تۇڭعىش پرەزيدەنت اتىنداعى ۇلتتىق قورعانىس ۋنيۆەرسيتەتىندە وقۋىن تامامداعان تۇلەكتەردى سالتاناتتى شىعارىپ سالۋ ءراسىمى ءوتتى. 150-دەن استام ماگيسترانت قارۋلى كۇشتەر وفيتسەرلەر كورپۋسىنىڭ, باسقا دا اسكەري قۇرالىمداردىڭ قاتارىن تولىقتىردى.
ەلورداداعى ۇلتتىق قورعانىس ۋنيۆەرسيتەتى – ەلىمىزدەگى جوعارى اسكەري ءبىلىم بەرۋدىڭ فلاگمانى, جاڭا ۇلگىدەگى اسكەري وقۋ ورنى, يننوۆاتسيالاردى ەنگىزۋ سالاسىنداعى كوشباسشى, سونداي-اق ورتالىق ازيا وڭىرىندەگى ءىرى اسكەري جوعارى وقۋ ورنى. ۋنيۆەرسيتەت ۇقشۇ-عا مۇشە مەملەكەتتەردىڭ قارۋلى كۇشتەرى ءۇشىن اسكەري كادرلاردى بىرلەسىپ دايارلايتىن وقۋ ورىندارى تىزىمىنە ەنگىزىلگەن. سونىمەن قاتار بۇل ۋنيۆەرسيتەت ەلىمىزدىڭ بارلىق اسكەري وقۋ ورىندارى ءۇشىن ۆەدومستۆوارالىق وقۋ-ادىستەمەلىك ورتالىق بولىپ سانالادى.
ۇلتتىق ۋنيۆەرسيتەتتىڭ باستىعى, گەنەرال-مايور لۋت الچەكەنوۆ سالتاناتتى ءىس-شارادا سويلەگەن سوزىندە قازىرگى ۋاقىتتا وقۋ ورنى جەدەل-تاكتيكالىق جانە جەدەل-ستراتەگيالىق باسقارۋ بۋىنى ءۇشىن ءبىر جارىم مىڭنان استام اسكەري مامان دايارلاعانىن اتاپ ءوتتى.
– سىزدەردىڭ الدارىڭىزدا ءوز اسكەري بولىمشەلەرىڭىزدىڭ بەدەلىن ارتتىرۋ جانە جاۋىنگەرلىك داعدىلاردى جوعارى دەڭگەيگە كوتەرۋ مىندەتى تۇر. مۇندا ءبىز قازاقستان ارمياسىنىڭ وفيتسەرلەرىن عانا ەمەس, قىرعىز رەسپۋبليكاسىنىڭ, تاجىكستان رەسپۋبليكاسىنىڭ جانە ارمەنيا رەسپۋبليكاسىنىڭ وكىلدەرىن دە دايارلادىق. سىزدەر ءوز ەلدەرىڭىزدەگى قارۋلى كۇشتەردىڭ مىندەتتەرىن ويداعىداي شەشۋگە جانە ەلدەرىڭىزدىڭ تاۋەلسىزدىگىن نىعايتۋعا مۇمكىندىك بەرەتىن ءبىلىم مەن داعدىلارعا يە بولدىڭىزدار, – دەدى ول.
بۇل ءبىلىم ورداسىندا بەرىلگەن ءبىلىم مەن داعدىلاردىڭ اۋقىمى وتە كەڭ ەكەنىن اتاپ وتكەن ءجون. تۇلەكتەر اسكەري تاكتيكا مەن ستراتەگيانىڭ ەرەكشەلىكتەرىن زەرتتەپ, شەت تىلدەرىن مەڭگەرگەن.
– سىزدەردى اسكەري قىزمەتتىڭ كەزەكتى ماڭىزدى كەزەڭىن – قازاقستان رەسپۋبليكاسىنىڭ ەڭ بەدەلدى اسكەري جوعارى وقۋ ورنىندا ءبىلىم جولىن اياقتاۋلارىڭىزبەن قۇتتىقتايمىن. سىزدەر ءۇشىن بۇل ۋنيۆەرسيتەت ىستىق سەزىم ۇيالاتاتىنىنا سەنىمدىمىن. سىزدەر ءبىلىمنىڭ مول قورىمەن عانا ەمەس, سونىمەن قاتار دوستىق قولداۋ مەن ءوزارا كومەك رۋحىن دا بويعا سىڭىردىڭىزدەر. بۇل رۋح ءبىزدىڭ ەلدەرىمىزدىڭ بەيبىت جانە جوسپارلى دامۋى مۇددە جولىندا جىلدار بويى نىعايا تۇسەدى, – دەدى ارمەنيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ارمەن گەۆونديان تۇلەكتەردى قۇتتىقتاۋىندا.
ماگيسترانتتاردى سالتاناتتى شىعارىپ سالۋ ءىس-شاراسى قورعانىس مينيسترلىگىنىڭ ءانسامبلى دايىنداعان مەرەكەلىك كونتسەرتپەن اياقتالدى.