا سالادى. ەرلەر ەركىن جانە كلاسسيكالىق ستيلدە بەلدەسسە, ايەلدەر تەك ەركىن ءتاسىل بويىنشا كۇرەسەدى.
جارىس قورىتىندىسى بويىنشا قاراشا ايىندا رەسەيدىڭ ەكاتەرينبۋرگ قالاسىندا وتەتىن الەم كۋبوگىندە ەل نامىسىن قورعايتىن ۇلتتىق قۇراما جاساقتالادى. بەلبەۋ كۇرەسىنەن الەم چەمپيوناتى ەلىمىزدە وسىمەن ءتورتىنشى رەت وتكىزىلىپ جاتقانىن ايتا كەتكەن ءجون. بۇعان دەيىن بەلبەۋ كۇرەسىنەن ەرەسەكتەر اراسىنداعى الەم چەمپيوناتى استانادا 2007, 2012, 2017 جىلدارى ۇيىمداستىرىلعان.