ەلىمىزدىڭ باسىم بولىگىندە تۇراقسىز اۋا رايى ساقتالادى

«قازگيدرومەت» رمك ۇسىنعان مالىمەت بويىنشا, رەسپۋبليكانىڭ باسىم بولىگىندە اتموسفەرالىق فرونتالدى ۋچاسكەلەردىڭ وتۋىنە بايلانىستى تۇراقسىز اۋا رايى ساقتالادى. الماتى وبلىسىنىڭ وڭتۇستىگىندە جانە تاۋلى ايماقتارىندا نايزاعاي ويناپ, جاڭبىر, بۇرشاق جاۋى مۇمكىن.

رەسپۋبليكا بويىنشا جەل كۇشەيەدى, باتىستا جانە وڭتۇستىكتە شاڭدى داۋىل تۇرادى.

«پاۆلودار وبلىسىنىڭ باسىم بولىگىندە, قاراعاندى وبلىسىنىڭ شىعىسىندا, اتىراۋ وبلىسىنىڭ وڭتۇستىگىندە, اباي وبلىسىنىڭ بەسقاراعاي اۋدانىندا توتەنشە ءورت قاۋپى ساقتالادى», دەلىنگەن حابارلامادا.

استانادا – كوشپەلى بۇلت شىعادى, كۇندىز ازداپ جاڭبىر جاۋادى. سولتۇستىك-شىعىستان سوعاتىن جەل تۇندە 2-7 م/س, كۇندىز 7-12 م/س بولادى. اۋا تەمپەراتۋراسى تۇندە +8+10°س, كۇندىز +23+25°س.

الماتىدا – كوشپەلى بۇلت شىعادى, كۇندىز كەي جەرلەردە جاڭبىر جاۋادى, نايزاعاي وينايدى. سولتۇستىك-شىعىستان 3-8 م/س جەل سوعادى. اۋا تەمپەراتۋراسى تۇندە +12+14°س, كۇندىز +21+23°س.

شىمكەنتتە – كوشپەلى بۇلت شىعادى, كۇندىز وتكىنشى جاڭبىر جاۋادى, نايزاعاي وينايدى. شىعىستان سوعاتىن جەلدىڭ كۇشى 8-13, كۇندىز ەكپىنى 15-20 م/س. اۋا تەمپەراتۋراسى تۇندە +14+16°س, كۇندىز +27+29°س.