فۋتبولدان قازاقستان كۋبوگى جولىنداعى جارىستىڭ شيرەك فينالدىق سايىستارىنىڭ قارىمتا كەزدەسۋلەرى ءوتتى.
شىمكەنتتە «تۇران» «استانانى» قابىلدادى. العاشقى گولدى 29-مينۋتتا قوناقتار ساپىنداعى زامبيالىق لەگيونەر دەمبو داربو سوقسا, 75-مينۋتتا زيكريللو سۇلتانيازوۆ تارازى باسىن تەڭەستىردى – 1:1. ءبىرىنشى ماتچتا ەلوردالىقتار 2:0 ەسەبىمەن جەڭىسكە جەتكەن ەدى. سول سەبەپتى دە «استانا» جارتىلاي فينالعا جولداما الدى. پەتروپاۆلداعى «جاستار» ستاديونىندا جەرگىلىكتى «قىزىلجار» مەن شىمكەنتتىڭ «ورداباسى» كۇش سىناستى. بۇل باسەكەدە جالعىز گولدى 73-مينۋتتا ملادەن ۆەسەلينوۆيچ سالدى. بىراق العاشقى ويىنداعى جەڭىسىنىڭ ارقاسىندا وڭتۇستىك وكىلدەرى كەلەسى كەزەڭگە شىقتى. الماتىدا تەڭ ناتيجەگە قول جەتكىزگەن «اتىراۋ» ءوز الاڭىندا «قايراتتى» 2:1 ەسەبىمەن ۇتتى. كەزدەسۋ بارىسىندا نسۋنگۋسي ەففيونگ ءدۋبلدىڭ اۆتورى اتانسا, يان ترۋفانوۆ ءبىر مارتە مەرگەندىك تانىتتى. «توبىل» قاراعاندىدا «شاحتەردەن» 0:1 ەسەبىمەن جەڭىلگەنىنە قاراماستان, قوس ماتچتىڭ قورىتىندىسى بويىنشا قوستانايلىقتار ءوز جوسپارىن جۇزەگە اسىردى.
جارتىلاي فينالدا «استانا» مەن «ورداباسى» جانە «توبىل» مەن «اتىراۋ» كۇش سىناسادى. بۇل ويىندار 28 ماۋسىم مەن 8 شىلدەدە وتەدى.