باسقا جاقتى بىلمەيمىز, الماتىدا ادام سەنبەيتىن جاعداي. تەاترعا بيلەت تابۋ قيىن, سپەكتاكلدىڭ ءبارى انشلاگپەن جۇرەدى, زال اۋزى-مۇرنىنان شىعىپ وتىرادى. سپەكتاكل بولاتىن كۇنى كورەرمەننىڭ كاسساعا كەلە سالىپ, بيلەتتى الا سالىپ, ورىن تاۋىپ وتىرا سالۋى ارمانعا اينالعان. كەيبىر سپەكتاكلگە اي بۇرىن قامدانباساڭ, كاسسا بىتكەن جىلان جالاعانداي, بيلەتتەر ءاپ-ساتتە ساتىلىپ كەتەدى. بۇعان ارا-تۇرا شەتەلدەن گاسترولگە كەلەتىن الەمدىك دەڭگەيدەگى تەاترلاردىڭ ايگىلى قويىلىمدارىنا كورەرمەننىڭ 50-60 مىڭ تەڭگەگە بيلەت تاپپاي اباي اتىنداعى وپەرا جانە بالەت تەاترىنىڭ الدىندا سەڭدەي سوعىلىسىپ جۇرەتىنىن قوسىڭىز.
«حالىق سوعىستان سوڭ اس ىشپەسە دە, اش بولىپ ءجۇرىپ تە, تەاتر قويىلىمدارىنان قالمايتىن», «اياعىنا كيىپ جۇرگەن ەتىگىن, قولىنداعى بولكەسىن بيلەتكە ايىرباستايتىن», «تەاتردىڭ ەسىگىن بۇزىپ, سىندىرىپ كىردىك» دەگەندى جاسى ۇلكەن اعا بۋىننىڭ اڭگىمەلەرىنەن ەستىپ قالعاندا, ءار قويىلىمنان سامساعان سارباز بەن مەكتەپتەن قۋىپ اكەلگەن وقۋشىلاردى عانا كورەتىن ادام وسى اڭگىمەنىڭ ءبارىن ەرتەگى سەكىلدى قابىلدايتىن. ۋاقىتى, اقشاسى بولا تۇرا, ارنارسەنى سىلتاۋراتىپ ونەر وشاقتارىنان سىرت جۇرەتىن ادامداردىڭ جەكە تۇلعالىق قاسيەتىنىڭ جانە رۋحاني ءوسۋ مادەنيەتىنىڭ اياقاستى ويانا قالىپ, كۇرت بەلەڭ الا باستاعان بۇل نە «بۋم»؟
بيلەت تاپپاي قاقتىعىپ جۇرگەن ەل تەك تەاتردىڭ الدىندا عانا ەمەس. ءا.قاستەەۆ اتىنداعى مەملەكەتتىك ونەر مۋزەيىنىڭ كاسساسى الدىندا دا كۇن سايىن وسى كورىنىس. سول تۇرعاننىڭ ءبارى ونەر دەسە, ىشكەن اسىن جەرگە قوياتىن جانكەشتى جانكۇيەر بولسا قانەكەي, شىلبىرداي شۇباتىلعان كەزەكتە تۇرعان جاستاردىڭ دەنى قىلقالام قۇدىرەتىن تەرەڭ تۇسىنگەندىكتەن ساعاتتار بويى تاباندىلىق تانىتىپ تۇر دەگەنگە, ەشكىم دە سەنبەس. «مۋزەيگە جىلىنا, ايىنا نەشە رەت كەلەسىز؟» دەپ اۋديتوريا الگوريتمىن انىقتاۋ ءۇشىن ساۋالناما جۇرگىزىپ جىبەرسە, ءيىن تىرەسكەن كوپتىڭ ىشىندە بىردە-ءبىر رەت مۋزەيدىڭ ەسىگىن اشىپ كورمەگەن ادامنىڭ دا بار ەكەنىنە ءباس تىگۋگە بولادى. الماتىنىڭ بارلىق مۋزەيىندە مادەني تۇتىنۋشى تاراپىنان مۇنداي سۇرانىس كۇندە بولا قويماس, بىراق بۇرىنعى احۋالمەن سالىستىرعاندا, تامىرىنا قان جۇگىرگەن. بۇرىن-سوڭدى بولماعان بۇل قىزىعۋشىلىق قايدان, قالاي پايدا بولدى؟
ءار ادام جايناپ تۇرعان مىناۋ جارىق الەمگە مۋزەيدەگى شەدەۆرلەردىڭ وزەگىندە مولتىلدەپ تۇنعان اسەمدىكتىڭ كوزىمەن قاراسا, جەر بەتى سۇمدىق پەن سوراقىلىقتاردان ارىلار ما ەدى. جان-جاعىنىڭ ءبارىن سۋىق قارماپ, جالعىزسىراپ, جان دۇنيەسى ازىناي باستاعانىن سەزگەن ادامدار بەيسانالى تۇردە رۋحاني جەتىلگىسى كەلەدى, ىشكى تۇيسىگىمەن جىلىلىق ىزدەيدى. پاندەميا كەزىندە ۇزاق ۋاقىت وقشاۋلانىپ, وڭاشالانىپ قالعان ادامعا ءوزىنىڭ الەمنىڭ ءبىر بولشەگى ەكەنىن, ال ءومىر دەگەن – قوزعالىس, ادامدارمەن قارىم-قاتىناس, الۋ, بەرۋ, ءجۇرۋ, كورۋ, قاتەلەسۋ, قۋانۋ, ءتۇيسىنىپ, ءتۇسىنۋ ەكەنىن سەزىنگەننىڭ ءوزى ءبىر باقىت. جانسىز ەكران ارقىلى, ونلاين پىشىندە ەمەس, ءتۇرىن كورىپ, جانىندا تۇرىپ, تىنىسىن, كوڭىل كۇيىن سەزىنىپ, داۋىسىن ەستىپ, تۇپ-تۋرا وزىمەن تىكەلەي بايلانىس جاساعانعا جەتپەيتىنىن ءتۇسىندى. ادام – الەۋمەتتىك جاراتىلىس يەسى, وعان ورتاسىز, قاۋىمسىز تىرشىلىك كەشۋ مۇمكىن ەمەس. مۋزەي مەن تەاتردا بۇرىن-سوڭدى بولماعان ءنوپىردى كورىپ ءجۇرىپ, ولاردىڭ تۇيسىگىمەن اشقان سول جاڭالىعىن جۇرتتىڭ مول شوعىرى قامتىلعان مادەني ورىنداردى جاعالاپ, رۋحاني ءنارى شۇپىلدەگەن ماعىنامەن تولتىرا تۇسكىسى كەلەتىنىن اڭدادىق. كوڭىلىندەگى مىڭ سۇراقتىڭ بىرەۋىنىڭ عانا جاۋابىن تاپسا دا, بۇل ادامعا قانشاما قاناعات سەزىمىن سىيلايدى. قورەك ىزدەپ, اشىرقانعان جۇدەۋ رۋح ءنار الىپ, راحاتتانادى.
مۋزەيدە مۇنشا ادامنىڭ جۇرۋىنە قۇندى جادىگەرلەرمەن قاجەتتى مولشەردە تانىسۋعا مۇمكىندىك بەرەتىن 3d ءپىشىنى دە ءوز اسەرىن بەرمەي وتىرعان جوق. كەلگەن جاستار سۋرەت تۋىندىسىنىڭ جانىندا سەلفي جاساپ, ءماز. مەيلى. بۇگىن سۋرەتكە تۇسسە, ەرتەڭ ماعىناسىن ۇعادى. بۇل دا ۋاقىتتى كوڭىلدى ءارى قىزىق وتكىزۋدىڭ ءبىر ءتاسىلى. باستىسى, مۋزەيگە اپاراتىن جولدى بىلگەنى, نيەتى, تانىسقانى.
مادەنيەت مەكەمەلەرەنىڭ باسىنا ورناعان مۇنداي مۇمكىندىك كۇندە تۋا بەرمەيدى. وسى ۋاقىتقا دەيىن «ەل تەاتر مەن مۋزەيگە بارمايدى» دەيتىن جانى ءسىرى ستەوروتيپ ءومىر ءسۇرىپ كەلدى. ول سىندى. تەاتر مەن مۋزەيگە ادام تارتۋ ءۇشىن قانداي امال-ءادىس ويلاستىرىلمادى دەسەڭىزشى؟ ءبىرى وڭ ناتيجەسىن بەردى, ءبىرى وماقاسىپ, ء«بىر رەتتىكتەن» ءارى اسا المادى. ەندى مىنە, عايىپتىڭ كۇشى ايداپ اكەلگەن اۋديتوريامەن جۇيەلى جۇمىس ىستەۋدىڭ تاپتىرماس ءساتى تۋدى. وسى ءساتتى ۇستاپ, كەلۋشىنىڭ ورەسىن كوتەرىپ, ونەر ءونىمىن قوعامعا «ساۋدالاي» بىلەتىن ماماندارعا قولداۋ ءبىلدىرىپ, ارەڭ قول جەتكىزگەن دەڭگەيدى ۋىستا ۇستاپ تۇرۋدىڭ ءبىر تەتىگى «مادەنيەت ماركەتينگى» دەيتىن ماسەلەنى نازارعا الاتىن كەزدىڭ جەتكەنىن ۋاقىت راستاپ وتىر. ۇزاق ءجۇرىپ, اڭساپ كۇتكەن مۇمكىندىكتەن قاپى قالساق, كىمگە وكپەلەيمىز؟