وسىدان ءبىر جىل بۇرىن سىبە كولىندە سۋعا باتىپ بارا جاتقان ورىمدەي ءۇش قىزدى قۇتقارىپ, ءوز ءومىرىن قيعان مەيىر سەرىك ۇلى دەگەن ازاماتتىڭ ەسىمىن ەل ءبىلىپ ءجۇرۋى كەرەك شىعار. كۇنى بۇگىنگە دەيىن باتىر ۇلدىڭ اتا-اناسى ء«بىزدىڭ بالا ەرلىك جاسادى» دەپ ەشكىمگە ءتىس جارماعان. اكەسى وقۋ ورنىنا قۇجاتتارىن ىزدەپ بارماعاندا, سول كۇيى ايتىلماي دا قالۋى مۇمكىن ەدى...
قايعىلى جاعداي 2022 جىلدىڭ 13 ماۋسىمىندا بولدى. س.امانجولوۆ اتىنداعى ۋنيۆەرسيتەتتىڭ 3-كۋرس ستۋدەنتى مەيىر سەرىك ۇلى ءبىر كۇن بۇرىن تانىسقان قىزدىڭ وتىنىشىمەن ءۇش قۇربىنى وسكەمەننەن 50-60 شاقىرىم جەردەگى سىبە كولىنە اپارعان. ساعات ۇشتەر شاماسىندا ءۇش قىز كولدىڭ تەرەڭ جەرىنە كەتىپ قالسا كەرەك, تۇنشىعا باستايدى. ءدال سول ءساتتى جاعادان بەينەتاسپاعا ءتۇسىرىپ جاتقان مەيىر قالتا تەلەفونىن تاستاي سالا كومەككە ۇمتىلعان. وكىنىشتىسى, ءۇش قىزدى قۇتقارعانىمەن, ءوزى سول جەردە ومىرمەن قوش ايتىسادى. بەينەجازبا دەمەكشى, مەيىردىڭ تەلەفون كامەراسىنا وقيعانىڭ شەت جاعاسى ءتۇسىپ تە قالعان.
– اركىم ءوز بالاسىن ماقتايدى عوي. دەسە دە, مەنىڭ تۇڭعىشىم 21 جاسقا دەيىن بىردە-ءبىر رەت جاماندىعىن كورسەتپەدى. ءۇي شارۋاسىنىڭ ءبارىن ءوزى رەتتەيتىن. امال نە؟ قاناتىم قىرقىلعانداي كۇيگە ءتۇستىم. ءوزىمىز مارقاكولدىڭ تۋماسى بولعانىمىزبەن, ۇلان اۋدانىندا تۇرامىز. ۇلىم بيىل وقۋىن ءتامامداپ, ەكونوميست ماماندىعىن الىپ جاتار ەدى... بۇل تۋرالى ۇندەمەي-اق تا قويار ەدىك. ءۇش قىزدىڭ اتا-اناسى كەلىپ, راحمەت ايتپاي-اق قويسىن, جۇباتىپ, كوڭىل دە ايتپادى. جارايدى, اركىمنىڭ ءوز ورەسى بار. كەيىن قۇجاتتارىن جيناپ الايىن دەپ وقۋ ورنىنا بارعانىمدا «بەرەشەك كىتاپتارى بار ما, وقۋىنىڭ اقشاسى تولەندى مە؟» دەگەندەي سۇراقتار قويدى. ولار ءۇشىن دۇرىس تا شىعار. بىراق ۇلىمنىڭ ءۇش قىزدى قۇتقارىپ, جازىم بولعانىن ۋنيۆەرسيتەتى ءبىلىپ وتىر. كەرىسىنشە, الدىمنان شىعىپ, ءىس-قاعازداردى رەتتەپ بەرسە, مەنىڭ توبەم كوككە جەتەر ەدى عوي. ونىڭ قاسىندا كۇشىكتى قۇتقارىپ قالعانداردى دا ماراپاتتاپ جاتادى, – دەپ اكەسى سەرىك نابىكەنوۆ بولعان وقيعانى تارقاتىپ ايتىپ بەردى.
راس, كەيدە قولدان باتىر جاساپ, بولماشى ءىس تىندىرعانداردى كوككە كوتەرىپ جاتامىز. ونىڭ قاسىندا مەيىر ءبىر-ءبىر ءۇيدىڭ الپەشتەپ وتىرعان ءۇش قىزىن ءولىم اۋزىنان امان الىپ قالۋى كوزسىز ەرلىك دەر ەدىك.
– ءدال سول كۇنى ەرتە شىقتىم ۇيدەن. ادەتتە ۇلىمدى وياتىپ, تاپسىرما بەرەتىنمىن. بۇل جولى ۇيقىسىن قيمادىم. الدىنداعى كۇنى عانا ءبىراز شارۋا تىندىرعان ەدى. وقيعا قالاي بولدى, تولىق بىلمەدىم. ايتەۋىر ءوزىمدى قويارعا جەر تاپپاي قوبالجىپ ءجۇردىم. ۇلىمدى ۇنەمى قاداعالاپ وتىراتىنمىن. سول كۇنى دە قوڭىراۋ شالدىم, تۇتقانى كوتەرمەدى. وقۋىندا دەپ ويلادىق. ءارى-بەرى جۇگىرىپ ءجۇرىپ, ءوزىم دە تەلەفونىمدى ۇمىتىپ كەتىپپىن. كەشكى بەستەر شاماسىندا تەلەفونىمدى تاۋىپ قاراسام, بوتەن نومىردەن التى قوڭىراۋ ءتۇسىپتى. قايتا حابارلاسسام, پوليتسيادان ەكەن. سول جەردە ەستىرتتى, ەسەڭگىرەتتى... الىپ-ۇشىپ, كولگە جەتتىم. ەندى ويلايمىن عوي, قىزدار ۋاقىتىلى كومەككە شاقىرسا, شىعارىپ تا الار ما ەدى؟ سەبەبى بالىقشىلار كەلىپ, سۋدان شىعارعاندا جۇرەك سوعىسى بولعان ەكەن. جەدەل جاردەم ءبىر ساعاتتا جەتكەن. ودان پوليتسيا بارعان. مەن بارعاندا ءۇش قىز وتىر. كىم نە دەدى, ەسىمدە جوق. التىن اسىقتاي ۇلىم ەدى. ءبىر ەمەس, ءۇش جاننىڭ ءومىرىن قۇتقاردى. قارىنداسى دا ءدال سول كەزدە ۇبت تاپسىرىپ جاتتى. كوڭىلى الاي-دۇلەي بولدى دا قالدى. كەنجە ۇلىم ساكەن مەنەن گورى اعاسىنا جۋىق ەدى. ءبىر ەلى قاسىنان قالمايتىن. ول دا جەتىمسىرەپ قالدى. اناسىنىڭ قانداي كۇيدە ەكەنىن ايتپاسام دا بولادى. ساعىنامىز, – دەيدى اكە جۇرەگى قان جىلاپ.
ءيا, «جازمىشتان وزمىش جوق» دەيدى قازاق. اكەسى سەرىك نابىكەنوۆتىڭ ەندىگى تىلەگى, بالاسىنىڭ ەرلىگى ءباسپاسوز بەتىندە قالىپ, سوڭىنان ەرگەن ءىنى-قارىنداسىنىڭ ماقتانىشى بولسا دەيدى. وقۋ ورنى تاراپىنان دا ەرلىگى ەسكەرىلىپ, ەسىمى ستۋدەنتتەر اراسىندا دا ايتىلىپ جۇرسە ارتىقتىق ەتپەس ەدى.
شىعىس قازاقستان وبلىسى,
ۇلان اۋدانى