«US Open FIRST LEGO League» حالىقارالىق روبوتتەحنيكا چەمپيوناتىندا قاراعاندى وبلىسىنىڭ «مۇراگەر» مامانداندىرىلعان مەكتەپ-ينتەرناتى جانە شىمكەنت قالاسىنداعى نازارباەۆ زياتكەرلىك مەكتەبىنىڭ وقۋشىلارى قولا مەدال جەڭىپ الدى. چەمپيوناتقا الەمنىڭ 20 ەلىنەن 700-دەن استام وقۋشى قاتىستى.
شىمكەنتتىك «Clutch» توبى «Innovation Project Award» نوميناتسياسىندا ۇزدىك ۇشتىككە ەنىپ, قولا جۇلدەگە يە بولدى. ولار جەل گەنەراتورى مەن كۇن پانەلدەرىنەن الىناتىن ەلەكتر ەنەرگيانى ساقتاۋعا مۇمكىندىك بەرەتىن يننوۆاتسيالىق جوبا ۇسىنعان بولاتىن. جەل ەلەكتر ستانساسىن دايىنداعان قاراعاندىلىق «JelToqSun» كومانداسى ەل تاريحىندا العاش رەت جارىستىڭ «Champions Award» باستى جۇلدەسىنىڭ ءۇشىنشى ورنىنا قول جەتكىزدى.
– ءبىز چەمپيوناتقا جارتى جىلدان استام ۋاقىت دايىندالدىق. ءۇش كۇندىك جارىس ءبىز ءۇشىن وتە قىزىقتى بولدى. ويتكەنى مىقتى قارسىلاستارمەن بەتپە-بەت كەلدىك. العاشىندا قوبالجىعانمەن ىشكى قورقىنىشتى جەڭىپ, ءوز قابىلەتىمىزدى كورسەتە الدىق. ءبىز روبوتتار ويىنىندا كوشباسشىلار قاتارىندا بولدىق. يننوۆاتسيالىق جوبانى تانىستىرىپ, ۇيىمشىلدىعىمىزدى كورسەتە بىلدىك, – دەدى قاتىسۋشىلاردىڭ ءبىرى اكبار ەرمەكوۆ.
جارىس اراسىندا وتاندىق وقۋشىلار «Massachusetts Institute of Technology», «Boston University» جانە «Harvard» سەكىلدى بەدەلدى وقۋ ورىندارىنىڭ ينجەنەرلىك فاكۋلتەتتەرىنە بارىپ, پروفەسسورلارمەن جەكە تانىستى. ولاردىڭ پىكىرىن تىڭداپ, ءوز تاجىريبەلەرىنە قاجەت كەڭەس الدى.
ەستەرىڭىزگە سالا كەتەيىك, ەكى كوماندا دا وقۋ-اعارتۋ مينيسترلىگىنىڭ قولداۋىمەن جىل باسىندا «USTEM Robotics» قوعامدىق قورى ۇيىمداستىرعان «FIRST Central Asia» ورتالىق ازيا ويىندارىندا حالىقارالىق چەمپيوناتقا جولداما العان بولاتىن.
اقسۇڭقار حاباس,
ل.ن.گۋميلەۆ اتىنداعى
ەۇۋ ستۋدەنتى