بيىل دزيۋدودان قاتاردىڭ استاناسى – دوحادا وتكەن الەم چەمپيوناتىنىڭ اسا اۋىر سالماق دارەجەسىنىڭ فينالىندا فرانتسيالىق تەددي رينەر مەن بەيتاراپ ەلدىڭ تۋى استىندا ونەر كورسەتكەن رەسەيلىك ينال تاسوەۆ كۇش سىناسقان ەدى.
«جان الىسىپ, جان بەرىسكەن» ايقاستىڭ نەگىزگى ۋاقىتى تەڭ اياقتالىپ, باسەكە گولدەن-سكورعا ۇلاستى. ەرەجەگە سايكەس وسى كەزەڭدە العاشقى ۇپايدى كىم السا, جەڭىس سوعان بەرىلۋگە ءتيىس. وسى ورايدا العىرلىق تانىتقان تاسوەۆ ۇتىمدى ءادىس جاسادى. الايدا ونىڭ بۇل ارەكەتى تورەشىلەر نازارىنان تىس قالدى. ىلە-شالا رينەر قارسىلاسىنىڭ وسال تۇسىن تاۋىپ كەتتى. ناتيجەسىندە, فرانتسيانىڭ داڭقتى دزيۋدوشىسى باس جۇلدەنى ولجالاسا, رەسەيدىڭ مىقتىسى كۇمىس مەدالدى قاناعات تۇتتى.
ارادا ءبىراز ۋاقىت وتكەننەن سوڭ حالىقارالىق دزيۋدو فەدەراتسياسى (IJF) بەينەتاسپانى قايتا قاراپ شىعىپ, قازىلاردىڭ ورەسكەل قاتەلىككە بوي الدىرعانىن مويىندادى. وسىلايشا, ادىلدىك ورناپ, ينال تاسوەۆقا دا التىن مەدال تابىس ەتىلدى. سوعان سايكەس ول الەمدىك رەيتينگتەگى ۇپايلارىن دا تۇگەندەپ الدى. ءسويتىپ, قازىرگى كەزدە +100 كيلو سالماق دارەجەسىنىڭ چەمپيوندىق اتاعىن ءبىر ەمەس, ەكى بالۋان يەلەنىپ وتىر. ءدال وسىنداي جاعداي بۇرىن-سوڭدى دزيۋدو كۇرەسى تاريحىندا بولماعان.
ەستەرىڭىزگە سالا كەتەيىك, 25 جاستاعى سولتۇستىك وسەتيانىڭ تۋماسى كوماندالىق سايىستا ەكى رەت الەم چەمپيوناتىنىڭ قولا جۇلدەگەرى اتانىپ, ەۋروپا ويىندارىندا توپ جاردى. جەكەلەگەن جارىستا ينال تاسوەۆتىڭ قۇرلىق چەمپيونى, قۇرلىقتىق ويىنداردىڭ كۇمىس جۇلدەگەرى, دۇنيەجۇزىلىك اسكەريلەر ويىندارى مەن اسكەريلەر اراسىنداعى الەم بىرىنشىلىگىنىڭ جەڭىمپازى دەگەن اتاقتارى بار.
ال 34 جاستاعى تەددي رينەر بەيجىڭ جانە توكيودا الاۋى تۇتانعان وليمپيا ويىندارىندا قولا السا, لوندون مەن ريو-دە-جانەيرودا باس جۇلدەنى قانجىعاسىنا بايلادى. جاپونيانىڭ استاناسىندا ول فرانتسيا قۇراماسىنىڭ ساپىندا كوماندالىق جارىستا الدىنا جان سالمادى. سونداي-اق «قونجىق» الەمنىڭ 12 دۇركىن (11 رەت جەكەلەگەن سايىستا, 1 رەت كوماندالىق باسەكەدە) جانە ەۋروپانىڭ بەس دۇركىن چەمپيونى دەگەن اتاققا قول جەتكىزدى. ءوزىنىڭ اتاق-داڭقى جاعىنان بۇگىنگى تاڭدا تەدديمەن جەر-جاھانداعى بىردە-ءبىر دزيۋدوشى تەڭەسە المايدى.