ەل تەننيسىنىڭ كوشباسشىسى, بىلتىرعى ۋيمبلدون دوداسىنىڭ جەڭىمپازى ەلەنا رىباكينا اتالعان ءتۋرنيردىڭ شيرەك فينالىنا شىقتى.
الەمدىك رەيتينگتە ءۇشىنشى ورىندا تۇرعان جەرلەسىمىز «ۇلكەن دۋلىعا» جارىسىنىڭ ءتورتىنشى اينالىمىندا الەمنىڭ 13-راكەتكاسى برازيليالىق بەاتريس حادداد مايامەن شەبەرلىك بايقاستى. ورتالىق كورتتاعى كەزدەسۋدى رىباكينا ءساتتى باستادى. ءۇشىنشى گەيمنەن كەيىن ەسەپ 2:1 بولعان مەزەتتە وتانداسىمىز برەيك جاساپ, 3:1 ەسەبىمەن العا شىعىپ الدى. سودان كەيىن ءوز گەيمىندە مىقتىلىق تانىتىپ, ەسەپتەگى باسىمدىقتى ۇلعايتتى – 4:1.
الايدا بەسىنشى گەيمنەن كەيىن برازيليالىق تەننيسشى جاراقاتىنا بايلانىستى مەديتسينالىق كومەككە جۇگىنىپ, ءارى قاراي باسەكەنى جالعاستىرۋدان باس تارتتى. وسىلايشا, ەلەنا ەش قيىندىقسىز جارىستىڭ كەلەسى كەزەڭىنە جولداما الدى. ەندى جەرلەسىمىز بۇگىن ۋيمبلدوننىڭ جارتىلاي فينالىنا شىعۋ ءۇشىن الەمنىڭ 6-راكەتكاسى تۋنيستىك ونس جابەرمەن كەزدەسەدى. بۇل ەكى سپورتشى ۇلىبريتانياداعى جارىستىڭ بىلتىرعى فينالىندا ويناپ, ءۇش سەتكە جالعاسقان باسەكەدە ەلەنا رىباكينا 3:6, 6:2, 6:2 ەسەبىمەن جەڭىسكە جەتكەن.