ءبىرىنشى كەزەكتە – حالىق مۇددەسى

سوڭعى سايلاۋدىڭ وزگەشەلىگى نەدە؟ ءبىز پارلامەنت پەن ءماسليحاتتار سايلاۋلارىندا شەتەلدىك ۇلگىلەردى قولعا الىپ جاتىرمىز. ەلىمىزدە پارتيالىق جۇيە ەندى عانا دامىپ كەلەدى. بىراق ءالى تولىققاندى قالىپتاستى دەپ ايتا المايمىن. مىسالى, بىزدەن بولەك بيلىك پارتياسىنا جاتپايتىن دەپۋتاتتار بار. ولار بىزگە قاراعاندا اناعۇرلىم بەلسەندى بولۋى كەرەك. بىراق وسى بەلسەندىلىك ءتيىستى دەڭگەيدە كورىنبەي جاتىر. سوندىقتان پارتيالىق جۇيە ءالى جەتكىلىكتى جۇمىس ىستەپ جاتقان جوق.

جاڭا وزگەرىستەرگە ساي حالىق سايلاعان دەپۋتات ادامداردىڭ كوڭى­لىنەن شىقپاسا, ونى كەيىن قايتارىپ الۋعا بولادى. الايدا قازىرگى تاڭعا دەيىن ونداي جاعداي تىركەلگەن جوق. دەگەنمەن وڭىرىمىزدە ءبىر دەپۋتاتتى سايلاۋشىلار قاتتى سىنادى. ەندى ءبىز بۇدان ءبىر ناتيجە كۇتىپ وتىرمىز: نە ول ءوزىن اقتاپ شىعۋى كەرەك, نە كەتۋى قاجەت. سوندىقتان مەن مۇنى جاقسى وزگەرىس دەپ ايتا الامىن. كىمدە-كىم ءوزىنىڭ بەرگەن ۋادەسىن ورىنداماسا, ايتقان ءسوزىن ىسكە اسىرماسا, ومىردەگى ءجۇرىس-تۇرىسى دۇرىس بولماسا, ولاردى كەيىن شاقىرىپ الادى. كوپپارتيالىق جۇيە وسىعان بارىنشا وڭ ىقپال ەتەدى دەپ سەنەمىن.

قازىر دەپۋتاتتىق قىزمەتكە حا­لىق­قا قىزمەت جاسايمىن دەگەن شىن نيەتى بار ادامدار كەلگەنى ابزال. بۇرىنعىداي تەندەر الامىن, بيزنە­سىمدى جۇرگىزەمىن دەگەن زامان ءوتتى. ياع­ني قازىرگى تاڭدا بۇل قىزمەتكە ءوزىڭ­نىڭ ەمەس, حالىقتىق مۇددە ءۇشىن بارۋ قاجەت.

بۇرىن جارىق, جىلۋ جانە گاز سالالارىنداعى مونوپوليستەرگە جەر­گىلىكتى دەپۋتاتتاردىڭ ءتىسى باتپايتىن. دەپۋتاتتار دا مونوپوليستەرگە قارسى كۇرەستى باستاپ جاتىر. ماسەلەن, ءبىر عانا وقيعانى ايتايىن, ورداباسى اۋدانىندا ءبىر كاسىپكەر قىش زاۋىتىن اشىپ, 3 شاقىرىم جەردەن جارىق تارتقان. جۇمىسىن باستاعاننان كەيىن ونىڭ جانىنان تاعى ءبىر بيزنەس اشادى. ەندى وعان ءوزىنىڭ تارتقان جەلىسىنەن توك جۇرگىزەيىن دەسە, مونوپوليست 6 شا­قىرىم جەردەن تاعى ەلەكتر قۋاتىن تارت دەپ تۇرىپ الىپتى. سودان الگى كاسىپكەر پارتيا قابىلداۋىنا كەلدى. ءبىز ىسكە ارالاسقاننان كەيىن عانا بۇل ماسەلە وڭ شەشىلدى. دەپۋتاتتار قاۋىمى وسىلاي حالىق يگىلىگى ءۇشىن جۇمىس جۇرگىزۋى كەرەك.

دۋلات ءابىش,

تۇركىستان وبلىستىق ءماسليحاتىنىڭ دەپۋتاتى