فۋتبولدان 2024 جىلى وتەتىن ەۋروپا چەمپيوناتىنىڭ ىرىكتەۋ تۋرنيرىندە قازاقستان دانيادان كەيىن سولتۇستىك يرلانديانى ۇتىپ, قاتارىنان ەكى سەنساتسيا تىركەگەنى بىلگىلى. ال يسلانديا مەن پورتۋگاليا قۇرامالارى رەيكياۆيكتەگى «ليويگارتالسۆيوتليۋر» ۇلتتىق ستاديونىندا كۇش سىناسىپ, بۇل باسەكە 1:0 ەسەبىمەن قوناقتاردىڭ پايداسىنا شەشىلگەن ەدى.
اتالعان ماتچتا جەڭىس گولىن 90-مينۋتتا كريشتيانۋ رونالدۋ سوقتى. وسى كۇنگە دەيىنگى ءتورت باسەكەنىڭ بارلىعىن جەڭىسپەن اياقتاعان پورتۋگاليا قۇراماسى 12 ۇپاي ەنشىلەپ, J توبىنىڭ جارىس كەستەسىندە جەكە-دارا كوش باستاپ تۇر. وسى كەزدەسۋدەن كەيىن رونالدۋعا ءوز ەلىنىڭ ۇلتتىق كومانداسىنىڭ ساپىندا 200 ويىن وتكىزگەن ويىنشى رەتىندە گيننەستىڭ رەكوردتار كىتابىنىڭ ارنايى سەرتيفيكاتى تابىس ەتىلدى. كۇنى بۇگىنگە دەيىن جەر-جاھانداعى بىردە-ءبىر فۋتبولشى ءدال وسىنداي كورسەتكىشكە قول جەتكىزە العان جوق ەدى.
وسى ورايدا پورتۋگاليا قۇراماسى ساپىندا رونالدۋ ءوزىنىڭ العاشقى ماتچىن قازاقستانعا قارسى وتكىزگەنىن ايتا كەتكەن ابزال. 2003 جىلدىڭ 20 تامىزىندا شاۆيش قالاسىندا اتالعان ەكى كوماندا جولداستىق كەزدەسۋ وتكىزدى. ويىننىڭ ەكىنشى تايمىندا 18 جاستاعى كريشتيانۋ الاڭعا شىقتى. بۇل باسەكە 1:0 ەسەبىمەن الاڭ يەلەرىنىڭ پايداسىنا شەشىلدى. جالعىز گولدى 65-مينۋتتا سيماۋ سابروزا سوقتى. ال رونالدۋدىڭ ءوزى وسى ماتچتىڭ ەڭ ۇزدىك ويىنشىسى دەپ تانىلدى.
ۋاقىت وزا كريشتيانۋ الەمدىك فۋتبولدىڭ شوقجۇلدىزىنا اينالدى. ءار جىلدارى ول «سپورتينگ» (2002-2003), «مانچەستەر يۋنايتەد» (2003-2009, 2021-2022), «رەال مادريد» (2009-2018), «يۋۆەنتۋس» (2018-2021) كلۋبتارى ساپىندا ونەر كورسەتتى. تالاي ءدۇبىرلى دودادا پورتۋگاليانىڭ نامىسىن ابىرويمەن قورعادى. ءوزىنىڭ ورەلى ونەرى مەن تەڭدەسسىز شەبەرلىگىنىڭ ارقاسىندا كوپتەگەن اتاقتى يەلەندى.
پورتۋگاليا قۇراماسى ساپىنداعى العاشقى گولىن رونالدۋ 2004 جىلى ەۋروپا چەمپيوناتىنىڭ توپتىق تۋرنيرىندە سوقتى. گرەكياعا قارسى كەزدەسۋدىڭ ەكىنشى تايمىندا جاسىل الاڭعا شىققان بولاشاق جۇلدىز قوسىمشا ۋاقىتتا نىسانانى ءدال كوزدەدى. ءوز ەلىنىڭ باس كومانداسى ساپىندا جاسىنداي جارقىلداعان 20 جىل ۋاقىت ارالىعىندا كريشتيانۋ 122 مارتە مەرگەندىك تانىتىپ, 43 رەت ناتيجەلى پاس بەردى.
ستاتيستيكاعا جۇگىنسەك, پورتۋگاليا مەن قازاقستان قۇرامالارى ءوزارا ءۇش رەت كۇش سىناسقان ەكەن. «ەۋرو-2008» دوداسىنىڭ ىرىكتەۋ تۋرنيرىندە ولار ەكى مارتە كەزدەستى. پيرەنەي تۇبەگىندە وتكەن ماتچتا الاڭ يەلەرى 3:0 ەسەبىمەن جەڭىسكە جەتسە, الماتىداعى ورتالىق ستاديونداعى باسەكەدە جەرلەستەرىمىز 1:2 ەسەبىمەن جەڭىلىس تاپتى. وسى ويىننىڭ ەكەۋىندە دە كريشتيانۋ رونالدۋ گول سوقتى. بىزدەن رونالدۋ سياقتى سۇرمەرگەن قاشان شىعار ەكەن؟