رەسەيدىڭ سانكت-پەتەربۋرگ قالاسىندا دزيۋدودان اسا ءىرى حالىقارالىق كوماندالىق تۋرنير اياقتالدى. اتالعان دودادا قازاقستاننىڭ «جەڭىس» كلۋبى ونەر كورسەتتى.
بيىل عانا قاراعاندى وبلىسى دزيۋدو فەدەراتسياسىنىڭ پرەزيدەنتى تيمۋر تۇرسىمباەۆ پەن كەزىندەگى تانىمال دزيۋدوشى, قازىرگى تاسى ورگە دومالاعان كاسىپكەر الماس السەنوۆتىڭ باستاماسىمەن ىرگەتاسى قالانعان بۇل كوماندانىڭ سەركەلەرى استانادا وتكەن «Qazaqstan Barysy Grand Slam 2023» تۋرنيرىنە قاتىسقاندىقتان نەۆا جاعالاۋىنداعى جارىستا ارتەم شتۋربابين, داستان جۇماجانوۆ, ارسلونبەك تادجيەۆ, ەگور راكوۆ, اقجول دۇيسەنباەۆ, بەكمۇرات ولتيبوەۆ سىندى قوسالقى قۇرامداعى بالۋاندار بەلدەستى. دەسەك تە ولار دا ءوز جانكۇيەرلەرىن جەرگە قاراتقان جوق. ءۇشىنشى ورىن ءۇشىن تارتىستا جەرلەستەرىمىز بەلارۋستىڭ «ستايكا» كلۋبىن ۇتىپ, قولا مەدالدى مويىندارىندا جارقىراتتى.
الداعى ۋاقىتتا «جەڭىستىڭ» دزيۋدوشىلارى قۇرلىقتىق ليگادا كۇش سىناسادى. ءبىزدىڭ جىگىتتەر ا توبىنا ءتۇستى. قارسىلاستارىمىز – ماسكەۋدىڭ «سامبو 70», بەلارۋستىڭ «ستايكا», كراسنوداردىڭ «جەمچۋجينا» جانە تاجىكستاننىڭ «حودجي شاريف» كلۋبتارى. ءتورت توپتىڭ ارقايسىسىنان العاشقى ءۇش ورىندى يەلەنگەن كوماندالار جارىستىڭ كەلەسى كەزەڭىنە جولداما الادى.