قازاقستان بوكس فەدەراتسياسىنىڭ پرەزيدەنتى كەڭەس راقىشەۆ بوكستان ەرلەر مەن ايەلدەر اراسىنداعى الەم چەمپيوناتتارىنىڭ جەڭىمپازدارى مەن جۇلدەگەرلەرىن قارجىلاي سىياقىمەن ماراپاتتادى.
اتاپ ايتقاندا, 1-14 مامىر كۇندەرى وزبەكستان استاناسىندا ۇيىمداستىرىلعان ەرلەر اراسىنداعى الەم چەمپيوناتىندا كوك تۋىمىزدى كوكتە جەلبىرەتىپ, تاشكەنت تورىندە ءانۇرانىمىزدى شىرقاتقان سانجار تاشكەنباي (48 كگ), ماحمۇد سابىرحان (54 كگ), اسلانبەك شىمبەرگەنوۆ (71 كگ) جانە نۇربەك ورالبايعا (80 كگ) كەڭەس راقىشەۆ جارىس الدىندا ءوزى ۋادە ەتكەندەي 100 مىڭ اقش دوللارىن تابىستاسا, كۇمىس جۇلدەگەر اتانعان دۋلات بەكباۋوۆقا (67 كگ) 50 مىڭ اقش دوللارى كولەمىندە سىياقى بەردى. سونىمەن قاتار كەڭەس راقىشەۆ دۋلاتقا شۆەيتساريالىق ساعاتتى دا سىيعا تارتتى.
ال ناۋرىز ايىندا نيۋ-دەليدە وتكەن الەم بىرىنشىلىگىندە ەل قورجىنىنا كۇمىس جۇلدە سالعان كارينا يبراگيموۆا مەن ءلاززات كۇنگەيباەۆا 30 مىڭ, قولا جۇلدەگەرلەر – الۋا بالقىبەكوۆا, ۆالەنتينا حالزوۆا جانە فاريزا شولتاي 10 مىڭ اقش دوللارى كولەمىندەگى قارجىلاي سىياقىعا يە بولدى.
بوكس فەدەراتسياسىنىڭ پرەزيدەنتى بۇل كۇنى بوكسشىلاردىڭ بايراقتى باسەكەدە جەڭىسكە جەتۋىنە زور ۇلەسىن قوسىپ جۇرگەن كوماندا وكىلدەرى – باپكەرلىك قۇرام, كەڭەسشىلەر, كەشەندى عىلىمي توپ مۇشەلەرىن دە نازاردان تىس قالدىرعان جوق. شتاتتاعى جاتتىقتىرۋشىلار, جەكە باپكەرلەر, دارىگەرلەر, ماسساج جاساۋشىلار جانە باسقا دا ماماندار 1 مىڭنان 15 مىڭ اقش دوللارى كولەمىندە سىياقى الدى.
«الەم چەمپيوناتى كەزىندە بىزگە قىزۋ قولداۋ كورسەتكەن ەل جانكۇيەرلەرىنە تاعى دا ەرەكشە العىس ايتامىن. فەدەراتسيا, كوماندا ءۇشىن بۇل – ۇلكەن مارتەبە. ءبىز ارقاشان سەنىمدى اقتاۋعا تىرىسامىز. قازىر ەلىمىزدىڭ بوكس قۇراماسى الەمدىك بوكس رەيتينگىندە كوش باستاپ تۇر. مەملەكەت باسشىسى قاسىم-جومارت توقاەۆ چەمپيوندارىمىزدى العاشقىلاردىڭ ءبىرى بولىپ قۇتتىقتادى. ەلگە ورالعاننان كەيىن بوكسشىلاردى اقوردادا قابىلداپ, ماراپاتتادى. بۇل ەڭبەگىمىزدىڭ ەلەنگەنىن, باعالانعانىن بىلدىرەدى. بۇگىنگى ءىس-شارامىز ەرەكشە ەكەنىن ايتىپ وتەيىن. ويتكەنى ءبىز سپورتشىلار مەن باپكەرلەردى عانا ەمەس, العاشقى رەت چەمپيوندارىمىزدىڭ انالارىن دا ماراپاتتاپ وتىرمىز. بۇدان بىلاي بۇل داستۇرگە ەنەدى دەپ ويلايمىن. الىپ انادان تۋادى, سوندىقتان اق جاۋلىقتى انالارىمىزعا ۇلكەن العىس ايتامىن», دەدى كەڭەس راقىشەۆ ءوزىنىڭ قۇتتىقتاۋ سوزىندە.
ەلىمىزدىڭ بىرنەشە قالاسىنان ارنايى كەلگەن چەمپيونداردىڭ انالارىنا كەڭەس راقىشەۆ گۇل شوعى مەن 2 ميلليون تەڭگەنىڭ سەرتيفيكاتىن سىيلادى. ال وزبەكستان استاناسىنداعى الەم چەمپيوناتىندا تاماشا ناتيجە كورسەتكەنى ءۇشىن ەرلەر قۇراماسىنىڭ باس جاتتىقتىرۋشىسى مىرزاعالي ايتجانوۆقا 25 مىڭ اقش دوللارىمەن قوسا تەمىر تۇلپار تارتۋ ەتتى.