بىلتىردان بەرى قىزىلوردادا ءبىر يگى ءىس قولعا الىنعان. «لۋكويل» مۇناي كومپانياسى ءوز كاسىبىن اشىپ, تىرلىگىن جاساعىسى كەلەتىن ادامدارعا قايتارىمسىز 1 ميلليون تەڭگە كولەمىندە نەسيە بەرە باستادى. جوبا «اقنيەت» دەپ اتالدى. مۇنداي باستامانى وبلىس اكىمى قىرىمبەك كوشەرباەۆ كوتەرىپ, مۇناي كومپانياسى ايماق باسشىسىنىڭ ۇسىنىسىن ومىرگە ەندىرگەنىن ايتقان ابزال. وتكەن جىلى كاسىپ باستاۋعا نيەت بىلدىرگەن 75 جوبا جۇزەگە استى. ناتيجەسىن اراعا جىل سالىپ ۇيىمداستىرىلعان كورمەدەن كوردىك. ءبىرى شاشتاراز, ەندى ءبىرى ناۋبايحانا, بالاباقشا, تىگىن تسەحىن اشىپ, اۋىلعا قاجەتتى قىزمەت تۇرلەرىن كورسەتىپ جاتىر ەكەن. جىل بويى جاساعان جۇمىستارىن كاسىپكەرلەر وسى كورمەدە تانىستىردى. كاسىپكەرلەر ۇلكەن قولداۋ بولعانىن ايتتى.
ال, بۇرناعى كۇنى «لۋكويل وۆەرسيز سەرۆيس» مۇناي كومپانياسى قارجىلاندىراتىن «اقنيەت» الەۋمەتتىك باعدارلاماسىنىڭ 1 ميلليون تەڭگەگە دەيىن قايتارىمسىز نەسيە گرانتتارىنىڭ جەڭىمپازدارى انىقتالدى. باعدارلامانىڭ ۇزدىك دەپ تانىلعان 97 جوبا يەسىنە ايماق باسشىسى قىرىمبەك كوشەرباەۆ پەن «لۋكويل وۆەرسيز سەرۆيس» كومپانياسىنىڭ قازاقستاندىق فيليالىنىڭ ديرەكتورى اندرەي كيريللوۆ گرانت سەرتيفيكاتتارىن سالتاناتتى تۇردە تابىستادى.
– 1 ميلليون قايتارىمسىز گرانت اۋىلدىق جەردە كاسىپ باستاۋعا ۇلكەن كومەك بولعانى ءسوزسىز. شاعىن جانە ورتا كاسىپكەرلىكتى 5 ەسە ارتتىرۋىمىز قاجەت. ءوتكەن جىلى وڭىرگە الەۋمەتتىك كاسىپكەرلىك كورپوراتسياسى ارقىلى 3 ميلليارد تەڭگە بەرىلدى. بيىل تاعى 4 ميلليارد تەڭگە الامىز. باستىسى كاسىپكەرلەردىڭ جاقسى جوبالارى بولسا, جۇزەگە اسىرۋىنا قولداۋ بىلدىرەمىز, – دەدى وبلىس اكىمى.
بيىل كونكۋرسقا 1200-گە جۋىق ۇمىتكەر ءوز جوبالارىن ۇسىنعان. سونىڭ تالاپقا ساي كەلگەن 95 جوباسىنا 1 ميلليون تەڭگەگە دەيىن قايتارىمسىز گرانتتار بەرىلىپ وتىر.
– اۋىل تۇرعىندارىنىڭ بەلسەندىلىگى جوعارى. ءبىر جىلدىڭ قورىتىندىسى بويىنشا جاسالعان كورمەنى ارالاپ كوردىك. ناتيجەنىڭ قانداي دەڭگەيدە ەكەنى انىق اڭعارىلىپ تۇر. كونكۋرسقا قاتىسۋعا نيەت بىلدىرگەندەر كوپ. جوبالاردىڭ ەلدى مەكەندەرگە قاجەتتىلىگى ەسكەرىلدى,– دەدى اندرەي كيريللوۆ.
«اقنيەت» باعدارلاماسىنىڭ شەڭبەرىندە «الەۋمەتتىك كاسىپكەر», «جاڭالىق», «قولونەر», «قامقور», «باستاما» جانە «يگىلىك» دەگەن نوميناتسيالار بويىنشا بايقاۋعا مۇمكىندىگى شەكتەۋلى جاندار, جالعىزباستى انالار, كوپ بالالى جانە تۇرمىسى تومەن وتباسىلار قاتىسقانىن ايتا كەتەيىك.
ەرجان بايتىلەس,
«ەگەمەن قازاقستان».
قىزىلوردا وبلىسى.