“نۇر وتان” حدپ اقمولا وبلىستىق فيليالىنىڭ عيماراتىندا سىبايلاستىققا قارسى رەسپۋبليكالىق اقپاراتتىق-ناسيحات اكتسياسىنىڭ باستالۋىنا وراي ءباسپاسوز ءماسليحاتى وتكىزىلدى. پارتيا جانىنداعى سىبايلاس جەمقورلىقپەن كۇرەس جونىندەگى قوعامدىق كەڭەس مۇشەلەرى, “جاس وتان” جاستار قاناتىنىڭ بەلسەندىلەرى, وبلىستىق ەسجكد (قارجى پوليتسياسى) باسشىلارى, جۋرناليستەر قاتىسقان باسقوسۋدا فيليال توراعاسىنىڭ ءبىرىنشى ورىنباسارى عالىم شويكين ەكىنشى رەت وتكىزىلىپ وتىرعان بۇقارالىق شارانىڭ ماڭىزى مەن الدا اتقارىلار مىندەتتەرى تۋرالى اڭگىمەلەدى.
ع.شويكين بۇل اكتسيا بۇقارالىق سيپات الىپ وتىرعانىن, سونىمەن قاتار, قوعامدىق كەسەلمەن كۇرەستە مەملەكەتتىك ورگاندارمەن ىنتىماقتاستىق جايىندا قول قويىلعان مەموراندۋم شەڭبەرىندە اتقارىلاتىن ناقتى شارالاردىڭ ورىندالۋى تەكسەرىسكە الىناتىنىن اتاپ كورسەتتى. ويتكەنى, سىبايلاستىقتى اۋىزدىقتاۋ, جۇرتشىلىق اراسىندا ونىڭ كەز كەلگەن كورىنىسىنە توزبەۋشىلىك سەزىمىن قالىپتاستىرۋ, جاستار اراسىنداعى تاربيە جۇمىستارىنىڭ ىقپالىن ارتتىرۋ “نۇر وتان” حالىقتىق-دەموكراتيالىق پارتياسى ۇستاناتىن باسىم باعىتتاردىڭ ءبىرى سانالادى. ول حالىقتىق تۇعىرنامانىڭ ارنايى بولىمىندە كورىنىس تاپقان. بۇعان قوسىمشا, پارتيانىڭ سىبايلاستىقپەن كۇرەس جونىندەگى باعدارلاماسى قابىلدانىپ, قوعامدىق كەڭەستەر قۇرىلدى. وبلىستاعى 19 كەڭەس پەن ەڭبەك ۇجىمدارىنداعى پارتيالىق باقىلاۋ بەكەتتەرى تۇرعىندار ىقىلاسىنا بولەنۋدە.
ءماسليحاتتا اكتسياعا دايىندىق بارىسىندا كەشەندى ءىس-جوسپار جاسالىپ, ءار تارماق بويىنشا جاۋاپتى ادامدار بەلگىلەنگەندىگى حابارلاندى. سونداي-اق, 50 مىڭ دانالىق اقپاراتتىق-ناسيحاتتىق ادەبيەتتەر, “قازاقستاننىڭ سىبايلاستىققا قارسى ساياساتى” ادىستەمەلىك قۇرالى, “جەمقورلىق پەن سىبايلاستىق فاكتىلەرىن قالاي حابارلاۋعا بولادى؟” اقپاراتتىق بۋكلەتى, “مەن – سىبايلاستىققا قارسىمىن!” توسبەلگىلەرى دايىندالعان. “جاس وتان” جاستار قاناتى جەمقورلىق پەن سىبايلاستىقتى انىقتاۋ ماقساتىمەن “قارسى” اتالاتىن قوزعالىستى باستاپ كەتتى.
وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتى باستىعىنىڭ ورىنباسارى, پولكوۆنيك ەركىن ماكەشوۆ جىلدىڭ ءتورت ايىندا اتقارىلعان جۇمىستار جونىندە حاباردار ەتىپ, اتالعان اكتسيا اۋقىمىنداعى ماسەلەلەردىڭ كۇندەلىكتى نازاردا ۇستالاتىنىن جەتكىزدى. قىلمىستىڭ الدىن الۋدا بۇقارالىق بەلسەندىلىك ارتا تۇسكەنى قۋانىشتى. اقكول, ەسىل, بۋراباي اۋداندارىندا وتكىزىلگەن كوشپەلى قابىلداۋلارعا 32 ادام ءوتىنىش-تىلەكتەرىمەن كەلگەن. “سەنىم تەلەفونى” ءجيى قوڭىراۋلاتا باستادى. جىل باسىنان بەرى 25 حابار ءتۇسىپ, ولار بويىنشا ارنايى جەدەل شارالار مەن تەكسەرىستەر ۇيىمداستىرىلدى. قارجى پوليتسەيى “نۇر وتان” حدپ جاساعان ىنتىماقتى كەلىسىمنىڭ جەمىستى بولاتىنىنا سەنىم ءبىلدىردى.
ءباسپاسوز ءماسليحاتىندا جۋرناليستەردى قىزىقتىرعان سۇراقتارعا ناقتى جاۋاپتار قايتارىلدى.
اقمولا وبلىسى.
باقبەرگەن امالبەك,
“ەگەمەن قازاقستان”.