تەننيستەن «ۇلكەن دۋلىعا» ساناتىنداعى فرانتسيا اشىق چەمپيوناتىنىڭ كەزەكتى جارىس كۇنىندە ءۇش وتانداسىمىز كورتقا شىعىپ, تەك ەلەنا رىباكينا عانا كەلەسى اينالىمعا جولداما الدى.
قازاقستاننىڭ ءبىرىنشى, الەمنىڭ 4-راكەتكاسى ەلەنا رىباكينا رولان گارروس ءتۋرنيرىنىڭ العاشقى اينالىمىندا دۇنيەجۇزىلىك رەيتينگتە 146-ورىندا تۇرعان 16 جاستاعى چەحيالىق برەندا فرۋحۆيرتوۆامەن شەبەرلىك بايقاستى. ءبىرىنشى پارتيادا برەندا جاستىعىنا قاراماي, التى گەيم بويى تاجىريبەلى قارسىلاسىنا لايىقتى قارسىلىق كورسەتىپ, ەلەنانى ءبىراز ابىگەرگە سالدى. ءتىپتى ەسەپ 3:3 بولعان مەزەتتە چەحيالىق سپورتشى برەيك جاساپ, ەسەپتە العا شىعىپ الدى. بىراق وتانداسىمىز قارسىلاسىنىڭ ويىنىنا بەيىمدەلىپ العان سوڭ, قامشى سالدىرعان جوق – 6:4. ب.فرۋحۆيرتوۆا ەكىنشى پارتيادا دا برەيك جاساعانىمەن, ە.رىباكينا تارازى باسىن قايتا تەڭەستىرىپ, ماتچتى كەزەكتى برەيكپەن تۇيىندەدى – 6:2. ەلەنا ەكىنشى اينالىمدا تاعى ءبىر چەحيالىق تەننيسشى, الەمنىڭ 50-راكەتكاسى ليندا نوسكوۆامەن شەبەرلىك بايقاسادى.
وكىنىشكە قاراي, الەكساندر بۋبليك 3 ساعات 20 مينۋتقا جالعاسقان تارتىستى ويىندا يتاليالىق دجۋليو زەپپيەريدەن بەس سەتتە – 0:6, 6:4, 6:4, 3:6, 5:7, تيموفەي سكاتوۆ الەمنىڭ 29-راكەتكاسى بولگاريالىق گريگور ديميتروۆتەن ءۇش سەتتە – 6:0, 6:3, 6:2 ەسەبىمەن جەڭىلىپ قالدى.