كۇي تاريحى قىزىق قوي. كۇيدى تىڭداعانىمىز بولماسا ونىڭ شىعۋ تاريحى مەن ءمانىن اسا بىلە بەرمەيمىز.
بۇل كۇي - عاشىقتىقتان تۋعان كۇي. كورىكتى دە قىلىقتى ارۋ بوزبالانىڭ جارى بولماسا دا, جۇرەكتەگى سەزىمىن قوزعاپ, دومبىرانىڭ شاناعىنان توگىلگەن سازىنا اينالعان.
جىگىتتىڭ كوز الدىندا قۇلپىرىپ وسكەن كورشى قىزعا كوڭىلى قۇلايدى. بىراق سەزىمىن بىلدىرۋگە باتىلى جەتپەيدى. بوزبالا جۇرەك ءسوزىن ايتا الماي جۇرگەندە, بىرەۋلەر قىزعا قۇدا ءتۇسىپ كەلەدى ەكەن. كوڭىلى الابۇرتىپ, الاي-دۇلەي بولعان عاشىق جىگىت نە ىستەرىن بىلمەي, «الىپ قاشسام با» دەپ ءبىر ويلايدى. بىراق وعان دا جۇرەگى داۋالامايدى.
اقىرى سۇيگەنى كوز الدىندا كەتە بارادى. سىرتقا شىعا الماعان, سۇيگەن قىزىنا ءسوز بوپ ايتىلماعان سەزىم كۇي بولىپ دۇنيەگە كەلەدى. سول كۇي - «ەركە سىلقىم».
كۇيدىڭ اۆتورى ءابدىمومىن جەلدىباەۆ ءبىر سوزىندە كەيىپكەردىڭ اجارى تايماعان ارداقتى اجە ەكەنىن, سوڭعى رەت كەزدەسكەندە: «ساعان دەگەن ماحابباتىمدى ءبارىبىر ەشكىم وشىرە المايدى», دەگەنىن ايتادى.
ايتا كەتسەك, 2011 جىلى شۋ قالاسىنداعى كۇرە جولدىڭ بويىنا «ەركە سىلقىم» كۇيىنە ارنالعان ارنايى ەسكەرتكىش ورناتىلعان.