استانا قالاسىنىڭ اكىمى جەڭىس قاسىمبەك Instagram پاراقشاسىندا قۇرىلىسى ۇزاققا سوزىلعان كەزەكتى تۇرعىن ءۇي كەشەنى اشىلعانىن ءمالىم ەتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«جىلدار بويى قۇرىلىسى توقتاپ تۇرعان نىساندى اياقتادىق. «تۇران سىعاناق» تۇرعىن ءۇي كەشەنىنىڭ قۇرىلىسى سوناۋ 2014 باستالعان. ۇلەسكەرلەر 9 جىلدان كەيىن بارىپ باسپاناسىنىڭ كىلتىن الدى.
نىسان قابىلدانعان كەزدە كەيبىر بلوكتارىنىڭ قۇرىلىسى ءتىپتى باستالماعان دا ەدى. ۇلكەن جۇيەلى جۇمىس جۇرگىزىلدى. ەلوردا كۇنى قارساڭىندا 330-دان استام ۇلەسكەر وتباسىنىڭ پروبلەماسىن شەشتىك! مۇندا «تۇران سىعاناق» تۇرعىن ءۇي كەشەنىنىڭ تۇرعىندارىنان بولەك قۇرىلىسى ۇزاققا سوزىلعان وزگە دە نىسانداردىڭ ۇلەسكەرلەرى باسپانالى بولدى.
بيىل قۇرىلىسى ۇزاققا سوزىلعان 30-دان استام تۇرعىن ءۇي كەشەنىن اياقتايمىز. ءار ءۇيدىڭ وزىنە ءتان كۇردەلى تاريحى بار, دەگەنمەن ارقايسىسى بويىنشا قادامدىق ءىس-شارالار جوسپارى بار. وسىلايشا, 4 مىڭعا جۋىق ۇلەسكەر-وتباسىنىڭ پروبلەماسىن شەشەمىز», دەپ جازدى ەلوردا اكىمى.