بىلتىر سۋعا ءتۇسۋ ماۋسىمىندا شىعىس قازاقستان وبلىسىندا رۇقسات ەتىلمەگەن جەرگە شومىلعان 7 ادام اجال قۇشتى. توتەنشە جاعدايلار دەپارتامەنتى الدىن الۋ جۇمىستارىن جۇرگىزگەنىمەن, تارتىپكە باعىنبايتىندار از ەمەس.
قۇتقارۋشىلار شومىلۋ ماۋسىمىنا قاراي تابيعي جانە جاساندى سۋ قويمالارىنىڭ ءتۇبىن تەكسەرىپ, ءتيىستى دايىندىقتاردى جۇرگىزدى. ال اپتاپ ىستىققا بايلانىستى توتەنشە جاعدايلار قىزمەتى سۋ ايدىندارىندا باقىلاۋدى تىپتەن كۇشەيتتى. شومىلۋ ماۋسىمى باستالعالى 100-گە جۋىق پروفيلاكتيكالىق رەيد جۇرگىزىلگەن. سارالاپ قاراساق, جازاتايىم وقيعالار كوبىنەسە شومىلۋعا رۇقسات ەتىلمەگەن جاعاجايلاردا بولادى ەكەن.
«اپتاپ ىستىق باستالعاننان بەرى پاترۋلدەۋ كۇشەيە ءتۇستى. اسىرەسە ادام اياعى جەتە بەرمەيتىن جاعالاۋلارعا قايىقپەن جەتىپ, دەمالۋشىلارعا ەسكەرتۋ جاسايمىز. ءبىزدىڭ قولدان كەلەر جۇمىس وسى. دەمالىستارىنا شەكتەۋ قويا المايمىز. ال قاۋىپسىزدىكتى ساقتاۋ – اركىمنىڭ ءوز مىندەتى», دەيدى شقو تجد باستىعىنىڭ ورىنباسارى ارمان توقانوۆ.
قازىرگى ۋاقىتتا وبلىس اۋماعىندا شومىلۋعا ارنالعان 21 ۋچاسكە انىقتالىپ, 74 ورىنعا تىيىم سالىنعان ەكەن. وسى تىيىم سالىنعان شومىلۋ ورىندارىندا 22 تىيىم سالۋ بەلگىسى ورناتىلعان. ونىڭ ۇستىنە, كۇن ىستىق بولعانىمەن, سۋ ءالى ءتيىستى مولشەردە جىلىنا قويماعان. دەنە تارتىلىپ قالماۋى ءۇشىن سۋدىڭ جىلىلىعى 20 گرادۋستان تومەن بولماۋى كەرەك. دەمالۋشىلار جوعارىدا ايتىلعان اقپاراتتاردى ەسكەرىپ جۇرگەنى ابزال. ەسكەرتۋگە باعىنباعان ازاماتتار زاڭ اياسىندا جاۋاپكەرشىلىككە تارتىلىپ, ولارعا ايىپپۇل سالىنادى.
شىعىس قازاقستان وبلىسى