بىشكەكتە ءوتىپ جاتقان قوجومقۇل قاباۋ ۇلى مەن راتبەك ساناتباەۆتى ەسكە الۋعا ارنالعان رەيتينگتىك ءتۋرنيردى قازاقستاننىڭ گرەك-ريم كۇرەسى شەبەرلەرى بەس جۇلدەمەن قورىتىندىلادى.
ەڭ ۇزدىك كورسەتكىشكە مارلان مۇقاشەۆ قول جەتكىزدى. 55 كيلو سالماق دارەجەسىندە بەلدەسكەن قانداسىمىزعا جەرەبە قولايسىز ءتۇستى. تۇساۋكەسەر كەزدەسۋىندە ول يراننىڭ اتاقتى بالۋانىمەن كۇش سىناستى. پايا داتمارز – الەم كۋبوگىنىڭ يەگەرى, ازيا چەمپيونى, جاستار مەن جاسوسىپىرىمدەر اراسىنداعى الەم بىرىنشىلىكتەرىنىڭ جەڭىمپازى. دەسەك تە بۇل تارتىستا ءبىزدىڭ بالۋاننىڭ باعى جاندى. كوپ كەشىكپەي مارلان الەم چەمپيوناتىنىڭ قولا جۇلدەگەرى, وزبەكستاندىق جاسۋربەك ورتيكبوەۆتى ايقىن باسىمدىقپەن ۇتسا, جارتىلاي فينالدا ءوزىنىڭ كوماندالىق ارىپتەسى امانعالي بەكبولاتوۆتان باسىم ءتۇستى. اقتىق ايقاستا قازاق سپورتشىسى وزبەكستاننىڭ تاعى ءبىر وكىلى يحتيەر بوتيروۆتان ايلاسىن اسىرىپ, باس جۇلدەنى ولجالادى. ال قولا مەدال ءۇشىن تارتىستا امانعالي جاسۋربەكتى جەڭدى.
60 كيلو سالماقتاعى نۇرسۇلتان بازارباەۆتىڭ قىرعىزستاندىق بالباي دوردوكوۆ, ۇندىستاندىق سۋميت سۋميت جانە ءوزىنىڭ وتانداسى ەرنار فيداحمەتوۆتەن مەرەيى ۇستەم بولعانىمەن, شەشۋشى تۇستا وزبەكستاندىق يسلومجون باحراموۆتىڭ وسال تۇسىن تابا المادى. ناتيجەسىندە, ول كۇمىس مەدالدى ەنشىلەدى. ەرنار قولا جۇلدەنى قاناعات تۇتتى. تاعى ءبىر قولانى 87 كيلولىق نۇرسۇلتان تۇرسىنوۆ قورجىنعا سالدى. ءۇشىنشى ورىن ءۇشىن باسەكەدە ول بوز كىلەم قوجايىنى ازات ساليدينوۆقا سان سوقتىردى.
بارلىعى 1 التىن, 1 كۇمىس جانە 3 قولانى ەنشىلەگەن قازاقستاننىڭ گرەك-ريم كۇرەسى شەبەرلەرى جالپى كوماندالىق ەسەپتە ءتورتىنشى ساتىعا تابان تىرەدى. ال ۇزدىك ۇشتىكتىڭ قاتارىنا يران (5 التىن+1 كۇمىس+2 قولا) جانە وزبەكستان مەن گرۋزيا (2+2+2) قۇرامالارى ەندى.
ودان كەيىن بوز كىلەمگە بۇرىمدىلار شىقتى. ءبىزدىڭ قىزدار ەلىمىزدىڭ ءانۇرانىن ەكى مارتە شىرقاتتى. الەمدىك دودالاردا جۇلدە الىپ, ازيا چەمپيوناتتارىندا الدىنا جان سالماي جۇرگەن ءجاميليا باقبەرگەنوۆا دالۆا كانەۆا (يتاليا) مەن رەتيكا رەتيكانى ء(ۇندىستان) ەش قينالماي ۇتىپ, 72 كيلو سالماق دارەجەسىندە دارا شىقتى. بۇل تۋرنيردە مارينا سەدنەۆا دا الدىنا جان سالمادى. 55 كيلو سالماقتا شەبەرلىك بايقاسقان ول ءزۇلفيا ياحياروۆا (قازاقستان), مەلدا دەرنەكچي (تۇركيا), ماريا ۆيننيك (ۋكراينا) جانە كارلا گودينەس گونزالەستى (كانادا) جەڭدى. ال 65 كيلولىق يرينا كازيۋلينا كۇمىس مەدالدى موينىنا ءىلدى. ايەلدەر كۇرەسىنەن وتكەن جارىستى جەرلەستەرىمىز ءۇشىنشى ورىنمەن قورىتىندىلادى. ءبىزدىڭ الدىمىزدا ۋكراينا (3+2+2) مەن قىتاي (2+2+5). سونداي-اق بۇل باسەكەدە موڭعوليا (1+3+2) مەن ءۇندىستاننىڭ (1+1+1) بالۋاندارى دا تابىستى ونەر كورسەتتى.
اتالعان رەيتينگتىك ءتۋرنيردى ءبىز ەندى ەركىن كۇرەس شەبەرلەرىنە ۇلكەن ءۇمىت ارتامىز. قازىردىڭ وزىندە ەكى سالماق دارەجەسى بويىنشا ءتۇرلى-ءتۇستى مەدالدار ساراپقا سالىندى. بۇل باسەكەلەر وتە شيەلەنىستى ءوتتى. 97 كيلو سالماق دارەجەسىندە ەكى جەرلەسىمىز قولا مەدال ءۇشىن كۇش سىناستى. شەشۋشى تۇستا قىتاي بالۋانىن ۇتقان نۇرسۇلتان ازوۆ جەڭىس تۇعىرىنا كوتەرىلسە, بەكزات ۇركىمباي وزبەكتىڭ ورەنىنە ەسە جىبەردى. ال الىپتارمەن ايقاسقان يۋسۋپ باتىرمۇرزاەۆ پەن ومار ەيۋبوۆتان ەش قايىر بولمادى. ولاردىڭ ەكەۋى دە تۇساۋكەسەر كەزدەسۋلەردە وڭباي ءسۇرىندى.