«Astana Qazaqstan Team» كومانداسىنىڭ ۇلىبريتانيالىق ارداگەر ۆەلوشاباندوزى مارك كاۆەنديش ريمدە مارەسىنە جەتكەن ايگىلى «دجيرو د’يتاليا» جارىسىنىڭ سوڭعى كەزەڭىندە جەڭىس تۇعىرىنان كورىندى. «استانا» ۆەلوكلۋبىنىڭ قاتارىن جىل باسىندا تولىقتىرعان 38 جاستاعى سپورتشى يتالياداعى گراند-تۋر تاريحىندا كەزەڭ جەڭىمپازى اتانعان ەڭ ەگدە ۆەلوشاباندوز اتانىپ وتىر. بۇعان دەيىنگى رەكورد كەزىندە «استانا» ساپىندا باق سىناعان يتاليالىق پاولو تيرالونگوعا (37 جاس) تيەسىلى ەدى.
سونىمەن قاتار مارك كاۆەنديش «دجيرو د’يتاليا» تاريحىنداعى تاعى ءبىر رەكوردتى جاڭارتتى. ياعني بريتانيالىق ۆەلوشاباندوزدىڭ ەڭ ءبىرىنشى جانە سوڭعى جەڭىسىنىڭ اراسىن تۇپ-تۋرا 15 جىل 15 كۇن ءبولىپ تۇر. ول يتاليا گراند-تۋرىندا العاش رەت 2008 جىلدىڭ 13 مامىرىندا جەڭىسكە جەتكەن بولسا, سوڭعى مارتە 2023 جىلدىڭ 29 مامىرىندا دارا شىقتى. بۇعان دەيىنگى رەكورد يتاليالىق دجينو بارتاليگە تيەسىلى بولاتىن. ونىڭ ءبىرىنشى جانە سوڭعى جەڭىسىنىڭ اراسى – 15 جىل 9 كۇن.
اپەننين تۇبەگىندەگى ءسانى مەن سالتاناتى جاراسقان ەڭ كونە شاھاردىڭ ءبىرى سانالاتىن ءريمنىڭ ورتالىق كوشەلەرىندە ۇيىمداستىرىلعان جارىستىڭ 21-كەزەڭدە «استانا» وكىلى الدىنا جان سالعان جوق. 126 شاقىرىمعا سوزىلعان سوڭعى كەزەڭدەگى سپرينتەرلەر جارىسىندا مارك مارە سىزىعىن 2 ساعات 48 مينۋت 26 سەكۋند ىشىندە كەسىپ ءوتىپ, جالپى 17-مارتە كەزەڭ جەڭىمپازى اتاندى.
ۇلىبريتانيالىق ۆەلوشاباندوز بۇل كەزەڭدە ۇزاق ۋاقىت بويى قالىڭ توپتىڭ اراسىندا ءجۇرىپ, بار كۇشىن سوڭعى شاقىرىمداعى سپرينتەرلەردىڭ سايىسىنا ساقتاپ وتىردى. ءسويتىپ, مارەگە ساناۋلى مەترلەر قالعاندا كاۆەنديش قالىڭ توپپەن بىرگە شابۋىلعا شىعىپ, اقىر سوڭىندا ءبارىن شاڭ قاپتىرىپ كەتتى. كەيىنگى ەكى ورىنعا ليۋكسەمبۋرگ وكىلى الەكس كيرش («Trek-Segafredo») پەن يتاليالىق فيليپپو فيورەللي («Green Project – Bardiani-CSF») يە بولدى.
106 مارتە ۇيىمداستىرىلعان «دجيرو د’يتاليا» جارىسىنىڭ بيىلعى ماۋسىمىندا 33 جاستاعى سلوۆەنيالىق ۆەلوشاباندوز پريموج روگليچ («Jumbo – Visma») توپ جاردى. ونىڭ ۋاقىت كورسەتكىشى – 85 ساعات 29 مينۋت 2 سەكۋند. ەكىنشى ورىندى 2018 جىلعى «تۋر دە فرانس» جارىسىنىڭ جەڭىمپازى 37 جاستاعى ۇلىبريتانيالىق گەراينت توماس («INEOS Grenadiers») يەلەنسە, ۇزدىك ۇشتىكتى پورتۋگاليالىق دجواۋ المەيدا («UAE Team Emirates») تۇيىندەدى.
جەكەلەي اتالىمداعى جەڭىمپازدارعا توقتالار بولساق, 22 جاستاعى يتاليالىق دجوناتان ميلان («Bahrain Victorious») 217 ۇپايمەن سپرينتەرلەر سايىسىندا ۇزدىك شىقسا, 101 ۇپايى بار مارك كاۆەنديش ءتورتىنشى ورىنعا تۇراقتادى. «Groupama – FDJ» كومانداسىنىڭ فرانتسيالىق وكىلى تيبو پينوت تاۋلى كەزەڭنىڭ كورولى اتانسا, جاس ۆەلوشاباندوزدار اراسىندا پورتۋگاليالىق دجواۋ المەيدا («UAE Team Emirates») ۇزدىك شىقتى. ال كوماندالىق سايىستا باحرەيننىڭ «Bahrain Victorious» كومانداسى باس جۇلدەگە يە بولدى. ولاردىڭ ۋاقىت كورسەتكىشى – 256 ساعات 21 مينۋت 18 سەكۋند. كوشباسشىدان 1 ساعات 31 مينۋت 44 سەكۋندقا قالىپ قويعان «استانا» كومانداسى جالپى ەسەپتە جەتىنشى ورىندى قاناعات تۇتتى.