جوعارى ءبىلىم بەرۋدىڭ بارلىق دەڭگەيلەرى بويىنشا 2023 - 2024 وقۋ جىلىنا ارنالعان ءبىلىم گرانتتارىن ءبولۋ ءتىزىمى جاريالاندى, دەپ حابارلايدى Egemen.kz عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
بيىل جوعارى وقۋ ورىندارىندا وقۋ ءۇشىن 88 مىڭ گرانت بولىنگەن: باكالاۆرياتقا – 73 مىڭعا جۋىق, ماگيستراتۋراعا – 13 مىڭنان استام, دوكتورانتۋراعا – 1800-دەن استام.
سونداي-اق «سەرپىن» باعدارلاماسى ارقىلى تۇسۋشىلەرگە 3 653 گرانت بولىنگەن. «سەرپىن» جوباسى ارقىلى 4 باعىت بويىنشا ءبىلىم الۋعا بولادى: پەداگوگيكا عىلىمدارى, ينجەنەرلىك-تەحنيكالىق, اقپاراتتىق تەحنولوگيالار, اۋىل شارۋاشىلىعى.
باعدارلاماعا وڭتۇستىك وڭىردەگى اۋىل جاستارى قاتىسادى. ايتا كەتسەك, وقۋ بىتىرگەن سوڭ گرانت وتەۋ مەرزىمى 3 جىلدان 2 جىلعا قىسقارتىلدى.
سونداي-اق بۇرىن ماماندار ءوزى وقىعان ايماقتا عانا گرانتتى جۇمىسپەن وتەيتىن بولسا, ەندى 11 ايماقتا قىزمەت ەتە الادى.
«مەملەكەت باسشىسىنىڭ تاپسىرماسى بويىنشا بارلىق گرانتتىڭ 60% تەحنيكالىق ماماندىقتارعا ءبولىندى. سونىمەن قاتار بيىل حالىق تىعىز قونىستانعان باتىس جانە جاڭادان قۇرىلعان وڭىرلەردىڭ جاستارى ءۇشىن گرانتتار ءبولىندى. تالاپكەرلەر بەرىلگەن اقپارات نەگىزىندە دۇرىس تاڭداۋ جاسايدى دەپ سەنەمىن», دەپ اتاپ ءوتتى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ.