ايگىلى «ەۋروسپورت» ارناسى 3-16 شىلدە ارالاعىندا تەننيستەن لوندوندا وتەتىن ۋيمبلدون ءتۋرنيرىنىڭ باستى فاۆوريتتەرىنىڭ ەسىمدەرىن اتادى. ۇزدىكتەر قاتارىندا قازاقستاننىڭ ءبىرىنشى جانە الەمنىڭ ءۇشىنشى راكەتكاسى ەلەنا رىباكينا دا بار. بۇل تىزىمدە وعان ەكىنشى ورىن بۇيىرعان ەكەن.
ارينە, رىباكينانىڭ ونەرى تەننيستىڭ جىلىك مايىن شاققان ساراپشىلاردىڭ تاراپىنان وسىلايشا جوعارى باعالانۋى تەگىن ەمەس. 24 جاستاعى جەرلەسىمىزدىڭ سوڭعى جىلدارى تولاعاي تابىسقا قول جەتكىزىپ جۇرگەنىن جانكۇيەرلەر جاقسى بىلەدى. بىلتىر ۇلىبريتانيانىڭ استاناسىندا وتكەن ءدال وسى تۋرنيردە ەلەنانىڭ ەكپىنىنە ەشكىم شىداي الماعان ەدى. قارسى كەلگەندەردىڭ بارلىعىن سىپىرا ۇتقان ول كۇمىس ناۋانى توبەسىنە كوتەرىپ, سان ميلليون جانكۇيەردىڭ قوشەمەتىنە بولەندى. سول كەزدە بۇل ناتيجە سەنساتسيا رەتىندە باعالانسا, كەيىننەن رىباكينا ءوزىنىڭ مىقتىلىعىن تالاي ءدۇبىرلى دودادا مويىنداتتى. بىلتىر ول ادەلايدا (اۋستراليا) مەن پورتوروجەدەگى (سلوۆەنيا) ءىرى تۋرنيرلەردە فينالعا دەيىن جەتسە, بيىلعى جىلدىڭ باسىندا مەلبۋرندە ۇيىمداستىرىلعان اۋستراليانىڭ «ۇلكەن دۋلىعا» ساناتىنداعى اشىق بىرىنشىلىگىنىڭ اقتىق سىنىندا ونەر كورسەتتى. ودان كەيىن 1000 ۇپايلىق ينديان-ۋەلسس پەن ريمدەگى دودالاردا دارا شىعىپ, ماياميدە ەكىنشى ورىن الدى. وسىنداي وراسان زور كورسەتكىشتەرىنىڭ ارقاسىندا وتانداسىمىز قازىرگى كەزدە الەمدىك رەيتينگتە ءۇشىنشى ورىندى يەلەنىپ وتىر.
«ەۋروسپورتتىڭ» پايىمداۋىنشا, ەلەنا رىباكيناعا قاراعاندا ارينا سوبولەنكونىڭ ۋيمبلوندا توپ جارۋىنا مۇمكىندىگى ءبىرشاما جوعارى. 25 جاستاعى بەلارۋستىڭ بەتكەۇستارى بيىل اۋستراليانىڭ اشىق بىرىنشىلىگىندە الدىنا جان سالمادى. جىل سايىن US Open, رولان گارروس جانە ۋيمبلدوننىڭ جارتىلاي فينالىنا دەيىن جەتىپ ءجۇر. اسا ءىرى حالىقارالىق دودالاردا 13 مارتە توپ جارعان سوبولەنكو بۇگىنگى تاڭدا WTA رەيتينگىندە ەكىنشى ورىندى يەلەنۋدە.
ءۇشىنشى ورىندا – يگا سۆەنتەك. 22 جاستاعى پولشانىڭ وكىلى ءبىراز ۋاقىتتان بەرى الەمدىك رەيتينگتە جەكە-دارا كوش باستاپ كەلەدى. ول اينالدىرعان ءۇش جىل ارالىعىندا رولان گارروستى (2020, 2022, 2023 جىلدارى) ءۇش رەت ۇتتى. بىلتىر US Open دوداسىندا دارا شىعىپ, اۋستراليانىڭ اشىق بىرىنشىلىگىنىڭ جارتىلاي فينالىنا دەيىن جەتتى. WTA تۋرنيرلەرىندە 14 مارتە توپ جاردى. يگا تەك ۋيمبلدوندا تابىستى ونەر كورسەتە الماي ءجۇر. پولياك قىزى لوندونداعى جارىستىڭ بىردە-ءبىر رەت ءتورتىنشى كەزەڭىنەن اسپاعان. بيىل اۋستراليانىڭ اشىق بىرىنشىلىگىندە ءدال وسى سۆەنتەك ءبىزدىڭ ەلەنا رىباكيناعا ەسە جىبەرگەن ەدى.
ءتورتىنشى جانە بەسىنشى بولىپ تۋنيستىك ونس جابەر مەن چەحيالىق كارولينا مۋحوۆانىڭ ەسىمدەرى اتالادى. الەمنىڭ التىنشى راكەتكاسى اتانىپ وتىرعان 28 جاستاعى جابەر بىلتىر US Open مەن ۋيمبلدوننىڭ فينالىندا وينادى. WTA سايىستارىندا ول ءتورت رەت باس جۇلدەنى ولجالادى. الەمدىك رەيتينگتە 16-ساتىعا جايعاسقان 26 جاستاعى مۋحوۆا بيىل رولان گارروستىڭ فينالىندا ونەر كورسەتىپ, تورتكۇل دۇنيە جانكۇيەرلەرىن تامساندىردى. پاريجدەگى دودادا ول يگا سۆەنتەك پەن ارينا سوبولەنكونى سان سوقتىرعانىن دا ايتا كەتۋگە ءتيىسپىز. وعان دەيىن چەحيانىڭ وكىلى مەلبۋرندەگى ءتۋرنيردىڭ جارتىلاي فينالىندا كۇش سىناستى.