پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا جاز مەزگىلىندە سۋ قويمالارىنداعى قاۋىپسىزدىكتى قامتاماسىز ەتۋ ماسەلەسى قارالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
«قازگيدرومەت» رمك بولجاۋىنشا, بيىلعى جاز ماۋسىمى جىلداعىدان ىستىق بولادى. اسىرەسە, ەلىمىزدىڭ باتىسى مەن شىعىسىندا جانە وڭتۇستىگىندە اپتاپ ىستىق كوپكە دەيىن ساقتالادى. ياعني, سۋعا بارىپ دەمالۋشىلاردىڭ سانى دا ارتا تۇسەرى ءسوزسىز.
«جاز ەندى باستالدى, ال ەلىمىزدىڭ سۋ ايدىندارىندا قازا تاپقانداردىڭ سانى ۇلعايىپ بارادى. توتەنشە جاعدايلار مينيسترلىگىنىڭ مالىمەتى بويىنشا جازدىڭ ءبىرىنشى كۇنى عانا 4 ادام سۋعا كەتىپ, قايتىس بولدى. الدىڭگۇنى ءبىر كۇندە 9 ادام, كەشە تاعى 4 ادام سۋعا كەتكەن. قايعىلى جاعدايلاردىڭ بارلىعى شومىلۋعا رۇقسات ەتىلمەگەن جەرلەردە ورىن العان. بۇل – شىنىمەن دە الاڭداتارلىق جاعداي», دەدى ءاليحان سمايىلوۆ.
قازىرگى ۋاقىتتا شومىلۋ ماۋسىمىنا دايىندىق جۇمىستارى جالعاسىپ جاتىر. وڭىرلەردە شومىلۋعا قاجەتتى ارنايى ورىندار جابدىقتالىپ, جاڭادان جاعاجايلار سالىنىپ جاتىر. سونداي-اق قاۋىپسىزدىك شارالارىن ساقتاۋعا قاتىستى پروفيلاكتيكالىق جۇمىستار دا جۇرگىزىلۋدە.
ۇكىمەت باسشىسى رەسپۋبليكادا جىل سايىن 300-گە جۋىق ادام سۋعا كەتىپ, قايتىس بولاتىنىن, ولاردىڭ 100-گە جۋىعى بالالار ەكەنىن ايتتى. بۇل قابىلدانىپ جاتقان شارالاردىڭ جەتكىلىكسىز ەكەنىن كورسەتەدى.
«اباي, جەتىسۋ, ۇلىتاۋ وبلىستارىندا وسى ۋاقىتقا دەيىن شومىلۋعا رۇقسات ەتىلگەن ارنايى ورىندار بەلگىلەنبەگەن. ال قىزىلوردا وبلىسىندا بۇكىل ءوڭىر حالقى ءۇشىن ارنايى بەلگىلەنگەن 4-اق ورىن بار. الماتى وبلىسىندا قاپشاعاي سۋ قويماسىنىڭ ماڭىنداعى كوپتەگەن جەكە مەنشىك جاعاجايلار رەسمي تىركەلمەگەن», دەدى پرەمەر-مينيستر.
وسىعان بايلانىستى ءوڭىر اكىمدىكتەرىنە توتەنشە جاعدايلار مينيسترلىگىمەن بىرلەسىپ, سۋعا شومىلۋعا ارنالعان قاۋىپسىز ورىنداردى بەلگىلەۋ جونىندەگى جۇمىستى كۇشەيتۋ, سونداي-اق قاۋىپسىزدىك شارالارى تۋرالى حالىقتى بەلسەندى تۇردە حاباردار ەتىپ وتىرۋ تاپسىرىلدى.
سونىمەن قاتار ۇكىمەت باسشىسى پروفيلاكتيكالىق جۇمىستار نەگىزىنەن قالالار مەن اۋدانداردا عانا جۇرگىزىلەتىنىن ايتىپ ءوتتى. اۋىلدىق جەرلەردە بۇعان كوڭىل بولىنبەيدى.
«سول سەبەپتى سۋعا باتقانداردىڭ باسىم كوپشىلىگى, ياعني 60-70%-ى اۋىل تۇرعىندارى بولىپ وتىر. وسى باعىتتا جەرگىلىكتى جەرلەردە اۋقىمدى جۇمىستار جۇرگىزۋ قاجەت. سۋداعى قاۋىپسىزدىك تالاپتارىن, العاشقى كومەك كورسەتۋ ەرەجەلەرىن, ارنايى جاعاجايلار مەن قاۋىپتى ورىندار تۋرالى اقپاراتتى حالىققا ۇنەمى جەتكىزۋ كەرەك», دەدى ءاليحان سمايىلوۆ.
ودان بولەك پرەمەر-مينيستر وڭتۇستىك وڭىرلەردەگى سۋارۋ كانالدارى دا ادامدارعا قاۋىپ ءتوندىرىپ وتىرعانىن ايتتى. ولاردىڭ كوبى قورشالماعان.
«بۇل – ءبىرىنشى كەزەكتە بالالار ءۇشىن وتە قاۋىپتى. كانالداردا بالالار ءولىمى كوپ جاعدايدا الماتى, جامبىل, قىزىلوردا جانە تۇركىستان وبلىستارىندا تىركەلەدى. بۇل رەتتە تۇركىستان وبلىسىنىڭ وڭ تاجىريبەسىن اتاپ وتكىم كەلەدى. وندا ارىققا ءتۇسىپ, قۇلاپ كەتكەن جاعدايدا ءوز بەتىنشە سىرتقا شىعۋعا مۇمكىندىك بەرەتىن ارنايى قۇرالدار ورناتىلىپ جاتىر. ءوڭىر اكىمدىكتەرى وسى تاجىريبەنى زەردەلەپ, كانالدار مەن ارىقتاردا قاۋىپسىزدىكتى قامتاماسىز ەتۋ ماسەلەسىن پىسىقتاۋى قاجەت», دەدى ءاليحان سمايىلوۆ.