مەملەكەتتىك ساياساتتا تالداۋ, ساراپتاما جاساۋ قىزمەتى ساپالى جۇرگىزىلۋگە ءتيىس. قوعام تىنىسى ءاردايىم نازاردا بولۋى وتە ماڭىزدى. شەشىم قابىلداعاندا جۇرتتىڭ ۇسىنىس-تىلەكتەرىن, پىكىرىن ەسكەرۋ قاجەت. بۇل تۋرالى مەملەكەت باسشىسى ۇلتتىق قۇرىلتايدىڭ ەكىنشى وتىرىسىندا ايتتى, دەپ حابارلايدى Egemen.kz.
«بارلىق قۇزىرلى ورگاندار وسىنداي تاسىلمەن جۇمىس ىستەۋگە مىندەتتى. مەن مۇنى ۇنەمى ايتىپ ءجۇرمىن. تۇپتەپ كەلگەندە, بۇل – تۇراقتىلىق پەن تىنىشتىقتىڭ, ءوسىپ-وركەندەۋدىڭ كەپىلى. «حالىق ۇنىنە قۇلاق اساتىن مەملەكەت» تۇجىرىمداماسىنىڭ ءمان-ماڭىزى, وزەگى – وسىندا.
قازىر الەۋمەتتىك زەرتتەۋ جۇرگىزۋ ءۇشىن ءتۇرلى مەكەمەلەرگە قىرۋار قارجى بولىنەدى. بىراق, جۇمىس جۇيەلى ەمەس, سوندىقتان ناتيجەسى كۇماندى بولىپ شىعادى. بۇل جۇمىستى ءبىر جەردەن ۇيىمداستىرىپ, كەشەندى تۇردە جۇرگىزۋ كەرەك», دەدى پرەزيدەنت.
سونداي-اق ول بىزگە ساراپتاۋ-تالداۋ قىزمەتىن ءتيىمدى جۇرگىزەتىن مىقتى ورتالىقتار جەلىسى قاجەت ەكەنىن اتاپ ءوتتى.
«بۇل قۇرىلىمدار ساپالى ءارى سۇرانىسقا يە ينتەللەكتۋالدى ءونىم ۇسىنۋعا ءتيىس. ەلىمىز يدەولوگيالىق دەربەستىگىن ساقتاۋ ءۇشىن مۇنىڭ ايرىقشا ءمان-ماڭىزى بار. ساراپتاما ورتالىقتارى ەلىمىز ەگەمەندىك كەزەڭىندە ءجۇرىپ وتكەن جولدىڭ ءار باعىتىن زەرتتەۋگە ءتيىس. كەمشىلىكتەردىڭ سەبەپ-سالدارىن انىقتاۋ قاجەت. ۇكىمەت جاڭا جوسپار جاساعاندا وسى فاكتورلار ەسكەرىلۋى كەرەك. عىلىم مەن زەرتتەۋگە نەگىزدەلگەن ساياسات تابىستى بولادى», دەپ اتاپ ءوتتى ەل پرەزيدەنتى.