بيىل كۇزدە گاندبولدان كەلەسى جىلى پاريجدە الاۋى تۇتاناتىن جازعى وليمپيا ويىندارىنىڭ ىرىكتەۋ سايىستارى باستالادى.
18-28 قازاندا قاتاردىڭ استاناسى – دوحادا وتەتىن ەرلەر اراسىنداعى ءتۋرنيردىڭ كەشە جەرەبەسى تارتىلدى. قازاقستان ۆ توبىنا ءتۇستى. قارسىلاستارىمىز – باحرەين, يران, كۋۆەيت, وزبەكستان جانە جاپونيا قۇرامالارى. بىردەن ايتا كەتەيىك, بۇل كوماندالاردىڭ بارلىعى دا ازۋلى. ماسەلەن, كۋۆەيت ازيا چەمپيوناتىدا ءتورت مارتە (1995, 2002, 2004, 2006) توپ جارىپ, بەس رەت (1979, 1983, 1987, 1989, 2008) جۇلدەگەرلەر قاتارىنان كورىندى. جاپونيا 2 التىن (1977, 1979), 5 كۇمىس (1983, 1987, 1989, 1991, 2004) جانە 4 قولانى (1993, 2000, 2010, 2020) ەنشىلەدى. باحرەيننىڭ قورجىنىندا سارى قۇرلىقتىڭ باستى دوداسىنىڭ 4 كۇمىسى (2010, 2014, 2018, 2022) مەن 1 قولاسى (1995) بار. يران ءبىر رەت (2014) قولاعا قول سوزدى. مىنە, وسى جارىستىڭ فاۆوريتتەرى وسىلار. وكىنىشكە قاراي, قازاقستان مەن وزبەكستاننىڭ قول دوبى شەبەرلەرى ازيا چەمپيوناتىندا بىردە-ءبىر رەت جەڭىس تۇعىرىنا كوتەرىلە العان جوق.