رىباكينا – ريم پاتشايىمى

جارىستى ەلەنا ەكىن­شى اينا­لىمنان باستادى. ال­عا­شىن­دا WTA رەيتينگىندە 64 ورىندا تۇرعان يتاليالىق ياسمينە پاولينيدەن 7:6, 6:1 ەسەبىمەن باسىم ءتۇستى. كوپ كەشىكپەي ۇز­دىكتەر تىزىمىندە 57 ساتىعا جاي­عاسقان اننا كالينسكايانى قاپى قالدىردى. ءبىرىنشى سەتتە جەر­لەسىمىز 4:3 ەسەبىمەن العا شىق­قان كەزدە رەسەي ويىنشىسى باسەكەنى جالعاستىرۋدان باس تارت­تى. ءتورتىنشى كەزەڭدە توكيو وليم­پياداسىنىڭ كۇمىس جۇلدەگەرى ماركەتا ۆوندروۋشوۆامەن شەبەرلىك بايقاستى. بۇل كۇندەرى رەيتينگتە 65 ورىندى قاناعات تۇتىپ وتىرعان چەحيالىق تەننيسشى كەزىندە توپ-15-تىكتىڭ قاتارىندا ەدى. بۇل كەزدەسۋدە رىباكينانىڭ ۇستەمدىگى ەش كۇمان تۋعىزعان جوق. ەسەپ – 6:3, 6:3.

شيرەك فينالدا ەلەنانىڭ الەم­نىڭ ءبىرىنشى راكەتكاسى, 21 جاستاعى يگا سۆەنتەك كۇتىپ تۇردى. پولشا وكى­لىنىڭ رولان گار­روستىڭ ەكى دۇركىن جانە اقش-تىڭ اشىق بىرىنشىلىگىنىڭ جە­ڭىمپازى دەگەن اتاقتارى بار. WTA تۋرنيرلەرىندە ول 13 مارتە توپ جاردى. سوڭعى ەكى جىلدا يگا ءدال وسى تۋرنيردە قارسىلاس شاق كەلتىرمەي, باس جۇلدەنى ولجالادى. بۇعان دەيىن ەكەۋى ءۇش رەت كەزدەسىپ, اۋستراليانىڭ اشىق بىرىنشىلىگى مەن ينديان-ۋەللستەگى تۋرنير رىبكينانىڭ پايداسىنا شەشىلدى. بۇل جولى دا سول جاعداي قايتالاندى. ءبى­رىنشى سەتتە پولياك قىزى باسىم ءتۇستى – 6:2. ەكىنشىسى تاي-برەيككە دەيىن ۇلاسىپ, رىباكينانىڭ باعى جاندى – 7:6. ءۇشىنشى سەتتە تارازى باسى تەڭ­سەلىپ تۇردى. ەسەپ 2:2-گە جەتكەندە, سۆەن­­­تەك جاراقاتىن جەلەۋ ەتىپ, كورتقا شىق­پادى.

جارتىلاي فينالدا ەلەنا رى­باكينا ءوزىنىڭ اتتاسى ەلەنا وس­تاپەنكومەن كۇش سىناستى. WTA رەيتينگىندە 20 ورىندا تۇر­عان لاتۆيانىڭ تەننيسشىسى كە­زىندە رولان گارروستا توپ جارىپ, ۋيمبلدوننىڭ جارتىلاي في­نالىنا دەيىن جەتكەن. اسا ءىرى حا­لىقارالىق دودالاردا 12 رەت دارا شىقتى. بىراق قارقىنى كۇن سايىن كۇشەيىپ كەلە جاتقان وتان­داسىمىزعا وستاپەنكو بوگەت بولا المادى. بۇل باسەكەدە ەلەنا بالتىق جاعالاۋى وكىلىن 6:2, 6:4 ەسەبىمەن ەڭسەردى. ءبىر ايتا كەتەرلىگى, ريمدەگى تۋرنيردە اقتىق سىنعا دەيىن القىنباي جەتكەن جەرلەسىمىز امەريكالىق مونيكا سەلەش پەن رەسەيلىك ماريا شاراپوۆانىڭ رەكوردىن قايتالادى. اتتارى اڭىزعا اينالعان بۇل ويىنشىلار ءبىر ماۋسىمدا ءتورت بىردەي ءدۇ­بىرلى دودانىڭ فينالىندا ونەر كورسەتكەن ەدى. مىنە, ەندى قازاق­ستاننىڭ ماقتانىشى اۋسترا­ليانىڭ اشىق بىرىنشىلىگى مەن ينديان-ۋەللس, مايامي جانە ريمدەگى تۋرنيرلەردىڭ باس جۇلدەسى ءۇشىن تالاسۋ مۇمكىندىگىنە يە بولدى.

فينالدا رىباكينا انگەلينە كالينينامەن كەزدەستى. 26 جاستاعى ۋكراينانىڭ وكىلى الەمدىك رەيتينگتە 47 ورىندى يەلەنۋدە. «ۇلكەن دۋلىعا» ساناتىنداعى تۋرنيرلەردە ول ءۇشىنشى اينالىمنان اسىپ كورمەگەن جانە WTA تۋرنيرلەرىن بار-جوعى ءبىر رەت قانا ۇتقان. سوعان قاراماستان ريمدە دينارا سا­فينانىڭ شاكىرتى اننا بلينكوۆا (رەسەي), سوفيا كەنين (اقش), مەديسسون كيس (اقش), بەاتريس حادداد-مايا (برازيليا) جانە ۆەرونيكا كۋدەرمەتوۆا (رەسەي) سىندى تانىمال تەننيسشىلەردى تىزە بۇكتىردى. ونىڭ ۇستىنە, ەكەۋى وسىعان دەيىن نەبارى ءبىر مارتە عانا كەزدەسىپ, سول تارتىس كالينانىڭ پايداسىنا شەشىلدى.

فينالدىق سايىس ەلەنانىڭ باسىمدىعىمەن ءوتتى. ءبىرىنشى سەت­تە ول 6:4 ەسەبىمەن جەڭىسكە جەت­تى. ەكىنشىسىندە جەرلەسىمىز 1:0 ەسەبىمەن العا شىققان ەدى, كالي­نينا «بەلىم شويىرىلىپ قالدى» دەپ باسەكەنى جالعاستىرۋدان باس تارتتى. بۇل تارتىس نەبارى 1 ساعات 08 مينۋتقا سوزىلدى. وسىلايشا, رىباكينا ريمدە شى­مىلدىعى تۇرىلگەن ءدۇبىرلى دودانىڭ جەڭىمپازى اتاندى. بۇل جارىس وعان نە بەردى؟ بىرىنشىدەن, ەلەنا WTA تۋرنيرىندەگى كەزەكتى جەڭىسىنە قول جەتكىزدى. ەكىنشىدەن, بۇل – ونىڭ گرۋنتتا وتەتىن اسا ءىرى حالىقارالىق تۋرنيرلەردەگى تۇڭ­عىش تابىسى. ۇشىنشىدەن, 521 754 ەۋرو كولەمىندە تابىس تاپتى. تور­تىنشىدەن, 1000 ۇپايدى يەلەنىپ, الەمدىك رەيتينگتە ءتورتىنشى ورىنعا كوتەرىلدى. بۇل – قازاقستان تەن­نيسىندە بۇرىن-سوڭعى بولماعان جاعداي. ەندى ەرتەڭ پاريجدە رولان گارروس ءتۋرنيرى باستالادى. سول جارىستا ەلەنا رىباكينا باستاعان ەل تەننيسشىلەرىنە زور تابىس تىلەيمىز.

ەلەنا رىباكينادان بولەك, بۇل جارىستا يۋليا پۋتينتسەۆا دا ونەر كورسەتتى. تۇساۋكەسەر كەزدەسۋىندە ول بولگاريالىق ۆيكتوريا تومو­ۆانى تىزە بۇكتىرگەنىمەن, ەكىن­شى كەزەڭدە امەريكالىق كوري گاۋففقا جول بەردى. ەرلەر جارى­سىنىڭ جۇلدە قورى 7 705 780 ەۋرو دەپ بەلگىلەندى. بۇل باسەكەدە الەكساندر بۋبليك باق سى­نادى. جەرلەسىمىز يسپانيالىق پەدرو مارتينەس-پورتەرو مەن امە­ريكالىق بەن شەلتونعا شاڭ قاپ­تىرعانىمەن, ءۇشىنشى كەزەڭدە نور­ۆەگيالىق كاسپەر رۋدقا جول بەردى.