ۇلتتىق ۋنيۆەرسيتەت تۇلەكتەرىن جينادى

ۋنيۆەرسيتەتتىڭ قۋانىشىنا ورتاق­تاسقان تۇلەكتەردىڭ قاتارىندا عىلىم جانە جوعارى ءبىلىم ءمينيسترى ساياسات نۇربەك, بەلگىلى شاحماتشى دارمەن سا­دۋا­قاسوۆ, اقپارات جانە قوعامدىق دامۋ مينيسترلىگى ەتنوسارالىق قاتىناس­تاردى دامىتۋ كوميتەتىنىڭ توراعاسى عا­لىم شويكين, گيننەستىڭ رەكوردتار كىتابىنا ەنگەن الىپ كۇش يەسى سەرگەي تسىريۋلنيكوۆ تاعى باسقالار بولدى. اۋقىمدى باعدارلاما تۇلەكتەردىڭ فورۋمى, «ENU Research» – «PechaKucha» فورماتىنداعى تانىمال عالىمداردىڭ ونەر كورسەتۋى, «ۇستاز» كوۆوركينگ-ورتا­لىعىنىڭ اشىلۋى, ۇلتتىق قولونەر جانە كىتاپتار كورمە-جارمەڭكەسى, قازاقشا كۇرەستەن «ENU بارىسى» ءتۋرنيرى, وpen air «ENU Family Day» كونتسەرتى جانە تاعى باسقا ۋنيۆەرسيتەت اۋماعىندا بىرقاتار ءبىلىم, عىلىمي, مادەني جانە سپورتتىق ءىس-شارالاردى قامتىدى. وعان ەكى مىڭعا جۋىق ادام قاتىستى.

– وتكەن جىلى ەۋرازيا ۇلتتىق ۋني­ۆەر­سيتەتىنە «زەرتتەۋ ۋنيۆەرسيتەتى» مارتەبەسى بەرىلدى. قازىر ۋنيۆەرسيتەتتىڭ ارنايى 5 جىلدىق زەرتتەۋ جوسپارى, جاڭا زەرتحانالار, جاس عالىمدارعا ارنالعان ۇلكەن رەسۋرستىڭ جايى پىسىقتالىپ جاتىر. جاقىن ارادا ول ۇكىمەتتىڭ قاراۋىنا شىعارىلادى. وقۋ ورداسىنىڭ جاس عالىمدارى «بولاشاق» باعدارلاماسىنا بەلسەندى قاتىسادى. عالىمداردىڭ عىلى­مي ماقالالارى Q1, Q2 كۆارتيلىنىڭ حالىقارالىق باسىلىمدارىندا جاريا­لانادى. جاقىن ارادا ءبىز ەۋرازيا ۇلتتىق ۋنيۆەرسيتەتىنىڭ عىلىمي زەرتتەۋ الەۋەتىن بىرلەسىپ ارتتىراتىن بولامىز, – دەدى  ساياسات نۇربەك.

ءىس-شارانىڭ عىلىمي ءبولىمى «Pecha­Kucha» «ENU RESEARCH: from idea to action» فورماتىندا ءوتتى. فورۋم­دى اشقان ۋنيۆەرسيتەتتىڭ كوممەرتسيا­­لاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا ءىس-شارا زاماناۋي «Pecha­Kucha» («پەچا كۋچا») فورماتىندا ءوتىپ جاتقانىن, عالىمدار عىلىمي جوبالارىن 200 سەكۋند ىشىندە قىسقاشا ءارى ناقتى تانىس­تىرا الاتىنىن جەتكىزدى. اتالعان ءىس-شارا عالىمداردىڭ عىلىمي ازىرلە­مەلەرىمەن تانىسۋ, جوبالاردى كوممەرتسيالاندىرۋ جانە وندىرىسكە ەنگىزۋ ءۇشىن بيزنەس-سەرىكتەستەردى ىزدەۋ, سونداي-اق ۋنيۆەرسيتەت عىلىمىنىڭ بەدەلىن ارتتىرۋ ماقسا­تىندا ۇيىمداستىرىلدى.

مينيستر اتاپ وتكەندەي, ۋنيۆەرسي­تەت عىلىمىن دامىتۋ, سالاعا جاس عالىم­داردى كوبىرەك تارتۋ ماڭىزدى. بۇل با­عىتتا عىلىم جانە جوعارى ءبىلىم مينيس­ترلىگى ۇلكەن جۇمىس اتقارىپ جاتىر. «پرەزيدەنت تاپسىرماسىنا ساي­كەس, بىلتىردان باستاپ مينيسترلىك جاس عالىمداردى قولداۋدى كۇشەيتتى. ماسە­لەن, وتكەن جىلى 700-دەن استام گرانت ءبولىندى. وسى جىلدان باستاپ گرانتتار سانى 1 مىڭعا دەيىن ۇلعايتىلادى. بۇل جاس عالىمدار ءۇشىن جاقسى قارجىلىق دەمەۋ بولادى ءارى ولارعا وزدەرىنىڭ عىلىمي ازىرلەمەلەرىن ىسكە اسىرۋعا مۇمكىندىك بەرەدى. سونداي-اق بيىل ۇزدىك حالىقارالىق تاجىريبەنى ەسكەرە وتىرىپ, عىلىم جانە تەحنولوگيالار جونىندەگى ۇلتتىق كەڭەس قۇرىلدى», دەدى س.نۇربەك.

سالتاناتتى جيىن بارىسىندا ەۋرا­زيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ «ENU Family Day» اۋقىمدى ءىس-شاراسى العاش رەت وتكىزىلىپ وتىرعانىن جەتكىزدى. «ەۋرازيا ۇلتتىق ۋنيۆەرسيتەتىنىڭ 27-ءشى تۋعان كۇنى قار­ساڭىندا تۇلەكتەردىڭ رەكوردتىق سانى جينالدى. بۇل وتە قۋانىشتى. ءبىزدىڭ ۋنيۆەرسيتەتتە وركەندەپ كەلە جاتقان ۇرپاقتار ساباقتاستىعىنىڭ اجىراماس بايلانىسى ءاردايىم ساقتالسا ەكەن دەيمىز. بۇل الەۋمەتتىك, مورالدىق ءال-اۋقاتتىڭ نەگىزگى قوزعالتقىشتارىنىڭ ءبىرى», دەدى ول.

«PechaKucha» «ENU RESEARCH: from idea to action» فورۋمىندا ەۇۋ عا­لىمدارى, اتاپ ايتقاندا, وقىتۋ­­شى-زەرتتەۋشى كەنجەباتىر بەك­مىر­­زا, پروفەسسور عايني سەيتەنوۆا, اعا وقى­تۋشى, PhD ابدوللا وماروۆ, «يادرو­لىق تەحنولوگيالار پاركى» اق باس­قار­ما توراعاسىنىڭ ورىنباسارى مۇرات قاسىمجانوۆ, يننوۆاتسيالاردى دامىتۋ دەپارتامەنتىنىڭ ديرەكتورى اسەل جەكسەمباەۆا, «عىلىم قورى» اق باس­قار­ما توراعاسىنىڭ ءبىرىنشى ورىنباسارى ءاليا سەمباەۆا, ۋنيۆەرسيتەتتىڭ وقىتۋشى-زەرتتەۋشىلەرى جاقسىلىق ءسابيتوۆ, دميتري شليماس, گۇلنار سۇگىربەكوۆا, اعا وقىتۋشى نۇرزادا امانگەلدى وزدەرىنىڭ عىلىمي جوبالارىن تانىستىردى. عىلىم مەن بيزنەستىڭ ديالوگ الاڭى بارىسىندا سپيكەرلەر وزىق عىلىمي يدەيالارمەن ءبولىسىپ, سۋتەگى وتىن ەلەمەنتتەرى, ەلەكتر ەنەرگياسىن ءوندىرۋدىڭ بيۋدجەتتىك تاسىلدەرى جانە تاعى باسقا تاقىرىپتاردى تالقىلادى.

سونداي-اق ءىس-شارا اياسىندا «ۇستاز» وقىتۋ­شىلارعا ارنالعان العاشقى كوۆور­كينگ-ورتالىقتىڭ اشىلۋ ءراسىمى ءوتتى. جاڭا كوپفۋنكتسيونالدى كەڭىستىك – جەكە جانە ۇجىمدىق كاسىبي قىزمەت, كەلىس­سوزدەر جانە سپورتتىق دەمالىس ءۇشىن ىڭعايلى ورىن. كوۆوركينگ 110 ورىنعا شاقتالعان. ورتالىقتىڭ جالپى اۋدانى 544 شارشى مەتردى الىپ جاتىر. وعان ارنالعان جيھازدى ۋنيۆەرسيتەت قىزمەتكەرلەرى جاساعان.

– ۋنيۆەرسيتەت ءۇشىن ءبىرىنشى كەزەكتەگى مىندەت – ستۋدەنتتەر, وقىتۋشىلار مەن قىزمەتكەرلەر ءۇشىن قولايلى جاع­داي جاساۋ. كوۆوركينگ – ءبىزدىڭ ۋنيۆەر­سيتەتتىڭ ۇلكەن الەۋمەتتىك-مادەني كەڭىس­تىگىنىڭ بولىگى. جىل سايىن ولاردىڭ سانى ارتىپ كەلەدى. ءبىز ءار كورپۋستا اشىق كەڭىستىكتەر قۇرۋدى جوسپارلاپ وتىرمىز. كوۆوركينگتەردەگى جايلى جاعداي تەك شىعارماشىلىق بەلسەندىلىكتى عانا ەمەس, ۇجىمدىق جانە جەكە جۇمىستىڭ تيىمدىلىگىن ارتتىرادى دەپ سەنەمىن, – دەدى جوعارى وقۋ ورنىنىڭ رەكتورى ەرلان سىدىقوۆ.

جاڭا كوۆوركينگ ورتالىعىندا ءۇش ايماق بار. ءبىرىنشىسى كەلىسسوزدەر مەن ءىس-شارالارعا, ەكىنشىسى جۇمىسقا, ءۇشىنشىسى دەمالىسقا ارنالعان. سونداي-اق بىرنەشە تاقىرىپتىق كەڭىستىك بار. ولار – وقۋعا جانە جۇمىس ىستەۋگە ارنالعان تىنىش اي­ماق, ۇستەل ويىندارى بار سپورت الاڭى جا­نە ديۆاندار قويىلعان جايلى دەمالىس ايماعى. جۇمىس ايماقتارى كومپيۋتەر­لەر, ماگنيتتىك-ماركەرلىك تاق­تالار, فليپ-چارتتار سەكىلدى قاجەتتى زات­تارمەن جابدىقتالعان. وقىتۋشىلار ارنايى بولىنگەن جاڭعىرتىلعان كابي­نەت­تەردە جۇمىس ىستەي الادى. ايتا كەتۋ كەرەك, وتكەن جىلى ۋنيۆەرسيتەتتە ستۋدەنت­تەر­گە ارنالعان 4 كوۆوركينگ الاڭى اشىلدى.

تۇلەكتەردىڭ جانە مەتسەناتتاردىڭ ۋني­ۆەر­سيتەتتىڭ دامۋىنا قوسقان ۇلەسىنە ار­نالعان «داڭق اعاشىنا» كاسىپكەر بوريس چەننىڭ ەسىمى مەن «تسەنتركرەديت بانكى­نىڭ» اتاۋى جازىلعان جاپىراقتاردى ورنالاس­تىرۋ ماڭىزدى وقيعالاردىڭ ءبىرى بول­دى. «ەۇۋ ەلىمىزدەگى جەتەكشى ۋني­ۆەرسي­تەتتەردىڭ ءبىرى ەكەنى بەلگىلى. ۇلتتىڭ جەتىستىگى ەكى نەگىز­گى فاك­تورعا – دەنساۋلىق پەن بىلىمگە باي­لانىس­­تى. ءبىز سونداي-اق شاكىرتاقى بەرۋ ارقىلى ەۇۋ-دىڭ الەۋمەتتىك قورعالماعان ستۋ­دەنت­تەرىنە قولداۋ كورسەتەمىز», دەدى بوريس چەن.

قاتىسۋشىلار مەن كورەرمەندەردىڭ كوپشىلىگى «ENU بارىسى» ۋنيۆەرسيتەتتىك ءتۋرنيرىن تاماشالاۋعا جينالدى. جارىس ەكى سالماق دارەجەسىندە: 80 كەلىگە دەيىن جانە ودان جوعارى سالماق بويىنشا ءوتتى. ناتيجەسىندە, جەڭىمپازدار اقشالاي سىيلىقتارمەن ماراپاتتالدى.

«Palau Fest» شاراسىنا كەلگەن ءار ادام تەگىن پالاۋدان ءدام تاتتى. وندا ءبىر تونناعا جۋىق تاماق دايىندالعانىن ايتا كەتەيىك.

«ەۋرازيا جۇلدىزى» ستۋدەنتتىك كون­تسەرتى بارىسىندا ەۋرازيا ۇلتتىق ۋني­ۆەر­سيتەتىنىڭ كولىك-ەنەرگەتيكا فاكۋل­تەتىنىڭ 4-كۋرس ستۋدەنتى دياس تاش­تيەۆ­تىڭ «ار-وجدان» مۋزىكالىق ترەگىنىڭ تۇساۋ­كەسەرى ءوتتى. ءان اۆتورىنىڭ ايتۋىنشا, ار-وجدان – ادامزاتتىڭ ماڭىزدى كورسەت­كىشى. ول جاڭا بيىكتەرگە جەتۋگە, وزىڭىز­گە, باسقالارعا ادال بولۋعا كومەكتەسەدى.

«Jastar Awards» سالتاناتى اياسىندا جوعارى وقۋ ورنىنداعى جاستار ساياساتى ورتا­لىعىنىڭ وكىلدەرىن بىرنەشە نومينا­تسيا بويىنشا ماراپاتتاۋ ءراسىمى ءوتتى. سوند­اي-اق ستۋدەنتتەر اللەياسىندا ەرەسەك­تەر مەن بالالارعا ارنالعان بىرەگەي شىعار­ماشىلىق ايماق: شەبەرحانالار, ەكو-ارت تەراپيا, ۇلتتىق ويىن­دار, كىتاپ كور­مە­لەرى, حالىق ونەرى جارمەڭ­كەلەرى ورنا­­لا­سىپ, سپورتتىق جارىستار, تەاتر قويى­لىمدارى, ۇتىس لوتەرەيالارى ۇيىم­داس­تىرىلدى.

ەۋرازيا ۇلتتىق ۋنيۆەرسيتەتى قۇرىل­عان كۇننەن باستاپ 80 مىڭنان استام مامان شىعارعانىن اتاپ وتكەن ءجون. ۋنيۆەرسيتەت «QS» حالىقارالىق ءبىلىم بەرۋ رەيتينگىندە 277-ورىندا تۇر جانە الەمدەگى ۇزدىك 300 ۋنيۆەرسيتەتتىڭ قاتا­رىنا كىرەدى. وقۋ ورداسى «عىلىمي-زەرت­تەۋ ۋنيۆەرسيتەتى» مارتەبەسىنە يە بولىپ, ەلدىڭ يننوۆاتسيالىق عىلىمي حابىنا اينالا باستادى. جوعارى وقۋ ورنىنىڭ عالىمدارى سۋتەگى ەنەرگەتيكاسىن دامىتۋ, يننوۆاتسيالىق قۇرىلىس ماتەريال­دارىن, 3D پرينتەرلەردى, جاساندى ين­تەللەكتتى پايدالانا وتىرىپ, جاڭا تەحنولوگيالاردى ءوندىرۋ سياقتى وزەكتى جوبالار بويىنشا ناقتى سەكتوردىڭ ءىرى كومپانيالارىمەن ىنتىماقتاستىقتى دامىتۋ ۇستىندە. سونىمەن قاتار وتكەن جىلى ەۇۋ-دا العاش رەت ۋنيۆەرسيتەت تۇلەكتەرى تاراپىنان گرانتتار مەن شاكىرتاقىلار ءبولۋ ارقىلى مۇقتاج ستۋدەنتتەرگە قولداۋ كورسەتۋ, ستۋدەنتتەردىڭ عىلىمي, يننوۆاتسيالىق جانە كاسىپكەرلىك قىزمەتىن ناسيحاتتاۋ ءارى دارىندى جاس­تاردى دامىتۋ ماقساتىندا «Endowment Fund» قۇرىلدى.