مەملەكەت باسشىسى ەلوردانى دامىتۋ ماسەلەلەرى جونىندەگى كەڭەس بارىسىندا باس قالاداعى سۋ تاپشىلىعى ماسەلەسىنە توقتالىپ ءوتتى, دەپ حابارلايدى Egemen.kz.
پرەزيدەنت استانانى سۋمەن قامتاماسىز ەتۋ وتە ماڭىزدى مىندەت ەكەنىن اتاپ ءوتتى.
«جازدىڭ باسىندا سۋ تاپشىلىعى قاتتى سەزىلدى. بۇعان تۇرعىندار نارازىلىق بىلدىرگەنىن بىلەسىزدەر. ءتىپتى, جولداردى بوگەپ, ميتينگكە شىقتى. بۇل – ەلوردا ومىرىندە بولىپ جاتقان كەلەڭسىز وقيعالار. اشىعىن ايتساق, قالانىڭ ينجەنەرلىك ينفراقۇرىلىمىن دامىتۋعا جاۋاپتى ادامدار جۇمىسىن ادال اتقارماعان. بۇل – ناعىز سالعىرتتىق, سونىڭ سالدارىنان وسىنداي كۇردەلى احۋال قالىپتاستى. مۇنى, ءتىپتى, جۇمىسقا سەلقوس قاراۋ ەمەس, قاساقانا زيان كەلتىرۋ دەۋگە بولادى.
بۇل سالادا قاتەلىككە مۇلدەم جول بەرۋگە بولمايدى. سوندىقتان, كىنالى ادامدار ءتيىستى جازاسىن الۋى كەرەك. قازىر ەلوردا استانا سۋ قويماسىنا تولىق تاۋەلدى بولىپ وتىر. سۋ الاتىن باسقا جەر جوق. بۇل – وتە قاۋىپتى. كەز كەلگەن ساتتە وقىس وقيعا بولسا, بۇكىل قالاعا قاۋىپ ءتونۋى مۇمكىن. تۇرعىندار سانى كوبەيىپ, جاڭا نىساندار پايدالانۋعا بەرىلىپ جاتىر. سوندىقتان, سۋ قويماسىنىڭ قۋاتى الداعى ءبىر-ەكى جىلدا سارقىلىپ بىتەتىنى انىق», دەدى مەملەكەت باسشىسى.
سونداي-اق بۇگىنگى كۇندەرى سۋ قويمالارى لايلانىپ, لاستانىپ جاتىر. پرەزيدەنتتىڭ ايتۋىنشا, قويمانىڭ ءتۇبىن تازالاپ, ونى تەرەڭدەتۋ كەرەك. استانا سۋ قويماسىنىڭ بوگەتىن تولىق تەكسەرىپ, نىعايتۋ قاجەت. وعان ساتباەۆ كانالىنان سۋدىڭ تۇراقتى كەلىپ تۇرۋىن قامتاماسىز ەتكەن ءجون.
«وسى شارالاردى دەرەۋ قولعا الۋ كەرەك. قويمانىڭ تەحنيكالىق جاعدايىن شۇعىل رەتكە كەلتىرۋ قاجەت. بۇل – وتە ماڭىزدى ماسەلە. استانادا بۇدان باسقا سۋ كوزى جوق. اشىعىن ايتساق, مۇنداي احۋال كوپتەن بەرى جالعاسىپ كەلەدى, ياعني بۇل ءبىر كۇندە پايدا بولعان ماسەلە ەمەس. بۇعان دەيىن ەكولوگيا مينيسترلىگىنە قالانى سۋمەن قامتاماسىز ەتۋ ءۇشىن كەشەندى جۇمىس جاساۋ تاپسىرىلدى. بىراق, ءالى كۇنگە دەيىن ناقتى ناتيجە جوق. ءتىپتى, وسى ماسەلەنى شەشۋگە قاتىستى ءتيىمدى ۇسىنىستار دا جوق. تاعى دا قايتالاپ ايتامىن: قۇزىرلى مينيسترلىك ناقتى شارالار قابىلداۋعا ءتيىس», دەدى ق.توقاەۆ.
مەملەكەت باسشىسى اتاپ وتكەندەي استانانى اۋىز سۋمەن قامتاماسىز ەتۋ ماسەلەسىن كەيىنگە قالدىرا بەرۋگە بولمايدى.
ء«تيىستى جۇمىس اتقارىلماسا, مۇنى استىرتىن قارسىلىق ءبىلدىرۋ دەپ تۇسىنۋگە تۋرا كەلەدى. احۋالدى دەرەۋ تۇزەۋ قاجەت. باس قالانى وسىنداي جاعدايدا قالدىرمايمىز. ۇكىمەت اكىمدىكپەن بىرلەسىپ, كەلەسى جىلدان باستاپ ساتباەۆ كانالىنان قالاعا دەيىن قۇبىر تارتۋ جۇمىستارىن قولعا الۋعا ءتيىس. سونىمەن بىرگە, ۇكىمەت اكىمدىكپەن بىرگە سۋمەن قامتاماسىز ەتۋدىڭ بالامالى جولدارىن قازىردەن باستاپ قاراستىرۋى كەرەك», دەدى ەل پرەزيدەنتى.
سونداي-اق تاعى ءبىر وتە وزەكتى ماسەلە – قالدىق سۋدى تازارتۋ. قازىر قالادا ءبىر عانا كارىز تازارتۋ قوندىرعىسى بار, ياعني ونىڭ جۇمىس جۇكتەمەسى شامادان تىس بولىپ تۇر.
«بۇگىندە تاۋلىگىنە قوسىمشا 140 مىڭ تەكشە مەتر سۋدى تازارتۋ قاجەت. وسىنداي ەكىنشى قوندىرعى ءۇشىنشى سورعى-سۇزگى ستانساسىمەن قاتار سالىنۋعا ءتيىس ەدى. ءۇشىنشى سورعى-سۇزگى ستانساسى پايدالانۋعا بەرىلەيىن دەپ جاتىر. ال, كارىز تازارتۋدىڭ ەكىنشى قوندىرعىسىن جوبالاۋ جۇمىستارى ءالى بىتكەن جوق. جۇمىستى دۇرىس جوسپارلاماۋدىڭ كەسىرىنەن تۇيتكىلدەر قوردالانا بەرەدى. سونداي-اق كەلەسى جىلى ءتورتىنشى سورعى-سۇزگى ستانساسىن سالۋعا كىرىسۋ كەرەك. تەلمان ەلدى مەكەنىندەگى سورعى ستانساسىنان تەحنيكالىق سۋ قۇبىرىن تارتۋدىڭ ەكىنشى جەلىسىنىڭ قۇرىلىسىن دا باستاۋ قاجەت», دەدى مەملەكەت باسشىسى.
سونداي-اق پرەزيدەنت اكىمدىككە كەلەسى جىلدىڭ سوڭىنا دەيىن قالدىق سۋدى جيناقتايتىن قارابيدايىق كولىن كەڭەيتۋدى تاپسىردى.
«قازىر تازارتۋ قوندىرعىلارى ارقىلى اعىزىلاتىن قالدىق سۋ ەسىل وزەنىن لاستاۋدا. ۇكىمەت وسى اعىزىلاتىن قالدىق سۋدىڭ كولەمىن نورماتيۆتىك تۇرعىدان رەتتەۋى قاجەت. ەلوردادا ەكولوگيا تالاپتارى قاتاڭ ساقتالۋعا ءتيىس. سونداي-اق, جاۋىن-شاشىن بولعاندا كوشەلەردى سۋ باسىپ كەتەدى. بۇل دا وزەكتى ماسەلە بولىپ وتىر.
كارىز جۇيەسى سۋ اعىنىنا توتەپ بەرە المايدى. جۋىرداعى جاڭبىر كەزىندە وسىعان تاعى ءبىر مارتە كوزىمىز جەتتى. جاڭا نوسەر كارىزىنىڭ قۇرىلىسى تولىق اياقتالعان جوق. اكىمدىك ناقتى شارالار قابىلداۋعا ءتيىس. جالپى, باس قالانى سۋمەن قامتاماسىز ەتۋدىڭ جانە سۋ تارتۋدىڭ ءتيىمدى جۇيەسىن قالىپتاستىرۋ وتە ماڭىزدى. بۇل – تۇرمىس ساپاسىن جاقسارتۋعا قاجەتتى باستى تالاپتاردىڭ ءبىرى», دەدى قاسىم-جومارت توقاەۆ ەلوردانى دامىتۋ ماسەلەلەرى جونىندەگى كەڭەس بارىسىندا.