استانادا قورعانىس مينيسترلىگىنىڭ باس اسكەري كلينيكالىق گوسپيتالى اشىق ەسىك كۇنىن وتكىزدى. قورعانىس سالاسىنداعى جەتەكشى كلينيكانى كورۋگە «دانالىق» جوعارى مەديتسينالىق كوللەدجىنىڭ جانە رەسپۋبليكالىق مەديتسينا اكادەمياسىنىڭ ەلۋدەن استام ستۋدەنتى كەلدى.
بولاشاق دارىگەرلەردى گوسپيتال باستىعىنىڭ ورىنباسارى-مەديتسينالىق ءبولىم باستىعى, مەديتسينا قىزمەتىنىڭ پولكوۆنيگى رۋسلان جانزاقوۆ قارسى الدى. ول «گوسپيتال قابىلداۋ بولىمىنەن باستالاتىنىن» ايتىپ, بۇل جەردە جالپى سانى 29 بولىمشە بار ەكەنىن, ونىڭ 15-ءى ستاتسيونارلىق ەمدەۋگە ارنالعانىن تانىستىرىپ ءوتتى.
كوپسالالى مەديتسينالىق ەمدەۋ مەكەمەسى 2000 جىلدىڭ 3 ساۋىرىندە قۇرىلعان. مۇندا 300-دەن اسا مەديتسينا قىزمەتكەرى جۇمىس ىستەيدى. ولاردىڭ اراسىندا «قازاقستان رەسپۋبليكاسىنىڭ دەنساۋلىق ساقتاۋ سالاسىن دامىتۋعا قوسقان ۇلەسى ءۇشىن» توسبەلگىسىمەن ماراپاتتالعان مەديتسينا عىلىمدارىنىڭ دوكتورلارى مەن كانديداتتارى, دەنساۋلىق ساقتاۋ ۇزدىكتەرى دە بار.
جىل سايىن مەكەمەدە ءتۇرلى سىرقاتپەن ءۇش مىڭعا جۋىق پاتسيەنت ستاتسيونارلىق ەم قابىلدايدى, ولارعا نەگىزگى مەديتسينالىق قىزمەتتەن باستاپ كۇردەلى وپەراتسياعا دەيىن مامانداندىرىلعان مەديتسينالىق كومەك كورسەتىلەدى.
گوسپيتال پاتسيەنتتەرى – كادەتتەر, كۋرسانتتار, مەرزىمدى قىزمەتتەگى ساربازدار, وفيتسەرلەر قۇرامى, كەلىسىمشارت بويىنشا اسكەري قىزمەتشىلەر جانە ولاردىڭ وتباسى مۇشەلەرى. ءۇش جىل بويى گوسپيتال حالىققا كەپىلدى كومەك رەتىندە بەرىلەتىن تەگىن جانە مىندەتتى الەۋمەتتىك مەديتسينالىق ساقتاندىرۋ شەڭبەرىندە اقىلى مەديتسينالىق قىزمەت كورسەتىپ كەلەدى.
گوسپيتال ازاماتتىق دەنساۋلىق ساقتاۋ ۇيىمدارىمەن, ۇلتتىق عىلىمي ورتالىقتارىمەن ىنتىماقتاسا ەڭبەك ەتىپ كەلەدى. 2013 جىلى مەديتسينالىق مەكەمە «استانا مەديتسينا ۋنيۆەرسيتەتى» كەاق كافەدرالارىنىڭ كلينيكالىق وقۋ بازاسىنا اينالدى.
مەديتسينالىق وقۋ ورىندارىنىڭ ستۋدەنتتەرىنە اسكەري دارىگەرلەر قىزمەتىنىڭ ەرەكشەلىگى, ونىڭ ازاماتتىق دەنساۋلىق ساقتاۋ سالاسىنان ايىرماشىلىعى تۋرالى جان-جاقتى ايتىلدى. ولار سونداي-اق اسكەري قىزمەتشىنىڭ الەۋمەتتىك پاكەتىنىڭ كولەمى, كاسىبي تۇرعىدا ءوسۋ پەرسپەكتيۆالارى تۋرالى تولىق اقپارات الدى. اسكەري دارىگەرلەردىڭ تاياۋ جانە الىس شەتەلدەردىڭ جوعارى وقۋ ورىندارىندا بىلىكتىلىگىن ارتتىرۋعا, قورعانىس مينيسترلىگىنىڭ اسكەري مەديتسينا ورتالىعىندا دايارلىقتان وتۋگە, بىتىمگەرلىك ميسسيالارعا قاتىسا وتىرىپ, بىرەگەي تاجىريبە الۋعا مۇمكىندىگى بار.