«Astana Hub» حالىقارالىق تەحنوپاركى موڭعوليانىڭ ۇلتتىق اقپاراتتىق تەحنولوگيالار پاركىمەن بايلانىس ورناۋعا بەيىلدى. العاشقى قادام دا جاسالدى. ۇلانباتىردا وتكەن «ICT Expo Mindgolia 2023» اقپاراتتىق تەحنولوگيالار مەن بايلانىس سالاسىنداعى ءىرى ءىس-شارادا «Astana Hub» باس ديرەكتورى ماعجان ماديەۆ پەن موڭعوليا ۇلتتىق تەحنوپاركىنىڭ ديرەكتورى جارگالسايحانى زولزايا ءوزارا ىنتىماقتاستىق تۋرالى مەموراندۋمعا قول قويدى.
كەلىسىم ستارتاپ ەكوجۇيەسىن دامىتۋ, يننوۆاتسيالىق باعدارلامالاردى قۇرۋ جانە قامتاماسىز ەتۋ, ينۆەستيتسيا تارتۋ جانە بىلىكتىلىكتى ارتتىرۋدى كوزدەيدى.
– ءبىز ءوزارا ىنتىماقتاسىپ, ەكى ەلدىڭ ەكوجۇيەسىن دامىتۋ باعىتىندا بىرلەسە جۇمىس ىستەيمىز. موڭعوليادان «Fibo.cloud», «Metaver», «Cody» سياقتى بىرنەشە الەۋەتتى ستارتاپ «Astana Hub», «Google for Startups» جانە «Draper University»-ءنىڭ «Silkway Accelerator» جانە «Hero Training» بىرلەسكەن باعدارلامالارىنىڭ قاتىسۋشىلارى ەكەنىن اتاپ وتكىم كەلەدى. سەرىكتەستىگىمىزدىڭ ناتيجەسىندە ەكى ەل اراسىنداعى تەحنولوگيالىق كاسىپكەرلىك ينتەگراتسياسى ودان ءارى نىعايا تۇسەتىنى انىق, – دەدى «Astana Hub» باس ديرەكتورى ماعجان ماديەۆ.
ەسكە سالا كەتەيىك, موڭعوليالىق «Fibo.cloud» ستارتاپى – «Astana Hub» جانە «Draper University» بىرلەسكەن اكسەلەراتسيا باعدارلاماسىنىڭ ناتيجەلەرى بويىنشا تاڭدالعان 20 ستارتاپتىڭ ءبىرى. ءارى قازىر اقش-تاعى كرەمني القابىندا وقۋدان ءوتىپ جاتىر. وتكەن جىلى «Fibo.cloud» «Silkway Accelerator» («Astana Hub» پەن «Google for Startups»-تىڭ بىرلەسكەن باعدارلاماسى) بارىسىندا موڭعوليا ۇكىمەتىمەن قوعامدىق «بۇلتتىق» قىزمەتتەرگە كەلىسىمشارت جاساسۋ جانە قازاقستانداعى تەلەكوممۋنيكاتسيالىق كومپانيامەن كەلىسىمگە قول قويۋ ارقىلى اي سايىنعى كىرىسىن 22 ەسە ارتتىردى.
موڭعوليادان كەلگەن تاعى ءبىر قاتىسۋشى «Metaver» ميكرووقىتۋ پلاتفورماسى دا «Silkway Accelerator» كەزىندە جاقسى كورسەتكىشكە قول جەتكىزىپ, ءۇندىستان نارىعىنا شىقتى. «Cody» امبەباپ كوپ ارنالى ساۋدا پلاتفورماسىنىڭ كومانداسى قازىر «Silkway Accelerator»-دىڭ ءۇشىنشى لەگىنە قاتىسىپ جاتىر. وقۋ ءبىر ايدان كەيىن اياقتالادى.
وسى جىلدىڭ 9-11 ماۋسىمىندا موڭعوليا استاناسى ۇلانباتىردا وتكەن «ICT Expo Mindgolia 2023» كورمەسىنە ءىت-سالانىڭ 100-دەن استام جەتەكشى ۇيىمدارى, سونداي-اق ءىرى حالىقارالىق تەحنولوگيالىق كومپانيالار قاتىستى. ۇيىمداستىرۋشىلاردىڭ ايتۋىنشا, بيىلعى شارا ەكولوگيالىق تۇرعىدان ەرەكشە بولدى. ء«بىز ۇلەستىرمەلى ماتەريالدار مەن باسپا جارنامالارىن پايدالانباي-اق, تسيفرلىق تاقتالار, شاعىن قولدانبالار جانە QR-كود ارقىلى قاعازسىز كورمە وتكىزدىك», دەيدى ولار. ءۇش كۇنگە سوزىلعان شارا بارىسىندا رەسمي كەزدەسۋلەر مەن كەلىسىمدەرگە قول قويۋمەن قاتار, لازەرلىك شوۋ, گولوگراممالارى بار ساحنا جانە جارىق شوۋى, كيبەرسپورت, سكۋتەر جارىستارى, كوسپلەي شوۋى, ۆاكانسيالار جارمەڭكەسى, ستارتاپ پرەزەنتاتسياسى ءوتتى.