تاتارستاننىڭ باس شاھارىندا ءداستۇرلى «قازان مارافونى» ءوتتى. بۇل جارىستا رەسەيدىڭ 80 ايماعى مەن الەمنىڭ 16 مەملەكەتىنەن كەلگەن 11 566 سپورتشى باق سىنادى.
2015 جىلدان بەرى ۇيىمداستىرىلىپ كەلە جاتقان جارىستىڭ 42,2 شاقىرىمدىق سايىسىندا وسىعان دەيىن تەك رەسەيدىڭ وكىلدەرى عانا توپ جارىپ كەلگەن. اتاپ ايتساق, يۋري چەچۋن (2015, 2020 جىلدارى) مەن ستەپان كيسەلەۆ (2019, 2021) ەكى مارتەدەن جەڭىمپاز اتانسا, اندرەي سافرونوۆ (2016), الەكسەي تروشكين (2017), ارتەم الەكسەەۆ (2018) جانە راۋل شاكريزيانوۆ (2022) ءبىر-ءبىر رەتتەن دارا شىقتى. ال بيىلعى دودادا قازاقتىڭ ۇلى دانيار ورمانعاليعا تەڭ كەلەر ەشكىم تابىلمادى.
مارافونشىلار باسەكەسىنە 1 700 ۇمىتكەر قاتىستى. سولاردىڭ اراسىنان دانيار ورمانعالي دارالاندى. جوعارىدا اتالعان قاشىقتىقتى ول 2 ساعات 25 مينۋت 53 سەكۋندتا جۇگىرىپ ءوتتى. ءسويتىپ, مارتەبەسى جوعارى جارىستىڭ باس جۇلدەسى جەتىسۋ وبلىسىنداعى سارقان اۋدانىنىڭ تۋماسىنا بۇيىردى. ەكىنشى ورىندى يەلەگەن اتاقتى سپورتشى اندرەي سميرنوۆ قانداسىمىزدان ەكى مينۋتتان اسا ۋاقىت قالىپ قويدى. ءۇشىنشى ساتىعا تابان تىرەگەن يۆان ءماتوريننىڭ ناتيجەسى – 2 ساعات 30 مينۋت 48 سەكۋند.
23 جاستاعى جەلمەن جارىسقان جەلاياق دانيار ورمانعاليدىڭ سپورتتىڭ بۇل تۇرىندە باعىندىرعان بەلەستەرى از ەمەس. ول – جەڭىل اتلەتيكادان قازاقستان ۇلتتىق قۇراما كومانداسىنىڭ مۇشەسى, ەلىمىزدىڭ بىرنەشە دۇركىن چەمپيونى, ەۋرازيا ويىندارى مەن ورتالىق ازيا بىرىنشىلىگىنىڭ جەڭىمپازى. سونىمەن قاتار قازاق مارافونشىسى بىرقاتار حالىقارالىق جارىستا الدىنا جان سالعان جوق.