تورتكۇل الەم تۇگەل اتاپ ءوتىپ جاتقان وتباسى كۇنى مەرەكەسى كەنشىلەر مەكەنىندە دە اتاۋسىز قالمادى. بۇل كۇنى قاراعاندىدا «مەرەيلى وتباسى» ۇلتتىق بايقاۋى رەسمي تۇردە اشىلىپ, ونىڭ اۋداندىق جانە قالالىق كەزەڭدەرىنە قاتىسۋعا ءوتىنىش قابىلداۋ باستالدى.
جىل سايىن 15 مامىردا بۇۇ باس اسسامبلەياسى 1993 جىلى بەكىتكەن حالىقارالىق وتباسى كۇنى مەرەكەلەنەدى. وسىلايشا, ءبىزدىڭ مەملەكەت تە ەلدىڭ تۇراقتىلىعى مەن ءال-اۋقاتىنىڭ كەپىلى – وتباسى ينستيتۋتىنا زور قولداۋ كورسەتەدى.بۇل ورايدا ەل پرەزيدەنتى «مىقتى جانە باقىتتى وتباسى – ەلىمىزدىڭ ءال-اۋقاتى مەن وركەندەۋىنىڭ نەگىزى. مەملەكەت وتباسى ينستيتۋتىن قولداپ, كەشەندى وتباسىلىق ساياسات جۇرگىزەتىن بولادى» دەگەن ەدى.
ەل اراسىندا ەرەكشە ىقىلاستى يەلەنگەن «مەرەيلى وتباسى» ون جىلدان بەرى وتباسىنىڭ قوعامداعى ورنىن ايعاقتاپ كەلەدى. داستۇرگە اينالعان ۇلتتىق بايقاۋدا اۋدان-قالالارداعى ونەگەلى وتباسىلار ءوز شاڭىراقتارىنىڭ شاتتىعىن كوپشىلىككە پاش ەتپەك.
ءسان-سالتاناتى كەلىسكەن اتالعان شارادا وبلىس اكىمىنىڭ ورىنباسارى ەربول الىقۇلوۆ جينالعان قاۋىمدى مەرەكەمەن قۇتتىقتاپ, جۇرەكجاردى لەبىزىن ءبىلدىردى.
«وتان – وتباسىنان باستالادى». سول سەبەپتى بۇل – ەرەكشە مەرەكە. سەبەبى بارلىعىنىڭ باستاۋىندا وتباسى تۇر. ادامنىڭ جاقسى ادام بولۋى – وتباسىنان. بارشا جاقسىلىقتىڭ قاينار كوزى – وتباسى. وتباسى ارقىلى دۇنيەنى تانيمىز. وسىدان وتىز جىل بۇرىن حالىقارالىق وتباسى كۇنى جاريالانعانى بەلگىلى. ءبىز جىل سايىن وسى مەرەكەدە «مەرەيلى وتباسى» ۇلتتىق بايقاۋىن اشامىز, دەدى ەربول شىمكەنتباي ۇلى.
«وتباسىنداعى باستى قۇندىلىق – تاربيە. نەگىزگى قاينار كوزى – ۇلتتىق تاربيە. سونىڭ ارقاسىندا بۇگىنگىدەي كۇنگە جەتتىك», دەيدى وتاسقاندارىنا 50 جىل تولعان احمەتوۆتەر وتباسى. وتاعاسى نۇراباي احمەتوۆ – قۇرىلىسشى, وتاناسى بيكەن احمەتوۆا – قازاقستاننىڭ قۇرمەتتى ءجۋرناليسى. يگى شارادا ىزگى تىلەكتەرىن بىلدىرگەن التىن توي يەلەرى بۇگىندە 3 بالا تاربيەلەپ, 5 نەمەرە ءسۇيىپ وتىر.
حالىقارالىق وتباسى كۇنىندە كەشە عانا شاڭىراق كوتەرگەن جاس جۇبايلارعا, التىن توي يەلەرىنە, 8 بالا تاربيەلەپ وتىرعان (ونىڭ 6-ۋى پاتروناتتى تاربيەدەگى بالالار) وتباسىلارىنا قۇرمەت كورسەتىلدى. ارقايسىسىنا 100 مىڭ تەڭگە كولەمىندەگى سىيلىقتى ءتۇرلى قوعامدىق ۇيىم تابىس ەتتى.
ۇيلەنگەندەرىنە نەبارى ءبىر اپتا عانا بولعان نۇرشۋاق الپىس پەن اسەل ومىرزاق ەكى جىل بۇرىن تانىسىپ, وتاۋ قۇرۋعا ءسوز بايلاسىپتى. نۇرشۋاق – پوليتسيا ينسپەكتورى. اسەل – پسيحولوگ. جاس جۇبايلاردىڭ العا قويعان ماقساتتارى ايقىن. بوساعاسى بەرىك, شاڭىراعى بيىك وردالى وتباسى اتانۋ. ۇلتقا پايداسى تيەر ۇرپاق ءوربىتۋ.
ء«بىزدىڭ ۇيلەنگەنىمىزگە ءبىر اپتا عانا. وعان دەيىن تانىسىپ, ءبىلىسىپ, سودان سوڭ بارىپ وسىنداي جاۋاپتى شەشىم قابىلدادىق. ويتكەنى «ۇيلەنۋ وڭاي, ءۇي بولۋ قيىن» ەكەنى انىق. وتباسىلىق عۇمىر – ومىردەگى ەڭ ماڭىزدى قادام. سوندىقتان جار تاڭداۋدا ادام شاتاسپاۋى ءتيىس», دەيدى نۇرشۋاق.
ەرلى-زايىپتى ەركەبۇلان كاتاەۆ پەن ايزات قالىمجانوۆا – كوپبالالى وتباسى. ولار وزدەرىنىڭ ەكى سابيىمەن قاتار, پاتروناتتى تاربيەگە 6 بالانى العان. ولاردى قاناتتىعا قاقتىرماي, تۇمسىقتىعا شوقىتتىرماي, 8 بالانى ماپەلەپ كەلەدى.
«بىزدە سەگىز بالا بار. ۇلكەندەرى ءا.مولداعۇلوۆا اتىنداعى وبلىستىق مامانداندىرىلعان سپورت مەكتەبىندە وقيدى. ەكەۋى سپورت شەبەرلىگىنە كانديدات. كەنجەلەرىمىز مەكتەپتە. 2020 جىلى پاتروناتتىق تاربيەگە العان بالالاردىڭ اناسى قايتىس بولعان. اكەسى جوق. بالالاردىڭ ءبارى ءبىر وتباسىنان. راس, باسىندا جۇرەكسىندىك. ءوز بالالارىمىز ءبىزدىڭ شەشىمىمىزگە تۇسىنىستىك تانىتتى. شۇكىر, قازىر ءبارى تاتۋ», دەيدى ايزات قالىمجانوۆا.
قاراعاندى وبلىسى