شىمكەنت قالاسىندا 16 جاسقا دەيىنگىلەر اراسىندا ازيا - تىنىق مۇحيت ايماعى بويىنشا الەم چەمپيوناتىنا جولداما العان ءتورت كوماندا انىقتالدى, دەپ حابارلايدى Egemen.kz.
قازاقستان تەننيس فەدەراتسياسىنىڭ مالىمەتىنشە, قازاقستاندىقتار شيرەك فينالدا الەمدەگى ۇزدىك قۇرامالاردىڭ ءبىرى - اۋستراليانى ۇتتى.
الدىمەن زاڭعار نۇرلان ۇلى لاحلان ماكفادزەندى 5:7, 6:3, 6:1 ەسەبىمەن تىزە بۇكتىردى. سودان كەيىن ءامىر ومارحانوۆ دجەيك دەمبونى جەڭدى - 6:2, 6:3.
وسىلايشا, 16 جاسقا دەيىنگىلەر اراسىندا كۇزدە يسپانيانىڭ كوردوبا قالاسىندا وتەتىن كوماندالىق الەم چەمپيوناتىندا قازاقستاننان قىزدارمەن قاتار ۇلدار قۇراماسى دا العاش رەت ونەر كورسەتەدى.
ەرتەڭ وڭتۇستىك كورەيامەن وتەتىن جارتىلاي فينالدىق ماتچ ەشتەڭەنى شەشپەيدى. ويتكەنى قازاقستان, وڭتۇستىك كورەيا جانە جاپونيا الەم چەمپيوناتىنا جولداما الدى. ءتورتىنشى جولداما يەسى وزبەكستان مەن تايلاند اراسىنداعى كەزدەسۋدە انىقتالادى.