كوركەم گيمناستيكادان ەلوردادا ۇيىمداستىرىلعان VI جازعى سپارتاكيادا ءوز مارەسىنە جەتىپ, جۇزدەن جۇيرىك شىققان ەل ۇزدىكتەرى انىقتالدى. باس شاھاردا وتكىزىلگەن جىلدىڭ باستى جارىسىندا ەلىمىزدىڭ ءار وڭىرىنەن كەلگەن ەڭ ۇزدىك 54 گيمناست سىنعا ءتۇسىپ, ءتۇرلى-ءتۇستى جۇلدەلەردى ساراپقا سالدى. سونىمەن قاتار توپتىق جاتتىعۋدا 12 كوماندا ءوز ونەرلەرىن ورتاعا سالدى. بۇل قاتاردا ەلجانا تانيەۆا, ەريكا جايلاۋوۆا, ميلانا پارفيلوۆا سىندى حالىقارالىق باسەكەلەردە ەل نامىسىن قورعاپ جۇرگەن ۇلتتىق قۇراما وكىلدەرى دە بار.
سپورتتى دامىتۋ ديرەكتسياسىنىڭ مالىمەتى بويىنشا, شىعىرشىقپەن ونەر كورسەتۋدە ۇلتتىق قۇراما كوشباسشىلارى ەشكىمگە دەس بەرگەن جوق. باس جۇلدەنى حالىقارالىق دارەجەدەگى سپورت شەبەرى, 2022 جىلعى ازيا چەمپيونى جانە ەكى دۇركىن كۇمىس جۇلدەگەرى شىمكەنتتىك ەلجانا تانيەۆا جەڭىپ السا, تاعى ءبىر شىمكەنت قالاسىنىڭ وكىلى, الەم كۋبوگى جارىستارىنىڭ جۇلدەگەرى ميلانا پارفيلوۆا كۇمىس جۇلدەگە يە بولسا, ەلوردالىق ايبوتا ەرتايقىزى قولا مەدالگە قول جەتكىزدى. سونىمەن قاتار ەلجانا تانيەۆا دوپ جاتتىعۋ بويىنشا وتكەن سايىستا دا چەمپيون اتانسا, ايبوتا ەرتايقىزى – ەكىنشى, ەلوردالىق ەريكا جايلاۋوۆا ءۇشىنشى ورىنعا يە بولدى.
ۇرشىق پەن لەنتا جاتتىعۋىندا دا ەلجانا تانيەۆاعا تەڭ كەلەر قارسىلاس تابىلمادى. كۇمىس جۇلدە ميلانا پارفيلوۆانىڭ, قولا مەدال ەريكا جايلاۋوۆانىڭ ەنشىسىندە كەتتى. كوپسايىستا, ياعني 4 قۇرالمەن ونەر كورسەتۋدە ءار باعدارلامادا تۇراقتى ناتيجە كورسەتكەن ەريكا جايلاۋوۆا التىننان القا تاقسا (115,450 ۇپاي), شىمكەنتتىك ميلانا پارفيلوۆا (111,700 ۇپاي) مەن بايان قويباقار (102,950 ۇپاي) ۇزدىكتەر قاتارىنان كورىندى. بۇل سايىستا فينالعا 15 گيمناست جولداما العان بولاتىن.
ال توپتار اراسىنداعى جانە كوماندالىق كوپسايىستا بىردەي ناتيجە تىركەلدى. ەكى سىندا دا شىمكەنت قالاسىنىڭ سپورتشىلارى ءوز مىقتىلىقتارىن تاعى ءبىر مارتە دالەلدەسە, ودان كەيىنگى ورىندارعا استانا مەن الماتى قالاسىنىڭ ۇجىمى جايعاستى.
كوركەم گيمناستار سايىسىنىڭ اشىلۋ سالتاناتىندا سپورتتى دامىتۋ ديرەكتسياسى ديرەكتورىنىڭ ورىنباسارى, VI جازعى سپارتاكيادانىڭ باس تورەشىسى ازامات يماشەۆ, استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, فەدەراتسيانىڭ باس حاتشىسى قاتىسىپ, ءسوز سويلەگەن.
«بۇل – ەلدەگى بارلىق كوركەم گيمناست ءۇشىن جاۋاپتى جارىس. جۋىردا پورتۋگالياداعى الەم كۋبوگى كەزەڭىندە ءساتتى ونەر كورسەتكەن ۇلتتىق قۇراما سپورتشىلارى دا وسىندا سىنعا تۇسەدى. وسى جارىستا ۇزدىك شىققان سپورتشىلار فيليپپيندە وتەتىن ازيا چەمپيوناتىنا دايىندىقتى باستايدى. ال كۇزدە وزدەرىڭىز بىلەتىندەي, وسى جىلدىڭ باستى باسەكەسى – ازيا ويىندارى بار. سول سىندا گيمناستارعا زور سەنىم ارتامىز», دەدى ازامات يماشەۆ.
سپارتاكيادانىڭ قورىتىندىسى بويىنشا شىمكەنت قالاسىنىڭ گيمناستارى 7 التىن, 5 كۇمىس پەن 1 قولا مەدال ولجالاپ, جالپىكوماندالىق ەسەپتە توپ جاردى. كەيىنگى ورىنعا استانا قالاسىنىڭ (1 التىن, 3 كۇمىس, 4 قولا) سپورتشىلارى جايعاسسا, ۇزدىك ۇشتىكتى الماتى قالاسى (1 التىن, 1 كۇمىس, 2 قولا) وكىلدەرى تۇيىندەدى.