استانادا دارىگەرلەر ءسۇت بەزى ىسىگىن دياگنوستيكالاۋ مەن ەمدەۋدىڭ وزەكتى ماسەلەلەرىن تالقىلادى. كونفەرەنتسيادا ماماندار سالاعا قاتىستى اسا ماڭىزدى تاكتيكالىق ماسەلەلەردى شەشۋدىڭ تىڭ ءادىس-ءتاسىلىن ۇسىندى.
دارىگەرلەر ءسۇت بەزى ىسىگىن ەمدەۋدىڭ وڭتايلى تاكتيكاسىن دياگنوستيكالاۋعا جانە تاڭداۋعا بايلانىستى كوپتەگەن سۇراققا الاڭداۋلى. سوندىقتان اتالعان ءىس-شارا ەلىمىز ءۇشىن عانا ەمەس, بۇكىل كاسىبي قوعامداستىق ءۇشىن دە ماڭىزدى. كونفەرەنتسياعا كەلگەن قوناقتاردىڭ قاتارىندا تاجىريبەلى ونكوماممولوگتەر, حيرۋرگتەر, ۋلترادىبىستىق دياگنوستيكا دارىگەرلەرى, حيميوتەراپەۆتەر, ساۋلەلىك تەراپيا ماماندارى, پاتومورفولوگتەر بار. سونداي-اق رەسەيدەن دە سپيكەرلەر قاتىستى.
فورۋمنىڭ ءبىرىنشى كۇنىندە سالا ماماندارى ءسۇت بەزىنىڭ ونكوپلاستيكالىق حيرۋرگياسى, ءسۇت بەزى وبىرى حيرۋرگياسى, ءسۇت بەزى قاتەرلى ىسىگىنىڭ دارىلىك جانە ساۋلەلىك تەراپياسىنىڭ پرينتسيپتەرى, ءسۇت بەزى قاتەرلى ىسىگىنىڭ دياگنوستيكاسى جايىندا وي ءبولىستى. كونفەرەنتسيادا ۇلتتىق عىلىمي ونكولوگيا ورتالىعى باسقارما توراعاسىنىڭ مەديتسينالىق قىزمەت جونىندەگى ورىنباسارى ادىلبەك مۇقاجانوۆ ءىس-شارانىڭ ءمان-ماڭىزى تۋرالى ايتىپ بەرگەن ەدى.
«جاسىراتىنى جوق, ءسۇت بەزى وبىرىنا شالدىققان ناۋقاستار كوبەيىپ جاتىر. ويتكەنى اۋرۋدىڭ وسى ءتۇرى كەشە عانا پايدا بولعان جوق, بۇرىننان بار. ءيا, كەيىنگى 10 جىلدىڭ وزىندە مەديتسينا سالاسى ايتارلىقتاي ىلگەرىلەدى. ءسۇت بەزى ىسىگىن ەمدەۋدىڭ ادىستاسىلدەرى كوبەيدى. وسى باعىتتا بىلىكتى مامانداردىڭ ىزدەنىستەرى كوپ. ءدارى-دارمەكتەر دە جەتەدى. بۇرىندا وسىنداي دەرتكە شالدىققان ايەلدەردىڭ ءسۇت بەزىن تۇگەل الىپ تاستايتىن. مۇندايدا ايەلگە پسيحولوگيالىق سالماق تۇسەتىنى تۇسىنىكتى. قازىرگى مەديتسينا وسى جايدى دا باعامداپ, الدىن الا الادى. تەك وسىنداي تاجىريبەلەر نەگىزدى قولدانىلۋى كەرەك. بۇگىنگى كونفەرەنتسيادا ەلدەگى, شەتەلدەگى ارىپتەستەرمەن ءسۇت بەزى وبىرىن دياگنوستيكالاۋدا, ەمدەۋدە قانداي كەدەرگىلەر بارىن انىقتاپ, جەتىستىكتەرىمىزدى ورتا سالىپ, تاجىريبە الماسىپ جاتىرمىز. بۇگىن مەديتسينا ماماندارى بايانداما جاساسا, ەرتەڭ ەلدىڭ جانە شەتەلدىڭ دارىگەرلەرى بىرلەسىپ, حيرۋرگيالىق وپەراتسيالار جاسايدى. ول وپەراتسيانى قوناقتار ونلاين رەجىمدە تاماشالاي الادى», دەدى ادىلبەك مۇقاجانوۆ.
دۇنيەجۇزى دەنساۋلىق ساقتاۋ ۇيىمىنىڭ دەرەگىنشە, 2020 جىلى الەمدە 2,26 ملن-نان استام پاتسيەنت ءسۇت بەزى وبىرىنا شالدىققان. بۇل – قاتەرلى ىسىككە شالدىققانداردىڭ جالپى دەرەگىنىڭ 11,7 پايىزىنا تەڭ. سول جىلى ءسۇت بەزى وبىرىنان 685 مىڭ ادام مەزگىلسىز كوز جۇمعان. ۇلتتىق ونكولوگيا ورتالىعىنىڭ ماماندارى ءسۇت بەزى وبىرىن ەمدەۋگە ەرەكشە نازار اۋدارىپ وتىر. مىسالى, بىلتىر ورتالىقتا 460 ماممولوگيا سەكتورى بويىنشا 460 وتا جاسالعان. ونىڭ 265-ءى ءبىر ۋاقىتتا پلاستيكامەن بىرگە جاسالسا, 93-ءى – ونكوپلاستيكالىق رەزەكتسيامەن جاسالعان. سونىمەن قاتار ورتالىقتىڭ ماماندارى رەسەي, يزرايل, وڭتۇستىك كورەيا, سوسىن ەۋروپا ەلدەرىنە بارىپ, بىلىكتىلىگىن ارتتىرۋدان قول ۇزبەگەن. وڭىردەگى ارىپتەستەرمەن دە تىعىز بايلانىستا. سالاداعى وزەكتى ماسەلەلەر تالقىلانعان كونفەرەنتسيادا دا دارىگەرلەر مول ماعلۇمات الدى.