ەلوردادا قازاقستاننىڭ ەڭبەك ەرى, كۇرەستەن كسرو-نىڭ ەڭبەك سىڭىرگەن سپورت شەبەرى, قازاقستاننىڭ ەڭبەك سىڭىرگەن جاتتىقتىرۋشىسى, ماسكەۋ وليمپياداسىنىڭ چەمپيونى جاقسىلىق ۇشكەمپىروۆتى ەسكە تۇسىرۋگە ارنالعان رەسپۋبليكالىق اشىق تۋرنير اياقتالدى. اتالعان جارىستا ەلىمىزدىڭ بارلىق ايماعىنان كەلگەن بالۋانداردان بولەك, قىرعىز رەسپۋبليكاسى, وزبەكستان, تاجىكستان, ازەربايجان جانە ءيزرايلدىڭ 20 جاسقا دەيىنگى ەڭ ۇزدىك 164 بالۋانى بوزكىلەمنىڭ شاڭىن قاقتى.
جاقسىلىق ۇشكەمپىروۆتىڭ ەسىمى بۇگىندە تەك كۇرەس سالاسىنىڭ جانكۇيەرلەرىنە عانا ەمەس, بۇكىل الەمگە بەلگىلى دەسەك ارتىق ايتقاندىق بولماس. 69 جىل عۇمىر كەشكەن ابزال ازامات تەك جامبىل وڭىرىندە عانا ەمەس, قازاقستاندا وسى كۇرەس ءتۇرىنىڭ وركەندەۋىنە ولشەۋسىز ۇلەس قوستى.
بوزبالا شاعىندا قازاقشا كۇرەستىڭ قىر-سىرىنا قانىققان جاقسىلىق ۇشكەمپىروۆتىڭ كەيىننەن ءوزىن دۇنيە جۇزىنە تانىتقان كۇرەسكە كەزدەيسوق كەلگەنىن جانكۇيەرلەر جاقسى بىلەدى. سەمەيدەگى جوعارى وقۋ ورىنىندا وقىپ جۇرگەندە بولاشاق وليمپيادا چەمپيونى شاڭعى تەبۋدەن سىناق تاپسىرۋ كەرەك بولعان. الايدا شاڭعى تەۋىپ كورمەگەن جاقسىلىق ءۇشىن بۇل سىناق قيىنعا سوقتى. سودان دەنە شىنىقتىرۋ ءپانىنىڭ مۇعالىمى وعان جەڭىلدىك جاساپ, «ەگەر وزگە ستۋدەنتتى بەلدەسۋدە جەڭەتىن بولساڭ, سىنىق قاعازىڭا قول قويىپ بەرەمىن», دەيدى. اۋىلدىڭ شاڭىندا اۋناپ وسكەن, مەكتەپ كەزىندە قازاقشا كۇرەسپەن اينالىسقان جاقسىلىق ۇشكەمپىروۆ قارسىلاسىن بۇيىم قۇرلى كورمەي, ء«ا» دەگەننەن الىپ جىعادى. وسىدان كەيىن جاقسىلىقتىڭ كۇرەستەگى جۇلدىزدى ءساتى جانا باستادى. 1971 جىلى ەركىن كۇرەستەن قازاقستان چەمپيونى اتانسا, 1972 جىلى گرەك-ريم كۇرەسىنەن كسرو بىرىنشىلىگىندە بەسىنشى ورىنعا يە بولدى. اراعا ءبىر جىل سالىپ چەمپيوناتىنىڭ قولا جۇلدەسىنە قول جەتكىزىپ, كسرو قۇراماسىنىڭ قاتارىنا قابىلداندى. ءارى قارايعى داڭقتى وتانداسىمىزدىڭ جەتىستىكتەرى بارشاعا بەلگىلى.
بيىل قاتارىنان ءۇشىنشى جىل ۇيىمداستىرىلعان حالىقارالىق تۋرنيرگە توقتالار بولساق, ءۇش كۇنگە جالعاسقان رەسپۋبليكالىق بىلەكتى جاس بالۋاندار باسەكەسىندە جەرلەستەرىمىزدىڭ اراسىنان ايبەك ايتبەكوۆ (55 كگ), ولجاس ەرعالي (77 كگ), يسلام ەۆلوەۆ (82 كگ), نۇراسىل امانالى (87 كگ), نۇرتاس قىدىرباەۆ (97 كگ) جانە جوحار ۋزاروۆ (130 كگ) ءوز سالماعىندا چەمپيون اتاندى. سونىمەن قاتار بالۋاندارىمىز 5 كۇمىس, 14 قولا جۇلدەنى ەل قورجىنىنا سالدى. ءسويتىپ, جالپىكوماندالىق ەسەپتە قازاقستان بالۋاندارى دارا شىقتى.
ازەربايجان قۇراماسى ساپىنان يلكين گۋربانوۆ (60 كگ), كانان ابدۋللازادە (67 كگ, U-20 الەم چەمپيونى) مەن رۋسلان نۋرۋللاەۆ (72 كگ) ءوز سالماعىندا ۇزدىك شىققان سوڭ جالپى ەسەپتە 2-ورىنعا تۇراقتادى. ۇزدىك ۇشتىكتى تۇيىندەگەن قىرعىز رەسپۋبليكاسىنا جالعىز التىن مەدالدى جانتورو ميرزاليەۆ (63 كگ) سىيلادى.
«بۇل جارىستىڭ ءبىز ءۇشىن ورنى ەرەكشە. جىلدان-جىلعا اۋقىمى كەڭەيىپ كەلە جاتقانى قۋانتادى. كەلەسى جىلى بۇدان دا كوپ ەل قاتىسۋى ءۇشىن جىلدىڭ باسىنا اۋىستىرۋ كەرەك بولادى. ونى حالىقارالىق كۇرەس فەدەراتسياسىنىڭ كۇنتىزبەسىن ەسكەرە وتىرىپ, بەكىتۋىمىز قاجەت. مىسالى, وسى جارىسقا وزبەكستان قۇراماسى ءبىراز مىقتى بالۋاندارىن جىبەرە المادى. سەبەبى وندا قازىر ەل چەمپيوناتى ءوتىپ جاتىر. ال ازەربايجان مەن قىرعىزستان قۇراماسى نەگىزگى قۇراممەن كەلدى», دەپ ايتتى قازاقستان ايەلدەر, گرەك-ريم جانە ەركىن كۇرەس فەدەراتسياسىنىڭ پرەزيدەنتى, پارلامەنت ءماجىلىسىنىڭ دەپۋتاتى داۋلەت تۇرلىحانوۆ.
وسى تۋرنيردەن كەيىن استانا قالاسىندا قازاقستان مەن ازەربايجان قۇراماسى بىرلەسكەن وقۋ جاتتىعۋ-جيىنىن وتكىزىپ, قۇرلىق چەمپيوناتىنا دايىندىققا كىرىسەدى. ءبىزدىڭ بالۋاندار شىلدە ايىنىڭ 12-20-سى كۇندەرى يوردانيا استاناسى – امماندا سارى قۇرلىق باسەكەسىندە (U-15 پەن 20) باق سىناسا, ازەربايجان سپورتشىلارى ەۋروپا چەمپيوناتىندا جۇلدەگە تالاسادى. وسى جاس ساناتىنداعى الەم چەمپيوناتى پولشا استاناسى ۆارشاۆادا 14-20 تامىز ارالىعىندا بولادى.